Read Kaqchikel Pro 3 Bible Online

Pro 3 - Kaqchikel bible

Pro 3

¹Rat walk'ual, man k'a tamestaj ri tijonik ri nuya'on chawe, xa kan tayaka' pan awánima ri nuchilaben chawe chi naben,

²roma re' kan xtikiben k'a chawe chi kan k'iy q'ij ri xtatz'et-el, k'iy juna' ak'aslen ri xtaq'axaj-el y xtuk'en chuqa' pe uxlanen chawe.

³Ri joyowanik y ri qitzij kan awichin tabana' chike y man ke'amestaj kan; kan tabana' chi jebel ta yeq'alajin ri pan ak'aslen, achi'el niq'alajin jun ichinaj ri tzeqel chuwa-ak'u'x; kan tabana' k'a chi e tz'ibatel ta ri pan awánima.

⁴Wi xtaben k'a ronojel re', kan xtawil k'a utzil y jebel ch'owen ri xtiban chawij, kan xtawil k'a re' rik'in ri Dios y kik'in ri winaqi'.

⁵Kan rik'in k'a ronojel awánima takuquba' ak'u'x rik'in ri Jehová, y man takuquba-qa ak'u'x awik'in rat roma ri awetamabal.

⁶Xa kan ja rija' ri taya' pa nabey, chupan ronojel ri k'o chi naben, keri' ja rija' ri nuk'uan abey chupan ri ak'aslen.

⁷Man jun bey tatzu-qa-awi' chi kan k'o-wi ana'oj, xa tik'oje' rukiy ri Dios chawech y xtajech'ej-awi' chuwech ri etzelal.

⁸Y re' kan xtuk'en k'a pe raxnaqil chire ri ach'akul, y chuqa' kan xtuya' ruchuq'a' ri abaqil.

⁹Rat kan taya' k'a ruq'ij ri Jehová rik'in ri abeyomel, kan taya' k'a ruq'ij rija' rik'in ri nabey taq ruwech ri atiko'n

¹⁰Rik'in k'a ri xtaben keri', ri ak'ujay kan xkenoj y xkepulin-pe, y keri' chuqa' ri ruk'ojelibal ri k'ak'a' a-vino kan xkenoj y xkepulin-el.

¹¹Rix walk'ual alaboni', ri ch'olinik ri nuya' ri Jehová chiwe, man tiben chi xa man nik'atzin ta chiwe, man itzel tina' toq ri Jehová rik'in ruk'ayewal yixruchojmirisaj-wi.

¹²Roma ri Jehová kan keri' nuben chike ri yerajo'; achi'el jun tata'aj toq nuch'olij ri ralk'ual ri janila nrajo'.

¹³Roma ri' kan jebel ruwa-ruq'ij ri wineq ri kan niberila-pe ri na'oj. Jebel ruwa-ruq'ij ri wineq ri kan nril-q'anej ri jebel ch'obonik.

¹⁴Re' kan más jebel ke chuwech ri saqipueq, jare' ri beyomel más nim, ke chuwech ri q'anapueq.

¹⁵Ri na'oj kan más wi rejqalen ke chikiwech ri jebelej taq abej, kan más wi rejqalen ke chuwech ronojel ri k'o rik'in ri wineq, ri kan k'o janila rajel chuwech rija'.

¹⁶Ri na'oj achi'el xa ta k'o ruq'a' y ri pa rijkiq'a' ruk'amon-pe k'aslen, y ri pa rajxokon ruk'amon-pe beyomel y k'ojlemal.

¹⁷Ri na'oj kan nuben-wi k'a chire ri k'aslen chi kan k'o ruki'il, y ronojel bey ri akuchi yeruk'uaj-wi ri winaqi' kan k'o-wi uxlanen.

¹⁸Ri na'oj kan achi'el k'a jun che' ri kan nuya' k'aslen chire ri nikanon richin, y xabachike k'a wineq ri kan nuben richin chire, kan jebel k'a ruwa-ruq'ij.

¹⁹Kan ja wi ri na'oj ri xukusaj ri Jehová richin xuch'okoba' re ruwach'ulew, y ja ri etamabel ri xukusaj richin xunuk' jebel ri kaj.

²⁰Rik'in ri etamabel, ri Jehová xuben chi xch'aratej ri palou, y ri ya' ri k'o chikaj chupan ri sutz' kan niqaqa-pe toq niqaqa-pe ri raxq'ab.

²¹Rix walk'ual alaboni', kan jantape' k'a tik'oje' ri na'oj y ri utzilej ch'obonik iwik'in, kan man tiya' q'ij richin chi nisach-el chiwech.

²²Roma wi re' kan xkek'oje' iwik'in, kan xtuya' ik'aslen, kan xke'ok wiqobel richin ruwa taq ik'u'x, achi'el xa ta e ichinaj.

²³Y jari' ri xtibanon chiwe chi man jun xtik'uluwachij chupan ri ibey, y chuqa' xtuben chiwe chi man xtipajk'ila' ta iwaqen.

²⁴Jari' chuqa' xtibanon chiwe chi toq yixkotz'e-qa, man xtixibij ta iwi', y chuqa' toq yixkotz'e-qa, kan jebel xkixwer ri junaq'a'.

²⁵Kan man xtuya' ta xibinri'il chiwe toq k'o ri yek'uluwachitej, chuqa' kan man xtuya' ta xibinri'il chiwe, roma ri aj-maki' nipe wululen chikij.

²⁶Kan man k'a xtixibij ta iwi', roma kan xtina' chi jikil ixk'o rik'in ri Jehová, y chuqa' kan xtuchajij ri iwaqen richin chi man tiqaqa pa pikbel.

²⁷Man tiben chi man yixtikir ta niben jun utzil chire jun iwachpochel, toq xa kan pan iq'a' k'o-wi richin chi niben.

²⁸Man jun bey tibij chire jun iwachk'uljay, ri k'o nik'atzin chire, chi tipe k'a ri jun chik q'ij, toq xa k'o iwik'in ri nik'atzin chire y yixtikir niya-el chire ri q'ij ri'.

²⁹Man tipe itzel taq ch'obonik iwik'in, chirij ri iwachk'uljay, roma rija' kan kuqul ruk'u'x chi k'o-apo chi'inaqaj rix.

³⁰Man tiyek ch'a'oj chirij jun wineq ri xa man jun achike roma, toq xa kan man jun achike ta ch'a'oj ri rubanon chiwe.

³¹Man tipe rayibel iwik'in chi yixok ta achi'el jun wineq banoy oyowal, ni man tirayij nitzeqelibej ri rubey ri wineq ri'.

³²Ri Jehová kan man niqa' ta k'a chuwech ri wineq ri man ja ta ri yeruben, jak'a kan junan ruwech kik'in ri choj kik'aslen.

³³Ri Jehová kan ruyon k'a ri man utz ta ri nuteq pa ruwi' ri rachoch ri aj-mak, jak'a pa ruwi' ri rachoch ri wineq ri choj ruk'aslen kan ruyon k'a urtisanik ri nuteq-pe.

³⁴Ri Jehová kan yeruyojobej ri winaqi' ri yeyojoben, jak'a ri winaqi' ri kiqasan-ki', kan xtuya' k'a ri rutzil chike.

³⁵Ri winaqi' aj-na'oj kan xtikik'ul k'a kiq'ij, jak'a ri winaqi' ri xa maneq kina'oj, xa k'ix ri xtikik'ul.