Read Kaqchikel Pro 29 Bible Online

Pro 29 - Kaqchikel bible

Pro 29

¹Ri wineq banoy richin etzelal, ri kan man nuqasaj ta ri', kan pa jun ti ramaj xtiya'ox-pe ri kamik pa ruwi' y man jun chik ri xtikolon richin.

²Toq kan ja ri winaqi' e utz ri nik'oje-q'anej kik'ojlen richin yeq'aton-tzij, ri winaqi' yekikot, jak'a toq xa ja ri winaqi' e itzel ri yeq'aton-tzij pa kiwi', konojel ri winaqi' nikitej poqon.

³Ri alk'ualaxel ri kan k'o rejqalen ri na'oj chuwech, kan jun kikoten chire ri rutata', jak'a ri xa man ninojin ta y nibe ránima chikij ri ixoqi' ri man utz ta kik'aslen, xa niberuk'isa' kan ri rubeyomel kik'in.

⁴Ri rey xaxe rik'in ri ruchojmilal nitikir nuben chike ri ruwinaq chi utz yek'oje', jak'a ri rey ri xa k'iy rubanik nuben richin numol méro pa kiwi', xa xkeruk'uaj pa wululen ri ruwinaq.

⁵Ri wineq ri kan janila nunimirisaj ruq'ij jun rachibil; xa pikbel ri nuya' pa rubey, richin chi nibetzaq.

⁶Chire ri wineq itzel, ri rumak kan jun pikbel ri nichapo richin; jak'a ri wineq utz, kan nik'ases ri ránima y nikikot chupan ri ruk'aslen.

⁷Ri wineq ri kan utz runa'oj, kan k'o rayibel rik'in chi yeruto' ri winaqi' ri man jun ok k'o kik'in; jak'a ri wineq ri xa itzel, man retaman ta wi ri winaqi' k'o nik'atzin chike.

⁸Ri nibanon chike ri winaqi' chi man jun ok kiq'ij, nuben chi niyakatej koyowal ri winaqi' richin jun tinamit; jak'a ri wineq aj-na'oj, nitikir nuben chi niqaqa ruwi' ri koyowal ri winaqi'.

⁹Wi ta jun wineq aj-na'oj, nuk'uaj jun wineq ri xa maneq runa'oj, chuwech ri q'atoy-tzij; xa man jun xtuch'ek, roma ri maneq runa'oj xa xtipe royowal chire o xtitze'en chirij.

¹⁰Ri winaqi' e kamisanela' kan itzel nikina' chike ri kan tz'aqet ri kik'aslen, kan nikikanoj rubanik nikiben richin yekikamisaj ri choj kibanobal.

¹¹Ri wineq ri maneq runa'oj, toq k'o royowal, kan jumul niberuq'alajirisaj-pe; jak'a ri wineq ri k'o runa'oj kan nuq'et-ri'.

¹²Ri tata'al ri kan jebel nunimaj-qa ri tz'ukun taq tzij ri yebix chire; xa yeruyoj ri rusamajela', y nuben chike chi xke'ok tz'ukuy taq tzij.

¹³Ri wineq ri kan man jun ok k'o rik'in y ri wineq ri nibanon chire chi nutej poqon, kan e junan; roma ri Dios chi e ka'i' ruya'on-pe runaq' taq kiwech, richin chi yetzu'un.

¹⁴Ri rey ri nuq'et-tzij rik'in ronojel ruch'ajch'ojil, pa kiwi' ri winaqi' ri maneq ok k'o kik'in, kan man jun xtisilon-el richin, ri chiri' pa ruk'ojlen.

¹⁵Toq nukusex xik'a'y y nukusex ch'olinik chirij jun ak'ual, nuben chire chi nik'oje-q'anej runa'oj; jak'a ri alk'ualaxel ri janila niloq'oq'ex, xa xtuya' ruk'ix ri rute'.

¹⁶Toq yek'iyer-q'anej ri ebanoy etzelal, ri etzelal kan nik'iy y nutaluj-ri', y ja rije' ri xkekamiyaj el nabey, chikiwech ri winaqi' ri utz kik'aslen.

¹⁷Toq ri awalk'ual ala' man nuben ta ri utz, tach'eya', richin chi ri chawech-apo rik'in uxlanen xkak'ase'; y re' kan xtuk'en k'a pe kikoten chawe chupan ri ak'aslen.

¹⁸Toq kan e maneq achi'a' yech'abalin ri nuq'alajirisaj ri Dios, ri winaqi' richin jun tinamit xa maneq rubeyal ri kik'aslen; jak'a ri wineq ri kan nutaqej ri rupixa' ri Dios, kan jebel k'a ruwa-ruq'ij.

¹⁹Ri loq'on samajel, richin chi niniman tzij, man xaxe ta ch'abel ri nik'atzin chi nibix chire, roma stape' kan niq'ax chuwech, xa man xtuben ta ri nibix chire.

²⁰Rat atz'eton jun wineq, ri chi'anin yerubila-q'anej tzij ri xa man e ruch'obon ta; achi'el xa más nich'obon ri maneq runa'oj, ke chuwech ri jun wineq ri'.

²¹Ri nibanon chi kan janila nuloq'oq'ej jun loq'on samajel toq k'a ch'uti'n ok; napon jun q'ij, toq ri samajel ri' xa xtiyakatej y xtich'akon chirij ri rajaw.

²²Ri wineq ri kan niyakatej royowal, xa nuyek oyowal chikikojol ri winaqi'; ri kan janila kow taq ch'abel ri yerubila' roma royowal jantape' nimakun.

²³Ri wineq ri nunimirisaj-ri', jari' ri xtibanon chire chi nibe pa xulan, jak'a ri wineq ri xa maneq ok ruq'ij nuna' ri pa ránima, jari' ri xtibanon chire chi xtinimirisex ruq'ij.

²⁴Ri wineq ri xa junan ruwech rik'in ri eleq'om, xa nretzelaj-qa ri ruk'aslen, roma kan bin chire chi tisujun y man nisujun ta.

²⁵Roma ri' ri xibinri'il ri nikiya' ri achi'a', xa jun tzaqibel richin ri wineq; jak'a ri wineq ri kan nukuquba' ruk'u'x rik'in ri Jehová, kan k'o uxlanen, pa ránima.

²⁶E janila winaqi' ri nikiben chi utz yetz'et koma ri ek'o pa kiwi', richin chi man jun nikik'uluwachij, y man noqaqa ta chikik'u'x chi ri xtiq'aton-tzij pa kiwi' konojel ri winaqi', ja ri Jehová.

²⁷Ri winaqi' ri kan utz ri kik'aslen, kan man nikajo' ta yekitz'et ri winaqi' e itzel, y ri e itzel kan man nikajo' ta yekitz'et ri kan tz'aqet ri kik'aslen.