Read Kaqchikel Pro 19 Bible Online

Pro 19 - Kaqchikel bible

Pro 19

¹Kan más jebel ri wineq ri man jun ok k'o rik'in, xaxe wi ri ruk'aslen kan choj-wi; y mani ri wineq ri xaxe etzelal ek'o pa ruchi' y kan q'alaj chi maneq runa'oj.

²Ri wineq ri kan man nuch'ob ta jebel ri achike ri nrajo' nuben, man utz ta; roma toq ri wineq kan anineq nrajo' nuben ronojel, xa xtibesach.

³Ri ch'obonik richin ri achin nakanik, kan nuyoj k'a rubanik ri rubey; y k'ari' chirij ri Jehová nrelesaj-wi ri royowal ri k'o pa ránima.

⁴Ri beyomel kan yeroyola' k'a janila chi winaqi', richin yerachibilaj; jak'a ri wineq ri xa man jun ok k'o rik'in, xa man jun najowan nachibilan.

⁵Jun wineq ri xa nutz'uk ri banobel ri yeruq'alajirisaj chirij jun wineq, xa xtiqaqa ruk'ayewal pa ruwi'; y kan qitzij wi chi ri wineq ri nitz'ukun-tzij, man xtikolotej ta el.

⁶Kan janila wi e k'iy winaqi' ri yekamela'an chikiwech ri winaqi' ri k'o kiq'ij, richin nikik'utuj jun utzil; y kan konojel winaqi' yebin chi kachibil jun wineq, xaxe roma k'o sipanik ri nuya' chike.

⁷Ri wineq ri kan man jun ok k'o rik'in, kan konojel ri rach'alal ye'etzelan richin; keri' chuqa' nikiben konojel ri e rachibil, xa yejel-el nej y man nikachibilaj ta. Kan nrajo' ta chi k'o nitzijon rik'in, y xa man jun nril.

⁸Ri wineq ri kan nutej ruq'ij richin nril na'oj, kan nrajo' wi ri ruk'aslen; y chuqa' ri wineq ri kan nuben richin chire ri etamabel, kan nril-wi ri utz.

⁹Jun wineq ri xa nutz'uk ri banobel ri yeruq'alajirisaj chirij jun wineq, xa xtiqaqa ruk'ayewal pa ruwi'; y kan qitzij wi chi ri wineq ri nitz'ukun tzij, xa pa kamik xtapon-wi.

¹⁰Kan man ruk'amon ta k'a chire ri man nich'obon ta jebel, chi k'o ta ronojel rik'in; y chuqa' kan man ruk'amon ta chi jun loq'on samajel, ja ta ri' nik'oje' pa kiwi' ri achi'a' e tata'al.

¹¹Ri wineq ri nuch'ob jebel ri achike nuben, nuben chire chi nok ch'uch'uj; y ja ri ruk'ojlen ri' ri nibanon chire chi toq k'o mak niban chuwech, rija' nuben chi achi'el man jun banatajineq.

¹²Kan achi'el nureq ruchi' ri koj, kan keri' niq'ajan toq nureq ruchi' ri rey toq royowal; jak'a toq rija' nuben jun utzil, kan ch'u'ul-ch'u'ul y niwalel, achi'el toq niqaqa ri raxq'ab pa ruwi' ri q'ayis.

¹³Jun tata'aj kan jantape' nutej poqon toq jun alk'ualaxel xa man niniman ta tzij; y ri ixjayilonel ri jantape' nuben oyowal, xa junan rik'in jun tz'uj ri kan man jun bey nitane'.

¹⁴Ri jay y ronojel ruwech beyomel, kan ja ri tata'aj ri yeya'on kan chike ri kalk'ual; jak'a jun ixjayilonel ri kan k'o runa'oj, kan ja ri Jehová ri nisipan chire ri achin.

¹⁵Ri q'oral kan nuben chire ri wineq chi niken-qa chi waran. Y ri uxlanen ri nuben ri wineq ri', xtuben chire chi xtuk'owisaj wayjal.

¹⁶Ri wineq ri kan nutaqej ri rupixa' ri Dios, kan q'alaj chi nuchajij ri ruk'aslen; jak'a ri xa nretzelaj kan ri utzilej bey richin ri Jehová, xa rukamik ri xtril.

¹⁷Ri kan k'o ri nuya' chire jun wineq ri man jun ok k'o rik'in, xa achi'el jun qajo'n ri nuya' chire ri Jehová, y ri Jehová kan nuya-wi rutzij chi kan nuya' rajel-ruk'exel chikijujunal ri utzil.

¹⁸Kan tatija' aq'ij chi napixabaj ri ak'ajol rokik nik'iy-q'anej, roma xaxe keri' k'o utz ri nawoyobej-apo; xaxe k'a man tik'o-ruwi' ri naben chire richin natijoj, man xa tiken-el pan aq'a'.

¹⁹Ri wineq ri kan richin-wi chi k'a'el, xa tutz'eta' na k'a ri akuchi xtapon-wi rik'in ri ruk'alen; roma wi xa nuk'ul to'onik jun bey, kan jantape' chik nrajo' ruto'ik.

²⁰Kan taya' k'a axikin chike ri pixabanik ri yeya'ox chawe, y kan tak'ulu' toq yatijox rik'in ch'olinik; roma jari' ri xtibanon chawe chi k'o na jun q'ij xkatok jun wineq aj-na'oj.

²¹Ri pa ránima ri wineq kan k'o k'iy ri nrajo' nuben, y ri nibanatej xaxe ri nrajo' ri Jehová.

²²Ri wineq ri kan nuben ri nusuj, kan ch'u'ul k'a nuna' ri ránima; roma kan más wi jebel jun wineq ri man jun ok k'o rik'in y mani xa jun q'olonel.

²³Toq k'o rukiy ri Jehová chuwech ri wineq, kan nuk'en-pe k'aslen chire; kan nuk'ul k'a ronojel ri k'atzinel chire y ri etzelal kan man xtapon ta rik'in.

²⁴Ri wineq ri janila ruq'oral kan nuya' k'a qa ri ruq'a' chupan ri rulaq; jak'a man nitikir ta nuk'uaj ri ruway k'a pa ruchi' roma ri ruq'oral.

²⁵Toq nich'ay jun ri man yeruch'ob ta ri ch'abel ri yerubila', ri wineq ri man kan ta k'iy retaman, nik'astej; y toq nich'olix jun wineq ri kan k'o retamabal, kan chi'anin niq'ax chuwech ri tijonik ri niya'ox chire.

²⁶Ri wineq ri k'o nreleq'aj chire ri rutata' y nroqotaj-el ri rute', xa jun alk'ualaxel ri maneq ruk'ix y xa man jun ruq'ij chikiwech ri winaqi'.

²⁷Walk'ual alaboni', kan man kixtane' chi rak'axaxik ronojel ri tijonik, roma ri q'ij toq xkixtane' chi rak'axaxik, chuqa' xa xtimestaj ri iwetaman.

²⁸Ri wineq ri kan nubananej chi nitikir nuq'alajirisaj ri qitzij, xa nitze'en chirij ri q'atbel-tzij, roma ri wineq ri' xa janila niqa' chuwech nuben etzelal chire jun chik wineq.

²⁹Ri rutojbalil mak royoben chik ri wineq ri nitze'en chirij jun chik wineq; y ri ch'ayibel kan royoben chik ri ruch'e'el-rij ri wineq ri kan maneq runa'oj.