Read Kaqchikel Pro 23 Bible Online

Pro 23 - Kaqchikel bible

Pro 23

¹Toq rat yatz'uye-apo richin chi yawa-apo junan rik'in ri q'atoy-tzij, kan toqaqa k'a chi'ak'u'x chi kan rik'in jun q'atoy-tzij yawa-wi.

²Stape' janila yanum, xa tabana' chi naqupij ri awayjal ri', rat, kan yatikir naben keri', roma pan aq'a' rat k'o-wi ri rayibel richin ri awánima.

³Man kan janila tarayij kiwech ri q'utun, xaxe roma ri kibanik banon chike; roma rik'in juba' ri xoyon awichin, xa k'o roma toq kan keri' rubanik wa'in ri nusuj chawe.

⁴Man jun bey tach'ob chi yasamej janila, xaxe richin chi yabeyomer-q'anej; xa katuxlan chire ronojel ri nojibel ri'.

⁵Roma wi rat kan natzu' k'a el beyomel chupan ri ak'aslen, toq natzu' yan chik, xa xbe yan; xa achi'el xek'oje-el ruxik', achi'el ri ruxik' ri kot, richin chi nej nibe chikaj.

⁶Xa ta napon jun q'ij chi jun k'ek' wineq yaroyoj richin jun wa'in, man tibe awech y ak'u'x chirij ri jalajoj q'utun ri yeruya' chawech.

⁷Roma ri k'ek' wineq ri', kan achi'el ri nich'obon pa ránima, kan keri' rubanik rija'; stape' nubij chawe; kawa', katuk'ya'; jak'a ri ránima xa nuch'ob janipe' ri xusech chuwech ri wa'in ri'.

⁸Ri más ruk'amon chi naben rat, ja ri nabexa' kan ri janipe' ri xatej-pe chiri', y xa man jun xuq'ajuj ri janipe' jebelej taq ch'abel ri xe'abila' chire.

⁹Kan man k'a katzijon rik'in jun wineq ri xa man jun ok retaman, roma ri na'oj ri natzijoj chire rat, chuwech rija' xa man jun rejqalen, xa rutze'en nuya'.

¹⁰Rat, kan man k'a tajeluj-apo ri ak'ulba't pa jun ulew, toq ri k'ulba't ri' kan ojer ri k'o-pe chiri'; chuqa' kan man katok-apo pa rulew ri xa maneq chik rute-rutata'.

¹¹Roma wi keri' naben chike, rije' kan k'o k'a ri nito'on kichin y kan k'o ronojel uchuq'a' pa ruq'a'; ri kan nitikir-wi nuben chi nitzolin pa kiq'a' ri kan kichin rije'.

¹²Rat, kan tajacha' k'a awi' rik'in ronojel ri awánima, richin nik'oje' más awetamabal; y kan taya' chuqa' axikin chi retamaxik ri kitzij ri k'o ketamabal.

¹³Man tik'o ak'u'x nabij chire ri ak'ual ri achike ruk'amon chi nuben; y stape' kan nakusaj ri xik'a'y chirij, xa man xtiken ta roma ri'.

¹⁴Kan poqon-wi k'a ri xik'a'y ri nakusaj richin nach'ey ri ak'ual, jak'a rat kan nakol k'a ri ruk'aslen chuwech ri jul.

¹⁵Rix, ri ix nuk'ajol yin, wi kan nik'oje' k'a na'oj ri pa taq iwánima; re' kan xtuben k'a chire ri wánima yin, chi janila xtikikot.

¹⁶Yin kan janila k'a xkikikot, toq xtinwak'axaj chi rix kan rik'in na'oj ri yixch'on.

¹⁷Man jun bey tarayij naben ri rubanobal jun wineq aj-mak, rat xa tarayij naben ronojel q'ij, ri nikiben ri winaqi' ri k'o rukiy ri Dios chikiwech.

¹⁸Wi rat kan kere' ri xtaben, kan takuquba-apo ak'u'x chi k'o utz ri xtabewila-apo ri chawech; ri awoyoben-apo, kan qitzij k'a xtel chawech.

