Read Kaqchikel Pro 24 Bible Online

Pro 24 - Kaqchikel bible

Pro 24

¹Man tichupun ak'u'x chirij ri kibanobal ri winaqi' ri kijachon-ki' chubanik ri etzelal; ni man tarayij chuqa' chi kan junan yak'oje' kik'in.

²Roma rije' xa ruyon etzelal ri yekich'obola' pa taq kánima; y ri kich'abel kan ruyon richin yekibila' ri achike etzelal ri nikajo' nikiben chire jun chik.

³Rik'in ri na'oj, kan niyakatej k'a el jun jay winaqi'; y rik'in ri etamabel, kan nich'oke' jebel y man jun xtisilon richin.

⁴Y wi ri winaqi' kan xtikikusaj jebel ri ketamabal, kan xtinoj ri kachoch; kan xtikinojisaj rik'in jalajoj kiwech beyomel.

⁵Más utz chire ri wineq chi k'o runa'oj, ke chuwech ri wineq ri xaxe ri ruchuq'a' k'o, y más utz ri wineq ri retaman achike rubanik nrajo', ke chuwech ri wineq ri janila ruchuq'a'.

⁶Y keri' ri labal yech'akatej, roma kan jebel ruch'obik banon chike; ri tinamit kan yeqaqa-wi, roma kan e k'iy etamanela' ri yech'obon rij ri oyowal ri'.

⁷Chire jun wineq ri xa maneq runa'oj, kan nuna' chi man nuq'i' ta ri na'oj; roma ri', rija' kan man nrajo' ta nich'on ri pa taq molojri'il kichin ri winaqi' aj-na'oj.

⁸Jun wineq ri kan jebel ruch'obik nuben chire ri itzel banobel, ri nuben chire jun chik wineq, ri wineq ri' kan netamex k'a ruwech chi rija' jun tz'ukuy richin oyowal.

⁹Ri banobel ri nurayij nuben ri wineq ri xa maneq runa'oj, xa ruyon mak; y ri wineq ri xa man nich'obon ta jebel, xa netzelex k'a koma ri winaqi'.

¹⁰Rat ri nimayamo-qa ri awánima, toq k'o ruk'ayewal ri noqaqa pan ak'aslen, k'a jari' toq niq'alajin chi xa man yakowin ta, roma xa maneq ok awuchuq'a'.

¹¹Rat kan ruk'amon chi ye'akol ri winaqi', ri nikitej poqon pa kiq'a' ch'aqa' chik winaqi', kan ke'akolo' k'a ri winaqi' ri choj e beneq richin yebeqaqa pa kamik.

¹²Y stape' rat xtabij: Xa man xqetamaj ta, roma ri' man xojto'on ta. ¿Kan man niq'ax ta kami chuwech ri retaman ri achike k'o pan awánima? Ri jun ri kan rutzuliben ri achike rubanik ri ak'aslen, kan retaman ri achike ri nach'ob; y rija' kan xtuya' ruk'exel chawe, roma ri rubanik ri ak'aslen.

¹³Rat, nuk'ajol yin, kan tatija' k'a ri kab ri kan utz-wi, kan tatija' k'a ri kab ri nikiya' ri taq chikopi', roma kan ki' xtuna-qa ri aqul.

¹⁴Kan ta keri' rukabil xtana' rat chire ri na'oj, chupan ri ak'aslen; y toq awilon chik k'a ri na'oj, k'o utz ri xtabewila-apo ri chawech; y ri awoyoben-apo, kan qitzij k'a xtel chawech.

¹⁵Rat ri xa at aj-mak, man kabek'oje-apo chunaqaj ri rachoch ri wineq choj, xaxe richin chi k'o etzelal ri nawajo' naben chire; kan man k'a kabeteleq'-pe ri chiri', roma ri jay ri' xa jun kuchubel richin rija'.

¹⁶Ri wineq ri kan choj, stape' nitzaq wuqu mul rik'in ri ruk'aslen, kan chi'anin niyakatej chik el; y man keri' ta ri wineq itzel, roma toq rija' nitzaq, q'asen nik'oje' kan chiri'.

