Read Kaqchikel Pro 28 Bible Online

Pro 28 - Kaqchikel bible

Pro 28

¹Ri wineq itzel xa nixibiyaj y jantape' tzeqeliben nuna', jak'a ri chojmilej wineq, kan achi'el jun koj ri xa man jun xibinri'il chuwech.

²Xa roma k'a ri etzelal ri ek'o pa jun ruwach'ulew, toq e k'iy q'atoy-tzij ri yek'oje'; jak'a ri wineq ri k'o utzilej ruch'obonik y k'o retamabal, kan nitikir-wi yeruk'uaj ri winaqi' rik'in ruchojmilal.

³Ri achin ri xa man jun ok k'o rik'in y kan yerutz'ila' ri winaqi' e rachmeba'i', kan junan k'a rik'in ri job ri nujok-el ronojel y man jun chik tiko'n ri nuya' kan.

⁴Ri winaqi' ri yeya'on kiq'ij ri e banoy richin etzelal, xa ja ri kiya'on chik kan rubanik ri pixa' richin ri ruchojmilal; jak'a ri kan kitaqen ri pixa' richin ri ruchojmilal, kan man utz ta yekitz'et y nikipaba-ki' chikiwech.

⁵Ri winaqi' ri nikiyoj rubanik ronojel, kan man niq'ax ta chikiwech ri rubanik ri ruchojmilal; jak'a ri wineq, ri jantape' nikikanoj ri Jehová, kan niq'ax-wi chikiwech ri chojmilal ri'.

⁶Kan más wi utz jun wineq ri xa man jun ok k'o rik'in y kan tz'aqet rik'in ri rubanobal, ke chuwech jun wineq ri kan beyom y ronojel ri yeruben xa ruyon xotoxeq taq banobel.

⁷Ri kan nuben ri nubij ri rupixa' ri Dios, kan q'alaj chi jun alk'ualaxel aj-na'oj, jak'a ri alk'ualaxel ri xa yerachibilaj ri xaxe wa'in nikiben, xa nuya' ruk'ix ri rutata'.

⁸Ri kan nuben-q'anej rubeyomel, roma ri ral ri ruméro y roma ri nik'o ruwi' nuk'utuj chike ri yeqajo rik'in; rija' kan man retaman ta chi ri beyomel ri' xa pa ruq'a' jun chik ri kan nujoyowaj kiwech ri meba'i' ri nibek'oje-wi kan.

⁹Ri wineq ri xa pa rubanik nuben chi man nrak'axaj ta ri rupixa' ri Dios, toq nich'on-q'anej rik'in ri Dios, kan man xtak'axex ta ri ruch'owen.

¹⁰Ri nibanon chire ri chojmilej wineq richin chi nuya' kan ri rubeyal ri ruk'aslen, xa xtiqaqa pa pikbel; jak'a ri winaqi' ri kan jantape' qitzij ri nikibij, kan xtikik'ul k'a ri kikoten.

¹¹Ri wineq beyom kan nuch'ob-qa chi rija' kan k'o runa'oj; jak'a ri wineq ri xa man jun ok ri k'o rik'in, ri kan nich'obon jebel, nrak'axaj na jebel wi kan keri' o ni.

¹²Toq ri winaqi' e choj nik'oje-q'anej kik'ojlen, kan k'o nimaq'ij chikiwech ri winaqi'; jak'a toq xa ja ri winaqi' e itzel ri nik'oje' kik'ojlen, ri winaqi' xa nibekewaj-ki'.

¹³Ri man yeruq'alajirisaj ta ri itzel taq rubanobal ri yeruben, xa ronojel itzel ye'el chuwech; jak'a ri yeruq'alajirisaj y nuya' kan rubanik, kan xtril kuyubel rumak.

¹⁴Kan jebel k'a ruwa-ruq'ij ri wineq, ri kan jantape' k'o rukiy ri Dios chuwech; jak'a ri kan rukowirisan ránima chuwech ri Dios, xa xtitzaq pa mak.