¹⁹Rix k'a ri ix nuk'ajol yin, kan tibana' k'a ri niwak'axaj wik'in yin y kixok aj-na'oj; kan kixnojin k'a jebel ri pa taq iwánima, richin nik'uaj ri chojmilej bey.

²⁰Rix, kan man k'a kixk'oje' kik'in ri winaqi' ri yalan yetijo vino; ni man kixk'oje' chuqa' kik'in ri winaqi' ri nik'o ruwi' ti'ij nikitej.

²¹Roma ri wineq ri nik'o ruwi' niqumun y nik'o ruwi' niwa', xa xtibe pa meba'il; keri' chuqa' ri wineq ri kan janila waran nuben, xa xtapon ri q'ij toq xa ruyon chik k'ojobel rij.

²²Rat, kan tabana' k'a ri nubij chawe ri atata', ri xalk'ualan awichin; kan man k'a taben chi man jun chik rejqalen ri ate', toq rija' xtapon pa rurijixinen.

²³Rat, kan tatija' k'a aq'ij richin ye'awil ri k'o kejqalen; y man ke'awisq'opej-el ri qitzij, ri na'oj, ri tijonik y ri etamabel.

²⁴Roma kan janila wi xtikikot ri rutata' jun alk'ualaxel, ri kan choj ri ruk'aslen; roma kan xralk'ualaj jun aj-na'oj; y jare' ri nibanon chire ri tata'aj chi nikuqer-qa ruk'u'x.

²⁵Rat, kan tabana' k'a chike ri ate-atata', chi yekikot; kan tabana' k'a chire ri ate' chi nikikot, roma ja rija' ri xalan awichin.

²⁶Rat, nuk'ajol yin, kan tajacha' k'a chuwe ri nojibel ri k'o pan awánima, richin nataqej ri nuch'abel; richin kan jebel k'a xtatzu' y jebel chuqa' xtana' chupan ri nubey yin.

²⁷Rat, kan tawetamaj k'a chi ri ixoq itzel ruk'aslen ruk'uan, xa achi'el jun jul ri janila nej rupan; y ri ixoq ri rutz'apen ruwech ri rachijil, xa junan rik'in jun jul ri nej rupan y latz' ok ri rubanik.

²⁸Ri ixoqi' ri' kan nuben k'a achi'el jun eleq'om toq yeroyobej ri winaqi'; kan nuben chike ri achi'a' chi yetzaq pa mak.

²⁹¿Achike ta k'a wineq ri nureq ruchi'? ¿Achike ta k'a wineq ri xa toq'ex ruwech? ¿Achike ta k'a wineq ri xaxe oyowal nuben? ¿Achike ta k'a wineq ri nutzolila-ri' chirij roma ri man utz ta xuben? ¿Achike ta k'a wineq ri sokotajineq y xa man jun achike roma? ¿Achike ta k'a wineq ri q'equmatajineq ruwech?

³⁰Ri wineq ri', ja ri jantape' k'o vino chikiwech richin nikitej; ri kan jantape' ek'o-apo richin yekitejtobela' jalajoj ruwech vino.

³¹Rat, kan man k'a tarayij ruwech ri vino, ri kan jebel keq-keq nitzu'un; toq kan niyok'olin chupan ri qumbel, y man k'ayew ta richin naqum-qa.

³²Jak'a ri pa ruk'isibel chire ronojel ri vino ri', xa xtok achi'el rutibal jun kumetz; xa nuq'axo'n achi'el rutibal jun itzel kumetz.

³³Y jari' toq kan xkepalej k'a achike na pan awech, y ri pan awánima kan xkebe'el k'a pe itzel taq ch'abel ri xa man jun bey e abin.

³⁴Y jari' chuqa' toq xtana' chi achi'el xa at li'an k'a pa nik'aj chire ri palou; o xtana' chuqa' chi achi'el yawer k'a pa rutza'n-el ri nimalej che' ri pa'el pa nik'aj chire jun barco.

³⁵Y k'ari' rat xkatzijon ayon y xtabij: Xich'ay y man xinna' ta. K'o ri xch'ayon wichin y man noqaqa ta chinuk'u'x. Toq xtuna-el nuwech jebel, xtinbenkanoj jun chik nuya', xkacha' k'a.