Read Kaqchikel Pro 2 Bible Online

Pro 2 - Kaqchikel bible

Pro 2

¹Wi rix walk'ual alaboni', kan nik'ul k'a ri nuch'abel, y kan niya' ri chiri' pan iwánima, ri nupixa' ri ninya' chiwe,

²wi rix kan niya' k'a ixikin chire ri na'oj, y kan nicha' ik'u'x chire ri etamabel,

³wi rix kan nik'utuj k'a chi yixok nowineq y kan rik'in ri ichi' rix nik'utuj chire ri etamabel chi tipe iwik'in,

⁴wi kan janila nirayij re', achi'el nirayij ruwech ri saqipueq, y kan janila nikanoj achi'el nikanox jun beyomel ri ewan kan,

⁵wi keri' kan xtiq'ax k'a chiwech y xtiwetamaj ri achike rubanik ri k'o rukiy ri Dios chuwech jun wineq.

⁶Roma xaxe k'a ri Dios ri niya'on ri na'oj, kan pa ruchi' k'a rija' nel-wi-pe ronojel ri ch'obonik y ri etamabel.

⁷Ri Jehová kan jantape' k'a runaban-ri' richin chi yeruto' ri choj kik'aslen, y kan ja chuqa' rija' ri kitobal ri maneq kimak.

⁸Roma kan ja rija' ri nichajin ri kibey ri choj kik'aslen, y kan ja chuqa' rija' ri niyuqen kichin ri winaqi' ri kan nikiben achi'el ri nikibij.

⁹Ronojel re' kan xtuben k'a chiwe chi xtiq'ax chiwech ri k'o chi niben, choj niben kik'in ri winaqi', choj ri ik'aslen; roma ja banobel re' ri k'o utz ri nuk'en-pe.

¹⁰Xtiben k'a ronojel ri', roma kan xtok ri na'oj ri pa taq iwánima, y roma chuqa' ri etamabel kan xtuya' kikoten chiwe.

¹¹Ri yixtikir niq'et-iwi' rik'in ri ich'obonik kan xkixruto' k'a, y ri yixnojin jebel kan xkixruchajij chuqa'.

¹²Ri na'oj kan xkixrukol k'a chuwech ronojel itzel bey, kan xkixrukol chuqa' chikiwech ri winaqi' ri man choj taq ch'abel ta ri nel pa kichi'.

¹³Kan xkixrukol chikiwech ri winaqi' ri kiya'on kan ri choj bey, y xa kik'uan ri bey ri richin ri q'equ'm,

¹⁴winaqi' ri kan ki' nuna' ri kánima chubanik ri etzelal, y kan janila yekikot yekibanala' ri más k'ixbel taq banobel.

¹⁵Winaqi' ri xa xotoxeq ri kibey e kik'uan, y kan man q'alaj ta k'a akuchi xke'apon-wi roma ri rubanik ri kik'aslen.

¹⁶Ri na'oj xa kan xkixrukol richin chi man yixqaqa pa ruq'a' ri ixoq ri itzel ruk'aslen, chuwech ri ixoq ri' ri nrajo' yixruch'ek rik'in ri jebelej taq ruch'abel.

¹⁷Ri ixoq ri' xa rumalin kan ri rachibil ri xril toq rija' kan k'a xten na, xa xumestaj yan toq kan chuwech ri Dios xuya' rutzij chi kan nrajo' ri rachijil.

¹⁸Y roma ri' wi yixbe chirachoch ri ixoq ri', xa kan choj k'a ixbeneq richin chi yixk'is, ri bey ri' xa choj k'a beneq pa kamik.

¹⁹Y xabachike k'a ri nuju-ri' rik'in ri ixoq ri', man nitzolin ta chik pe ruk'u'x, kan man xtril ta chik ri bey richin ri k'aslen.

²⁰Xa roma ri' rix nuk'ajol yin, titzeqelibej ri kibey ri utzilej taq achi'a', kan titija' k'a iq'ij yixbiyin chupan ri kibey ri choj kik'aslen.

²¹Roma xaxe k'a ri wineq ri kan choj ri ruk'aslen, ri xtik'oje' kan chuwech re ruwach'ulew, y kan wawe' k'a xkeyaloj-wi-qa ri kan tz'aqet ri kik'aslen.

²²Jak'a ri aj-maki' kan xtiqupix-el ri kik'aslen chuwech re ruwach'ulew, y ri nikiq'ej ruwi' ri ruch'abel ri Dios, kan xkek'uq-el re wawe'.