¹⁵Kan achi'el k'a jun koj ri nureq ruchi' o achi'el nuben jun oso ri niken roma wayjal; kan keri' rubanikil ri q'atoy-tzij ri banoy richin etzelal, y niq'aton-tzij pa kiwi' meba' taq winaqi'.

¹⁶Jun q'atoy-tzij ri xa man utz ta runojibal, kan k'iy k'a ri nutz'oq chuwi-kiq'a' ri winaqi'; jak'a ri q'atoy-tzij ri kan nretzelaj ri itzel taq ch'akoj, kan k'iy k'a q'ij ri xtiq'aton-tzij.

¹⁷Ri wineq ri k'o kamik rubanon chikikojol ri ruwinaq, stape' nanimajilan y nrewala-ri' chupan chijun ruk'aslen keri' niken-el; kan man jun k'a xtiq'aton richin.

¹⁸Ri wineq ri kan choj nibiyin chupan ri ruk'aslen, kan xtril k'a rukolotajik; jak'a ri wineq banoy etzelal ri nisolma'y chukanoxik rubey, xa xtitzaq chupan jun chike ri rubey.

¹⁹Ri wineq ri kan nutik ruwech ri rulew, kan k'o-wi ri xtrelesaj y jebel xtiwa'; jak'a ri wineq ri jantape' nuxlan, y yerutzeqelibej ri q'ori' xa rik'in meba'il xtik'ase'.

²⁰Jun achin ri kan nuben ri nrajo' ri Dios, kan xtiq'ej k'a pe urtisanik pa ruwi', jak'a ri wineq ri anineq nibeyomer-q'anej, kan xtipe k'a itzel ch'obonik chirij.

²¹Kan man utz ta k'a chire ri wineq chi xaxe ri utz nutz'et, jari' ri nuto'; chuqa' xaxe roma nurayij-apo ruway ri jun chik nimakun.

²²Ri wineq ri janila nirayin, kan anineq nrajo' nibeyomer-q'anej; y man jun retaman chi xa meba'il ri peteneq chirij.

²³Ri wineq ri nibin chire jun chik chi tuchojmirisaj ri rubanobal, xtimatioxix chire toq k'iy yan q'ij tiq'ax, kan janila xtimatioxix chire, más ke chuwech xa ta xunimirisaj ruq'ij.

²⁴Ri alk'ualaxel ri k'o nreleq'aj chire ri rutata' y neleq' chuqa' rik'in ri rute', y k'ari' nubij chi man mak ta ri nuben, ri alk'ualaxel ri' xa kachibil ri eleq'oma', ri ye'eleq' pa taq bey ri yebe juk'an chik tinamit.

²⁵Ri wineq ri kan janila rayinik k'o rik'in richin nich'akon, xa jun yakol oyowal; jak'a ri wineq ri kan nukuquba' ruk'u'x rik'in ri Jehová, ronojel utz nel chuwech y nibe pa jotol.

²⁶Ri wineq kan nuk'ut k'a chi man jun ok retaman, toq ruyon rija' nuben chi k'o ruq'ij; jak'a ri wineq ri kan k'o-wi na'oj rik'in, kan man niqaqa ta chupan ri na'oj ri'.

²⁷Kan man jun k'a ri xtibek'atzin-pe chire ri wineq, toq kan k'o ri nuya' chike ri winaqi' ri man jun k'o kik'in; jak'a ri wineq ri nim nuna-ri' y xa man yeruto' ta, k'iy ruk'ayewal ri xtiqaqa pa ruwi'.

²⁸Toq kan ja ri winaqi' e itzel ri nik'oje-q'anej kik'ojlen, konojel ri ch'aqa' chik winaqi' xa nikewaj-ki'; jak'a toq yeken-el ri winaqi' ri e itzel, jari' toq ri utzilej taq winaqi' kan chi'anin yek'iyer-q'anej.