Read Kaqchikel Pro 21 Bible Online

Pro 21 - Kaqchikel bible

Pro 21

¹Kan achi'el ri ya' richin jun raqen-ya', kan keri' ri rubanik ri ruk'aslen ri rey pa ruq'a' ri Jehová; roma kan akuchi nrajo-wi rija' chi niq'ax-wi, chiri' k'o chi nibe-wi.

²Ronojel rubeyal k'aslen, kan e choj yeq'alajin chuwech ri wineq; jak'a ri Jehová nupej y nutzu', achike roma toq ri ránima ri wineq xurayij ri bey ri ruk'uan.

³Ri wineq ri kan ja ri ruchojmilal y ri rubeyal ri nutej ruq'ij chi nuben pa ruk'aslen; kan jari' ri más niqa' chuwech ri Jehová, ke chuwech ri nusuj ta kamelabel chire.

⁴Ri nuna-ri' chi kan k'o-wi ruq'ij, ri kan nunimirisaj-ri' y ronojel ri kich'obonik ri e banoy richin ri etzelal, ronojel re' kan mak-wi.

⁵Ri wineq ri kan nuch'ob jebel ri achike nuben y nisamej kow, kan k'o k'a más ri xtik'oje' rik'in; jak'a wi xa niparel y man nuch'ob ta chi utzil ri nrajo' nuben, xa nibe pa xulan.

⁶Ri wineq ri nril rubeyomel, roma ri q'oloj ri yerubanala' rik'in ri raq'; ri beyomel ri' xa achi'el ri moyew ri niyakatej-el y nibe; y xa achi'el chuqa' jun pikbel ri nuk'en-pe kamik.

⁷Ri winaqi' ri kan e itzel, kan ja ri koyowal ri nuk'uan kichin pa ruk'ayewal; rije' kan man niqa' ta chikiwech nikik'uaj ri kik'aslen achi'el nrajo' ri chojmilal.

⁸Kan itzel wi rubanik ri rubey ri wineq aj-mak; jak'a ri wineq ch'ajch'oj ri ruk'aslen, ronojel ri rubanobal kan choj wi.

⁹Kan más utz k'a chire jun achin chi stape' rulatz'an ri' pa jotol chire ri rachoch; ke chuwech ri k'o-qa pa nimalej jay rik'in ri rixjayil, ri xaxe oyowal ri nuben chire.

¹⁰Ri ránima ri wineq banoy richin etzelal, xaxe ri itzel taq banobel ri niqa' chuwech nuben, roma ri' ri winaqi' ri k'o kachoch chunaqaj ri rachoch rija', ni rije' man jun utzil ri nikil ta rik'in.

¹¹Toq nich'ay k'a jun ri man yeruch'ob ta ri ch'abel ri yerubila', ri wineq ri man kan ta k'iy ri retaman, nik'astej; y toq niya'ox rubeyal chire ri wineq ri k'o na'oj rik'in, kan jebel nuk'ul ri tijonik ri niya'ox chire.

¹²Ri choj ruk'aslen, kan rik'in k'a ronojel na'oj nuch'ob-rij ri kik'aslen ri aj pa rachoch ri wineq itzel, rija' kan retaman achike rubanik nuben, richin chi ruchapon rubanik ri etzelal.

¹³Ri wineq ri kan nuben chi man nrak'axaj ta toq nisik'in ri kan man jun ok k'o rik'in; rija' kan keri' k'a xtuk'uluwachij toq k'o ri xtuk'utuj, man jun xtik'uluban-pe ri ruch'abel.

¹⁴Ri sipanik ri pan ewel yejach-wi, nikiqasaj ruwi' oyowal, y toq yepuaqix ri winaqi' ri akuchi xa man jun yetz'eton, ri nimalej taq oyowal yechup-qa.

¹⁵Toq ri nikiben ri winaqi' kan ronojel pa ruchojmilal, ri winaqi' e choj, kan nuk'en k'a pe kikoten chike; jak'a chike ri winaqi' e banoy richin ri etzelal, xa nuk'en-pe tzaqik.