¹⁷Toq rat natz'et chi ri wineq ri netzelan awichin, nitzaq, man kakikot chirij; chuqa' man katze'en ri pan awánima, roma rija' nitzaqilan rik'in ri ruk'aslen.

¹⁸Y wi rat naben ri banobel ri', y ri Jehová kan nutzu-pe, man utz ta xtutz'et; rik'in juba' xa pan awi' chik rat nuya-wi ruk'ayewal y man pa ruwi' ta chik ri netzelan awichin.

¹⁹Rat, kan man kaq'aq'er roma awoyowal, roma ri yekibanala' chawe ri winaqi' ri kan e itzel, ni man tarayij chuqa' chi kan junan ta yak'oje' kik'in.

²⁰Roma ri wineq ri kan itzel, kan man k'a xtiberila' ta chik apo ri peteneq chuwech; ri wineq itzel, xa xtichup yan k'a ri ruk'aslen, achi'el nichup-el jun q'aq' richin saqil.

²¹Rat, nuk'ajol yin, kan tik'oje' rukiy ri Jehová chawech y chuqa' chuwech ri rey, y man jun bey taxol-awi' kik'in ri winaqi', ri maneq Dios, ni maneq rey chikiwech.

²²Roma xa pa jun ti ramaj, tikirel chi nipe wululen chawij, y man jun etamayon achike ruwech ruk'ayewal, ri nikiya-pe pan awi'.

²³Re etamabel-tzij re', kan kichin chuqa' ri winaqi' e aj-na'oj: Man utz ta chi toq niban jun q'atoj-tzij, xaxe jun ri utz niban rik'in.

²⁴Ri nibanon chire jun wineq ri xa itzel ruk'aslen, chi kan choj wi ri ruk'aslen; ek'o winaqi' ri xtikoyoj itzel pa ruwi' y ri winaqi' kichin ch'aqa' chik ruwach'ulew xa xtiketzelaj.

²⁵Y ri xech'olin chirij ri wineq ri', kan kikoten k'a xtuna' ri kánima; y k'iy k'a urtisanik ri xtiqaqa-pe pa kiwi' rije'.

²⁶Ri wineq ri nuk'uluba' ri ch'abel chi utzil, kan achi'el xa ta jun tz'ubanik ri nuya'.

²⁷Ri ruk'amon chi nuben ri wineq pa nabey, ja ri rusamaj ri k'o nej, kan ja ri rusamaj ri chiri' pa rulew, jari' ri nik'atzin chi nik'achoj kan, y k'a chirij ronojel ri', k'ari' ruk'amon chi nuben ri rachoch.

²⁸Rat, kan man katok jun q'alajirisanel, tz'ukuy-tzij, chirij jun wineq; kan man ke'abila' tzij ri xa man e qitzij ta.

²⁹Man jun bey k'a tabij: Kan achi'el ri xuben rija' chuwe yin, kan keri' ri xtinben yin chire; ri ruk'exel ri xtinya' yin chire rija', kan achi'el k'a ri rubanik ri rubanobal, man kacha'.

³⁰Yin kan xiq'ax k'a pa rulew ri q'or achin, y xiq'ax k'a chiri' kojol ri uva richin ri achin ri xa maneq runa'oj.

³¹Jari' toq xintzu' kan chi janila chi k'ix ri k'iyineq-pe chupan y ri amley kan rutz'apen-ruwi' ri ulew; y ri abej ri e nuk'un-q'anej, ri nik'atzin richin man jun nok-apo ri chiri', xa xewuluwu' yan qa.

³²Y toq yin xintzu' re', ri wánima kan janila k'a xuch'ob rij, xintzu' k'a ri rubanon ri ulew y kan k'o k'a ri xuk'ut chinuwech.

³³Roma rat, juba' yawer, juba' amoyin ri runaq' taq awech, y juba' chik xa aq'eten aq'a' y xa man jun naben.

³⁴Y toq xtanabej kan jari' k'a xtok'ulun ri meba'il awik'in, achi'el toq nok'ulun jun wineq ri pan awachoch, ri nej peteneq-wi; kan k'o k'a xkebek'atzin-pe chawe, y xkepe chawij achi'el achi'a' richin pan oyowal.