Read Kaqchikel Pro 25 Bible Online

Pro 25 - Kaqchikel bible

Pro 25

¹Chuqa' re etamabel-tzij re', kan e richin k'a ri rey Salomón, y xeq'axex chuwa wuj, koma ri achi'a' ri nima'q kiq'ij, ri e rusamajela' ri Ezequías, ri rey pa Judá.

²Ri nibanon chire ri Dios chi nim ruq'ij, ja ri kan jebel ruyakik rubanon chire ronojel ri man etz'etel ta; y ri nibanon chire ri rey chi k'o ruq'ij, ja ri nitikir nuya' pa saqil, ronojel ri e ewatel.

³Achi'el ri kan nej-nej k'o-wi-el ri kaj, y ri kan nej-nej k'o-wi-qa ri ruk'u'x re ruwach'ulew; keri' ri ruch'obonik ri rey, y roj man niqaq'i' ta richin niqach'ob.

⁴Taya'erisaj ri saqipueq richin chi nawelesaj ri tz'il chupan, y kan jari' utz chik chi niban jun qumbel rik'in, roma ri samajiy saqipueq.

⁵Keri' chuqa' toq ri itzel taq samajela' richin ri rey, ye'oqotex-pe, kan más kow y más choj xtok ri ruq'atoj-tzij rija'.

⁶Rat, man jun bey taben chi naya-apo aq'ij chuwech ri rey, ni man jun bey chuqa' taben chi at jun chike ri nima'q kiq'ij, ri ek'o rik'in ri rey.

⁷Roma kan más utz chi nibix na chawe chi kajote-pe wawe', ke chuwech niban chawe chi xa maneq ok aq'ij, ri chiri' chikiwech ri nim kiq'ij, toq xa e atz'eton chik kan kiwech rije'.

⁸Rat, man jun bey taben chi kan junanin nabebana' ch'a'oj chirij jun wineq, roma wi k'o jun chik wineq ri napon richin k'o niberuq'alajirisaj chawij rat, k'ari' man nawil ta chik ri achike naben pa ruq'a' y xa yak'ixbilan chik chuwech.

⁹Ri oyowal ri achapon rat rik'in ri awachk'uljay, kan rik'in rija' tachojmirisaj-wi, ri yakel ri chiri' pan awánima, man tabeq'alajirisaj kan chire jun chik wineq.

¹⁰Roma rik'in juba' ri xak'axan kan ri tzij awik'in, k'o tzij ri niberuyaka-pe chawij y ronojel ri nikitzijoj ri winaqi', kan k'ixbel chik chawe rat y man jun chik banel chire.

¹¹Ri ch'abel ri kan pa ruq'ijul yebix-wi, kan janila rejqalen. Kan achi'el ruwachibel jun manzana ri banon rik'in q'anapueq y chapon rik'in saqipueq.

¹²Achi'el rejqalen ri ruwi' ixkinaj ri banon rik'in q'anapueq y ronojel ruwech wiqobel ri kan e q'anapueq chuqa', kan keri' rejqalen ri ruch'abel ri aj-na'oj, chuwech ri jun ri kan nuben ri nrak'axaj.

¹³Kan achi'el nich'uch'urisan ri pimilej-tew, ri niqaqa toq nik'ol ri kiwech ri tiko'n, keri' ch'u'ul-ch'u'ul nikina' ri yetaqo-el jun samajel nimey tzij, richin nuk'uaj jun rutzijol, re' samajel re' kan nukuquba-wi kik'u'x ri e rajaw.

¹⁴Achi'el ri sutz' y ri kaq'iq', ri man jun ti job ri kik'amon-pe; e keri' ri winaqi' ri kan nikibananej chi utz kánima y xa man jun bey nikiya' ta ri nikisuj.

¹⁵Wi rat man chi'anin ta yatoyower, kan yatikir naqasaj ruwi' ri royowal ri rey; ri buyul-buyul taq ch'abel xa kan nitikir chirij jun wineq, stape' kan kow achi'el ri baq.

¹⁶Wi rat k'o kab ri nikiya' ri taq chikopi' ri xabewila-pe, kan tatija' k'a; xaxe man k'iy tatej-qa, roma wi xa nik'o ruwi' ri natej, xa nabexa-pe.

¹⁷Kan keri' k'a ri pan ak'aslen, man kan q'ij-q'ij katapon rik'in ri wineq awachk'uljay, roma wi kan jantape' yatapon rik'in, xa xtik'o ruk'u'x awik'in, y xkaretzelaj-pe.

¹⁸Ri wineq xa nok k'a achi'el jun nimalej bajibel, y achi'el espada y achi'el ch'ab, toq xa tz'ukun taq tzij ri yeruyek-q'anej chirij ri rachpochel.

¹⁹Ri wineq ri nukuquba' ruk'u'x rik'in jun q'olonel chupan ri q'ij richin ri ruk'ayewal, xa junan rik'in ri nrajo' nukusaj ri rey ri xa q'ayineq chik, o nrajo' nukusaj ri raqen ri xa rujalk'atin ri'.

²⁰Ri bix richin kikoten, ri niya'ox chire jun wineq ri xa nibison ránima kan achi'el toq jun wineq nuch'il kan rutziaq chirij, y xa janila tew najin, o naxol ri vinagre rik'in ri bicarbonato.

²¹Wi ri wineq ri netzelan awichin, ninum, kan tasuju' ruway richin nutej; y wi ta nichaqi'j ruchi', kan taya' k'a ruya' richin nuqum.

²²Roma rik'in jun utzilej banobel keri', ri netzelan awichin xa xtik'ixbitej-qa; jak'a rat kan xtak'ul rajel-ruk'exel, ri xtuya-pe ri Jehová chawe.

²³Ri kaq'iq' ri nipe kere' pa xaman, kan jantape' k'o job nuk'en-pe; keri' ri wineq, ronojel ri royowal ri man nubij ta rik'in ch'abel, xa ja ri nitzu'un jari' ri niq'alajirisan chi royowal.

²⁴Kan jebel k'a nuben chire ri achin chi stape' rulatz'an-ri' pa jotol chire ri rachoch; ke chuwech ri k'o ta qa pa jay rik'in ri rixjayil, ri xaxe oyowal ri nuben.

²⁵Kan achi'el nuben ri raxya' chi nuch'uch'urisaj ri chaqi'j ruchi' jun ri q'itajineq, keri' chuqa' nuben chire jun wineq, ri nuk'ul utzilej taq rutzijol kichin ri k'a janila nej ek'o-wi.

²⁶Kan achi'el chuqa' jun ralaxbal-ya', ri nitukuk ruwech o ralaxbal-ya', ri xa ya' chuw ri k'o chupan; keri' k'a ri chojmilej wineq, ri xa man kow ta k'o ri ruk'aslen chikiwech ri aj-maki'.

²⁷Kan man utz ta k'a nuben chire jun wineq, chi nutej k'iy kab ri nikiya' ri taq chikopi', keri' chuqa' jun wineq ri nukanoj k'iy ruwaq'ijaj, xa man utz ta.

²⁸Kan achi'el jun tinamit ri xa e wulutajineq-qa ri tz'aq ri sutiyon-rij, kan keri' ri wineq ri xa maneq ruchuq'a' richin nuq'et-ri'.