Read Kaqchikel Pro 22 Bible Online

Pro 22 - Kaqchikel bible

Pro 22

¹Ri wineq más utz chi nucha' ri k'o utz rutzijol chikikojol ri winaqi', ke chuwech k'o nimalej beyomel rik'in; chuqa' más utz chi etaman ruwech koma ri ruwinaq, ke chuwech ri k'o q'anapueq y saqipueq rik'in.

²Ek'o winaqi' e beyoma' y ek'o chuqa' ri man jun ok k'o kik'in; jak'a ri ka'i' kiwech winaqi' ri', xa e junan, roma kan ja ri Jehová ri banayon-pe kichin.

³Ri wineq ri kan nowineq kan chi'anin nutzu' toq k'o ruk'ayewal peteneq y nrewaj-ri' chuwech; jak'a ri wineq ri xa maneq ok retamabal, man jun ri nutzu' y roma ri' choj niberuliba-ri' pa ruk'ayewal.

⁴Ri rajel-ruk'exel ri nuk'ul jun wineq ri kan nuqasaj-ri', ja ri k'o rukiy ri Dios chuwech, y chuqa' roma ri' kan nuk'ul k'a beyomel, nuk'ul ruq'ij y kan nuk'ul ruk'aslen.

⁵Pa rubey ri wineq banoy richin ri etzelal, kan nojineq k'a chi k'ix y chi pikbel, jak'a ri wineq ri nupoqonaj-ri' kan man nijel ta apo chunaqaj ri bey ri'.

⁶Kan tanaq'tisaj k'a pe ri ak'ual k'a pa ruch'utinal-pe, rik'in ri achike rubeyal ruk'aslen ri utz chi nuk'uaj, richin keri' toq xtapon-q'anej pa rurijixinen, kan man xtujech'ej ta kan ri' chire ri rubeyal k'aslen ri'.

⁷Ja ri wineq beyom k'a ri niq'aton-tzij pa ruwi' ri wineq ri man jun ok k'o rik'in; y ri wineq ri nibanon qajo'n rik'in jun chik wineq, kan xtok k'a samajel richin ri nibanon ri qajo'n chire.

⁸Ri wineq ri nutik etzelal, kan etzelal chuqa' ri xtuk'ul ri chuwech-apo; y kan achi'el ri rukowil ronojel ri ch'abel ri yerubij, kan keri' chuqa' ri xtiqaqa pa ruwi' rija'.

⁹Ri wineq ri kan yeruto' ri k'o nik'atzin chike, kan xtuk'ul-wi urtisanik, roma rija' kan man nupoqonaj ta chi kan ja ri ruway rija' ri nuya' chike.

¹⁰Tawelesaj-el ri wineq ri man yeruch'ob ta ri ch'abel ri yerubila' y kan xketane' ri oyowal. y chuqa' kan xkek'is-el ri tojojnik y ri yoq'onik.

¹¹Ri wineq ri kan janila niqa' chuwech chi rija' kan man jun ri nrewaj ta pa ránima, y kan nutej ruq'ij chi kan utz rubanik ri ruch'abel, ri rey kan xtok k'a rachibil ri wineq ri'.

¹²Kan pa ruwech k'a ri Jehová ek'o-wi ri winaqi' aj-na'oj, richin chi yeruchajij; y kan pa ruwech chuqa' rija' ek'o-wi ri kan e nowineq chubanik ri etzelal, richin chi nuyoj ri nikajo' nikiben.

¹³Ri wineq janila ruq'oral richin nisamej, nubij: Pa bey k'o jun koj, Wi xkinel-el pa bey, kan jujik chi xkirukamisaj kan.

¹⁴Kan achi'el k'a jun jul ri janila nim rupan, keri' ri pa ruchi' ri ixoq ri nukanoj jun chik achin, y k'a chiri' nibetzaq-wi ri achin, ri xa itzel nich'on chirij ri Jehová.

¹⁵Ri ruch'ujilal jun ala', kan ch'ikil ri chiri' pa ránima, jak'a wi nukusex ri xik'a'y toq nitijox richin chi man nuben ta chik ri banobel ri', kan nel-wi-el.

¹⁶Ri wineq ri kan k'o ri nutz'oq chuwi-kiq'a' ri xa man jun ok k'o kik'in, xaxe richin chi rija' nibeyomer, y rija' k'o chi nutoj chire jun wineq más beyom, rija' xa nik'oje' chuqa' kan pa meba'il.

¹⁷Kan jebel k'a taya' axikin chire ri ch'abel ri xtinbij chawe, roma jare' ri na'oj ri kibin kan ri aj-na'oj. Kan tajacha' ri awánima chi retamaxik ronojel ri na'oj ri kiya'on kan rije'.

¹⁸Y re ch'abel re' kan janila kikoten xtuk'en-pe chawe, wi kan jantape' ek'o chi'ak'u'x, y chuqa' wi kan pan achi' ek'o-wi-pe richin chi ye'akusaj.

¹⁹Re ch'abel re' kan xtuben chuqa' chawe chi nakuquba' ak'u'x rik'in ri Jehová, y roma ri' kan chawech rat nink'ut-wi re wakami.

²⁰Kan jare' k'a yentz'ibaj kan ri etamabel-tzij, e juwineq lajuj k'a ri yentz'ibaj kan chawe, richin chi nikiya' awetamabal y ri ana'oj chuqa'.

²¹Richin chi natzijoj y naq'alajirisaj ri qitzij chike ri winaqi', y richin chuqa' chi kan awetaman nasol rij ri tzij chuwech ri kan k'o pan awi' rat.

²²Rat, man k'a ke'atz'ila' ri winaqi' ri xa man jun ok k'o kik'in, y chuqa' kan man taqasaj kiq'ij ri chiri' akuchi niban-wi q'atoj-tzij roma rije' xa man tikirel ta chi nikito-ki'.

²³Roma kan ja ri Jehová ri xtich'on pa kiwi' rije', richin chi yeruto', y ri xkejachon pa kamik ri winaqi' ri', rija' kan xtrelesaj chuqa' ri kik'aslen.

²⁴Man tarayij yatok rachibil jun wineq ri kan chi'anin nipe royowal; kan man k'a tawachibilaj ri wineq ri xa man niq'ax ta chuwech, stape' chi oyowal o chi utzil yach'on rik'in.

²⁵Richin keri' rat man nak'en ta apo ri rubanik rija', roma wi yaqaqa chupan, rik'in juba' xa man yatikir ta chik nakol-pe-awi'.

²⁶Man k'a chi'anin tasuj-awi' richin naben xabachike, richin man naju' ta awi' chuxe' ejqa'n; kan man chi'anin tapaba' kan awi' chuwech jun k'as, ri xa richin jun chik wineq.

²⁷Roma wi xa man jun k'o awik'in richin chi natoj ri jun k'as ri', xa kan xtelesex-el chi'axe' ri ch'at ri akuchi yawer-wi, richin nok chuwech ri k'as.

²⁸Rat, kan man k'a tajeluj-apo ri ak'ulba't, roma ri k'ulba't ri' kan ojer ri' k'o-pe; kan man k'a tajeluj-apo ri ak'ulba't, toq ri k'ulba't ri', kan ja ri awati't-amama' ri e yoyon kan chiri'.

²⁹Wi rat awetaman ruwech jun wineq ri kan jebel nisamej pa rusamaj rija', ri wineq ri' kan tikirel chire chi nibesamej kik'in ri e rey, y man kik'in ta xabachike winaqi' nril-wi rusamaj.