Read Kaqchikel Pro 26 Bible Online

Pro 26 - Kaqchikel bible

Pro 26

¹Kan man ruk'amon ta chi niqaqa pimilej-tew y xa man ruq'ijul ta, ni chuqa' chi nuben job toq nik'ol kiwech ri tiko'n; keri' jun wineq ri maneq runa'oj, kan man ruk'amon ta chi niya'ox ta ruq'ij koma ri winaqi'.

²Kan achi'el k'a ri ti tz'unun ri nirumum pa kaq'iq', o ri ti buqul-sib ri nisumum niq'ax, xa keri' nuben ri ruk'ayewal, ri xa wineq noyon pa ruwi' jun chik ri xa maneq rumak.

³Ri niq'aton richin ri kiej ja ri ch'ayibel richin, keri' chuqa' ri bur, ja ri ch'ich' ri niya'ox pa ruchi', jari' ri niq'aton richin, y chire ri wineq ri xa maneq runa'oj, ja ri xik'a'y ri nukusex richin nich'ay, jari' ri nipaban richin.

⁴Toq ri wineq ri xa maneq runa'oj, k'o ch'abel ri yerubila' chawe, rat kan man taben chuqa' keri', man xa tibek'ulun-pe chi rat at junan rik'in rija'.

⁵Y toq ri wineq ri' k'o nrajo' nuk'utuj chawe, kan taq'alajirisaj k'a chuwech, roma wi xa man jun yatikir nabij chire, nuch'ob chi rija' xa más runa'oj chawech rat.

⁶Ri wineq ri k'o nuteq rubixik chike ch'aqa' chik winaqi', y xa jun ri maneq runa'oj ri nuteq-el, re' kan achi'el xa ta ja ri raqen ri nuchoy-el; y xa nuya-ri' pa k'ayew.

⁷Achi'el ri wineq ri k'o sikirik chike ri raqen y maneq kuchuq'a'; keri' nuben jun etamabel-tzij ri xa pa ruchi' jun maneq runa'oj nel-wi-pe.

⁸Kan man ruk'amon ta chi nixim ri abej ri niya'ox chupan ri ikeq', keri' chuqa' kan man ruk'amon ta chi ninimirisex ruq'ij jun wineq ri xa maneq runa'oj.

⁹Kan achi'el jun k'ix ri q'atel pa ruq'a' jun q'abarel, keri' ri etamabel tzij ri nel-pe pa ruchi' ri wineq ri xa maneq runa'oj.

¹⁰Ri wineq ri nuya' rusamaj ri xa maneq runa'oj, o nuya' rusamaj ri xa niq'oran pa bey, kan junan rik'in ri wineq ri nuk'aqala' ch'ab xabakuchi.

¹¹Ri wineq ri xa maneq runa'oj, ri nitzolin chik chubanik ri itzel taq banobel, kan junan rik'in ri tz'i' toq nitzolin ri akuchi xxa'a' wi kan, richin niberutija' chik pe ri ruxa'on kan.

¹²Xa más k'a nichojmir na jun wineq ri xa maneq runa'oj ke chuwech jun wineq ri nubij chi k'o na'oj rik'in.

¹³Ri wineq ri janila ruq'oral y man nrajo' ta nibe pa samaj, xa nubij: K'o jun koj ri pa bey, nicha'.

¹⁴Kan achi'el k'a rubanik ri ruxaq ri ruchi-jay, nijaqatej y nitz'apetej, y xaxe chiri' nisutin-wi, keri' k'a rubanik ri wineq q'or, xaxe chiri' pa ruch'at nupiskolila-wi-ri'.

¹⁵Ri wineq ri janila q'or nuju-qa ri ruq'a' chupan ri rulaq; jak'a man nitikir ta chik nuk'uaj ri ruway k'a pa ruchi' roma ri ruq'oral.

¹⁶Ri wineq q'or, kan nuch'ob chuqa' chi ja rija' ri más aj-na'oj, ke chikiwech e wuqu' achi'a' ri kan rik'in na'oj nikik'uluba' ri ruch'abel jun wineq ri k'o nuk'utuj chike.

¹⁷Achi'el jun wineq ri nuchop chi ruxikin jun tz'i', ri niq'ax-el keri'; keri' ri wineq ri nuju-apo-ri' pa jun oyowal y xa man rik'in ta rija' ri oyowal ri'.

¹⁸Achi'el jun wineq ch'ujirineq ri yeruk'aqala' q'aq', y nima'q y kokoj taq ch'ab ri kik'amon-pe kamik,

¹⁹keri' ri wineq ri nuq'ol ri rachibil y nubij chire chi xa netz'an rik'in.

²⁰Toq ri si' xa nik'is-qa, ri q'aq' xa nichup-qa; keri' nibanatej toq e maneq ye'ukusan y ye'elesan tzij, ri oyowal xa nik'is-qa.

²¹Toq nik'atzin racheq-q'aq' nukusex carbón, y toq nik'atzin ruxaq q'aq' nukusex si'; keri' ri wineq ri k'iy ch'abel ye'el pa ruchi' richin nutzuk-q'anej royowal.

²²Ri ruch'abel jun wineq ri nukusan y nelesan tzij, kan ki-ki' nak'axatej, achi'el jun munil; y ri ch'abel ri' kan napon k'a chupan ri ránima ri jun chik wineq.

²³Kan achi'el jun bojo'y ri banon rik'in ulew y su'un saqipueq chirij, xa keri' ri wineq ri ruyon jebelej taq ch'abel ri yerubij y ri pa ránima xa ruyon itzel k'o.

²⁴Ri wineq ri xa nretzelaj jun chik, kan jebel nrewaj rik'in ri jebel taq ch'abel ri yerubila' chire, jak'a ri pa ránima, xa k'o ta nrajo' chi niqaqa pa ruq'a'.

²⁵Y stape' kan janila jebel ok ri tzij ri nubij chawe, rat man tanimaj, roma ri etzelanik ri k'o rik'in ri wineq ri' kan runojisan ri ránima.

²⁶Ka'i' rupalej nuben, roma stape' kan man nuk'ut ta ri etzelal ri k'o pa ránima; jak'a ri etzelal ri xtuben chawe, jari' ri xtiq'alajirisan chikiwech ri winaqi'.

²⁷Kan qitzij k'a ri nubij ri tzij: Wi nak'ot jun jul richin pikbel, xa ja rat ri xkatzaq-qa chupan nabey; y ri wineq ri nuk'ot ruxe' jun abej, xa xtibepiskolitej-pe chirij.

²⁸Ri wineq ri nitz'ukun-tzij man niqa' ta chuwech ri qitzij, ri wineq ri nubananej chi nich'on rik'in ch'uch'uj taq ch'abel, xa nuk'en-pe wululen.