Read Kaqchikel Pro 20 Bible Online

Pro 20 - Kaqchikel bible

Pro 20

¹Ri vino nuben chire ri wineq chi maneq ruk'ix y ri ruya'al manzana ch'amirineq nuben chire chi nuben oyowal; y ri winaqi' ri yeqaqa pa kiq'a' ri q'abarisanel taq ya' ri', kan maneq k'a utzilej na'oj kik'in.

²Kan achi'el nureq ruchi' ri koj, kan keri' niq'ajan toq nureq ruchi' ri rey toq royowal; y ri wineq ri nibanon chire ri rey chi niyakatej royowal, rik'in juba' xa nuya-ri' pa kamik.

³Ri wineq ri kan man niqa' ta chuwech nuben oyowal, ri yetz'eton richin kan nikiya-wi ruq'ij roma ri'; jak'a ri winaqi' ri xa maneq kina'oj, kan niqa' chikiwech nikiben oyowal.

⁴Ri wineq q'or kan roma nuchop-el ri q'ij richin tew, kan man nibe ta chusamajixik ri rulew; y k'a toq nutz'et na chi ri ch'aqa' nikik'ol ruwech ri kitiko'n, keri' chuqa' nrajo' nuben rija', y xa man jun niberuk'ama-wi-pe.

⁵Ri ch'obonik ri ek'o pa ránima ri wineq, xa achi'el jun ya' ri janila nim rupan; jak'a ri wineq ri k'o retamabal, kan nitikir nuben chike chi yebek'ulun-pe chuwa saqil.

⁶Kan ek'o-wi k'a achi'a' ri nikiq'alajirisaj chi rije' kan janila jebel kina'oj; jak'a jun wineq ri kan nuben-wi ri nubij, kan man jun xtilitej.

⁷Ri chojmilej wineq, kan tz'aqet-wi ri ruk'aslen ruk'uan, kan jebel k'a ruwa-kiq'ij ri ak'uala' ri yeralk'ualaj kan y yek'oje' kan chirij rija'.

⁸Toq ri rey nitz'etetej chi tz'uyul ri chiri' pa rutz'uyubal, chiri' pa q'atbel-tzij, xaxe rik'in yerutzu-pe, kan chi'anin nretamaj ri achike ri aj-mak.

⁹¿Kan nitikir kami nubij ri wineq? Yin kan nuchajin-wi' y roma ri' ri wánima kan ch'ajch'oj. ¿Y kan nitikir ta kami chuqa' nubij? Yin kan in ch'ajch'oj y man jun mak k'o ri pa nuk'aslen.

¹⁰Toq ri wineq ri kan k'o etabel rik'in richin niloq'on y kan k'o etabel rik'in richin nik'ayin, chi ka'i' etabel ri' man yeqa' ta chuwech ri Jehová.

¹¹Jun ala' kan chi'anin netamex ruwech, xaxe rik'in nitz'et ri achike niqa' chuwech nuben; kan chi'anin-wi nitz'etetej roma ri utz y ri ch'ajch'oj ri yeruben.

¹²Ri rusamaj ri ruxikin ri wineq, richin nak'ex y ri rusamaj ri runaq' taq ruwech, richin nitzu'un; chi ak'axabel y chi tzubel, kan ja wi ri Jehová banayon kichin.

¹³Man xaxe waran tawajo', roma wi keri' xtaben, xa xtik'is-qa ri k'o awik'in; xa tawelesaj ri awaran richin yasamej y kan q'ij-q'ij xkawa' jebel.

¹⁴Toq ri wineq loq'onel napon richin niloq'on, nubij: Jotol-jotol ri rajel nak'utuj chire; y toq xloq'on yan el y beneq chik, nubij-qa pa ránima, xino'on richin xinben-pe re loq'oj re'.

¹⁵Ri q'anapueq k'o xabakuchi, y chuqa' keri' ri jebelej taq abej; jak'a ri man kan ta nilitej y jari' ri más rejqalen, ja ri ruchi' ri wineq ri nich'on rik'in na'oj.

¹⁶Rat kan tak'ama' k'a kan ri rutziaq ri wineq, ri xupaba' kan ri' chuwech ruk'as jun chik; tabana' chi k'o tuyuquba' kan ri wineq, ri xupaba' kan ri' chuwech ri ruk'as jun chik wineq.

¹⁷Ri wineq kan ki' nuna' toq nutej-qa ruway, ri xa peteneq rik'in itzel ch'akonik; jak'a ri chua'q-kabij-apo, xa xtibenoj pa ruchi' chi wachawik sanayi'.

¹⁸Kan tak'utuj k'a ana'oj chike ri winaqi', richin chi ronojel utz ye'el chawech; kan jebel k'a runuk'ik tabana' chire ri ach'obonik, k'ari' tanima-awi' ri pa labal chirij jun tinamit.

¹⁹Jun wineq kamuluy-tzij kan man nitikir ta nutz'apej ri ruchi'; man tawachibilaj k'a ri wineq ri'.

²⁰Wi jun alk'ualaxel kan nroyoj itzel pa kiwi' ri rute-rutata', re alk'ualaxel re' xa chi'anin yan k'a xtiken-el y xtok pa q'equ'm.

²¹Jun beyomel ri kan pa rutikeribel-pe man choj ta ruch'akik, kan man jun bey k'a xtapon ta ri q'ij richin chi niqaqa ta urtisanik pa ruwi'.

²²Rat kan man jun bey k'a tabij chire jun wineq: Nabetojo' na pa nuq'a', xa más utz tawoyobej chi ja na ri Jehová nichojmirisan ri' y xkarukol chuwech jun ch'a'oj.

²³Ri abej richin ri etabel ri xa pa rubanik chi man tz'aqet ta, ri Jehová kan nretzelaj; y chuqa' rija' kan yeretzelaj ri etabel ri man choj ta yepajon.

²⁴Ri Jehová kan rubanon chik k'a pe ri rubeyal ri ruk'aslen ri wineq. Roma ri' ¿achike rubanik toq ri wineq nretamaj rubeyal ri ruk'aslen?

²⁵Kan jun pikbel chire ri wineq toq kan k'o nusuj y xa man nuch'ob ta jebel rij ri nusuj, y kan k'a toq k'achojineq chik na ri k'o chi nuben, k'ari' nuch'ob rij jebel chi xa man utz ta ri xuben.

²⁶Ri rey ri kan nowineq, kan nitikir k'a yerutaluj-el ri winaqi' ri e itzel, y k'ari' nuteq kich'ayikil, achi'el niban chire ri trigo.

²⁷Ri q'aq' richin saqil ri ruya'on ri Jehová chire ri achin, ja ri k'aslen ri xuk'ul-pe pa nabey; y re saqil re' kan yeruq'alajirisaj-pe ri e yakel y e ewatel rik'in-qa rija'.

²⁸Ri kow nichapo richin ri rey, ja toq kan jebel runa'oj y kan k'o ri qitzijri'il pa ruk'aslen. Jari' ri nibanon chi man jun nisilon y nelesan-el ri pa rutz'uyubal.

²⁹Ri nibanon chi ri alaboni' k'o kiq'ij, ja ri uchuq'a' ri k'o kik'in; jak'a ri nibanon nima'q chike ri rijita'q taq winaqi', ja ri nisaqir ri rusumal taq kiwi'.

³⁰Ri sokotajik ri yeruk'ul ri wineq pa ruk'aslen, richin yerelesaj-el ri etzelal y nich'ajch'ojir kan; y keri' chuqa' ri kajtajik ri yeruya' ri k'aslen chire ri wineq, nuch'ajch'ojirisaj ri ránima.