¹⁶Ri wineq ri kan pa rubanik nuben chi nusech ri bey richin ri na'oj, xa xkeberila-apo ri akuchi ek'o-wi konojel ri e kaminaqi'.

¹⁷Ri wineq ri kan niqa' chuwech yerubanala' ri nurayij ri ránima, xa xtuk'is ri k'o rik'in; ri kan niqa' chuwech nutej vino y yerutijila' ri nrajo'; ri wineq ri' xa man jun bey xtibeyomer.

¹⁸Pa ruk'exel k'a ri wineq choj, nik'oje' kan ri banoy richin etzelal, y ja rija' nik'ulun ri rutojbalil; y pa ruk'exel ri wineq ri kan ja ri qitzij ri rubanobal, nik'oje' kan ri nuq'ej rutzij.

¹⁹Kan más utz k'a chire jun achin chi pa jun tz'iran-ruwach'ulew nuq'axaj-wi ri ruk'aslen, y mani pa jay y xa rik'in ri rixjayil, ri man utz ta nuna' chire y xaxe oyowal ri nuben.

²⁰Pa rachoch ri wineq aj-na'oj, kan chajin y utz k'a rukusaxik niban chire ri beyomel y ri aceite olivo; jak'a ri wineq ri xa maneq runa'oj, kan man nuyek ta kan juba', xa ronojel nuk'is-qa.

²¹Ri wineq ri kan nucha' ruk'u'x chi kan choj y jebel runa'oj nuben kik'in ri ch'aqa' chik winaqi', kan k'o urtisanik ri xtril, roma ri' xtiyaloj xtik'ase', ri winaqi' choj xtikiben rik'in y xtikiya' ruq'ij.

²²Ri tinamit akuchi ek'o achi'a' ri kan maneq xibinri'il chikiwech, xa tikirel chi nitzaq pa ruq'a' jun aj-na'oj, y chuqa' rija' kan nitikir yeruwulaj ri nimalej taq tz'aq ri sutiyon-rij ri tinamit, ri man jun xch'obon chi nitzaq.

²³Ri wineq ri kan nitikir nuq'et ri ruchi' y nitikir nuq'et ri raq' richin man yekibij ta etzelal, kan retaman-wi nuchajij ri ruk'aslen, richin man napon ta pa bis.

²⁴Wolowik wineq nibix chire jun wineq ri nuya' ruq'ij y nunimirisaj-ri' ruyon rija', ri xa yerubanala' banobel, xaxe richin chi tibix chirij chi kan k'o-wi ruq'ij y k'o retamabal.

²⁵Ri itzel taq rayibel ri ek'o pa ránima ri wineq q'or, jari' ri nikamisan-qa richin, roma xa kan man nuch'ob ta yerukusaj ri ruq'a' richin nisamej.

²⁶Ek'o winaqi' ri kan niq'ax ri q'ij pa kiwi' y ronojel yekirayila' chi k'o ta pe kik'in, jak'a ri wineq ri choj ruk'aslen, roma kan k'o ri nukusaj, kan rik'in kikoten nuya'.

²⁷Ri kamelabel ri nikiya' ri winaqi' ri kan e banoy richin ri etzelal, xa netzelex roma ri Jehová, y más nretzelaj toq xa rik'in jun itzel kánima nikiya'.

²⁸Jun wineq ri man utzilej q'alajirisanel ta, xa xtusuq'-ri' rik'in ronojel ri yerubila', jak'a ri wineq ri nak'axan richin chi utzil, xa kan xkepe k'a ch'abel rik'in, richin nich'akon chirij.

²⁹Ri wineq itzel, stape' k'ayew ri rubey ri ruk'aslen, rukoch'och'en ruwech beneq; jak'a ri wineq ri kan ja ri qitzij ri k'o pa ruk'aslen, nuchojmirisala' rubey ruk'aslen ri beneq.

³⁰Ri na'oj, ri etamabel y ronojel ri pixa' ri xa richin ok ri wineq, xa kan e man jun ok chuwech ri Jehová.

³¹Ri kiej, richin chi nuk'uex pa jun oyowal, kan nitijox k'a jebel, jak'a ri ch'akonik richin ri oyowal, ri' ja ri Jehová ri nibanon.