Read Kaqchikel Pro 18 Bible Online

Pro 18 - Kaqchikel bible

Pro 18

¹Ri wineq ri ruyon rija' nrajo' nik'oje', kan ja ri itzel taq rurayibel rija' ri nuben; roma ri' rija' kan niyakatej stape' chirij ri utzilej na'oj, roma man niqa' ta chuwech ri chojmilal.

²Ri wineq ri maneq runa'oj kan man niqa' ta chuwech ronojel ri nuk'en-pe ri ch'obonik; roma xaxe niqa' chuwech ri nich'obotej chuwech rija'.

³Toq ri mak nok k'a pa ruk'aslen jun wineq, kan nuk'en chuqa' pe k'ixbel taq banobel; y re' kan nuqasaj ruq'ij ri wineq y nuben chire chi nuk'ul etzelanik.

⁴Ri nimalej taq ch'abel ri ye'el pa ruchi' ri achin aj-na'oj, junan rik'in jun ya' ri nim rupan; y ri akuchi nalex-wi-pe ri na'oj, kan junan rik'in jun alaxibel-ya' ri nibulbu'x nel-pe.

⁵Kan man ruk'amon ta chi utz niban rik'in ri wineq itzel, richin chi ri wineq choj ruk'aslen, xa jari' ri nibe kan chuxe' ri ch'a'oj.

⁶Roma ri ch'abel ri yerubila' ri xa maneq runa'oj, jari' ri niju'un richin pa taq oyowal; ri ch'abel ri ye'el pa ruchi' rija', xa nuben chike ri winaqi' chi kan nikirayij nikich'ey.

⁷Ja ri ruchi' ri wineq ri maneq runa'oj, jari' ri nibanon chire chi nitzaq; kan ja wi ri ruchi' rija', jari' ri nibanon chi niqaqa pa pikbel ri ruk'aslen.

⁸Ri ruch'abel jun wineq ri niyako tzij chirij jun chik wineq, kan ki-ki' achi'el jun munil; ri ch'abel ri' kan napon k'a chupan ri ránima ri jun chik wineq.

⁹Ri wineq ri kan man jun rayibel rik'in richin chi nuben ri rusamaj, xa junan k'a rik'in ri wineq ri kan niqa' chuwech nuwulaj ronojel.

¹⁰Kan achi'el ri Kowilej Torre, keri' chuqa' ri rubi' ri Jehová, roma ri' ri wineq choj ruk'aslen nukuquba' ruk'u'x rik'in y napon chiri' richin nuto-ri'.

¹¹Chuwech ri wineq beyom, ri rubeyomel kan achi'el jun tinamit ri sutin-rij chi tz'aq; kan nuch'ob k'a chi ri rubeyomel achi'el jun tz'aq ri nej jotol chikaj, roma ri' man jun ri nitzaqo richin.

¹²Ri nabey ri nipe pa ránima ri wineq ja ri nunimirisaj-ri' y k'ari' noqaqa ri vululen; jak'a toq noqaqa ri qasanri'il nabey pa ránima ri wineq, nuk'en-pe ri k'ojlemal.

¹³Ri wineq ri kan chi'anin nich'on yan y xa k'a man jani tik'is-apo rubixik chire ri najowex nik'utux chire; xa nuk'ut chi maneq runa'oj y xa ruyon rija' nuya' ruk'ix.

¹⁴Ri wineq ri k'o rayibel rik'in richin nik'ase', jari' ri nibanon chire chi kan nukoch' jun yabil; jak'a ri wineq ri xa rumalin chik ruk'u'x, man q'alaj ta wi k'o jun ri xtitikir xtito'on richin.

¹⁵Ri wineq ri kan nowineq ránima, kan xtuq'i' k'a q'anej ri na'oj; roma ri winaqi' e aj-na'oj, kan niqa-wi chikiwech niketamaj más na'oj.

¹⁶Ri sipanik ri nuben jun wineq chire jun chik, kan nuben k'a chire chi nuch'ek-apo ruk'ojlen rik'in; re sipanik re' kan nitikir k'a nuya-apo chikikojol ri k'o nima'q kiq'ij.

¹⁷Toq k'o jun ch'ojinik napon chuwech jun q'atoy-tzij, kan niq'alajin chi ja ri nich'on nabey jari' ri choj; y k'a toq nich'on na ri rachpochel ri nich'ojin chuqa', k'ari' xtitz'et achike ri aj-mak.

¹⁸Ri sakinik ri niban toq k'o ch'ojinik chikikojol e ka'i', kan nuchojmirisaj-wi ri oyowal; keri' chi e ka'i' ch'ojinela' xa nik'is ri oyowalen chikikojol.

¹⁹Wi kan k'o itzel ri abanon chire ri awach'alal, kan man xkatok ta rik'in, roma xa nukowirisaj-ri' achi'el jun tinamit ri k'o tz'aq chirij; y ri man junan ta awech rik'in ri awach'alal, xa kan achi'el ri nawajo' ta yatok-apo pa jun jay ri k'o k'arak'ik ch'ich' chuchi'.

²⁰Ronojel ri nubij ri wineq rik'in ri ruchi', kan niwachin k'a y rik'in ri' xtik'ase-el chuwech re ruwach'ulew; kan niq'alajin k'a chi ri chapayon richin ri ruk'aslen, ja ri yerubij rik'in ri xerey.

²¹Ronojel ri ch'abel ri yerubij ri wineq kan k'o nuk'en-pe, nuk'en-pe kamik o nuk'en-pe k'aslen; ri wineq achike na rukusaxik xtuben chire, wi richin utz o richin etzelal, roma chi ka'i' k'o rutojbalil.

²²Ri achin ri kan nril rixjayil, janila jebel; roma kan nril-wi k'a ri rutzil ri Jehová.

²³Ri wineq ri kan man jun ok k'o rik'in, kan nikamela'an toq nuk'utuj jun utzil; jak'a ri wineq beyom toq nrak'axaj ri', kan rik'in kowilej taq ch'abel nich'on-pe rik'in.

²⁴Ek'o achibil ek'o rik'in ri wineq toq utz rubanon y xeri' xa yebe; y ek'o juley chik achibil ri kan jebel kina'oj, kan más e utz chikiwech ri ach'alalri'il.