Read Kaqchikel Pro 5 Bible Online

Pro 5 - Kaqchikel bible

Pro 5

¹Rix walk'ual alaboni', kan tiwak'axaj k'a re na'oj wichin yin, re ninya' chiwe; kan tilukuba-iwi' y ri ixikin kan trak'axaj k'a jebel toq ninq'alajirisaj ri nuna'oj.

²Y keri' ri na'oj kan xkixruq'et k'a richin chi man ye'ibila' tzij ri ch'obon man ch'obon, y chuqa' ri na'oj kan xtuchajij jebel ri ichi',

³Ri ixoq itzel ruk'aslen kan nujaluj ri ruch'abel y ki-ki' nuben chire, achi'el ri kab ri nikiya' ri taq chikopi', kan buyul-buyul nuben chire ri ruch'abel, achi'el xa ta ruya'on aceite chikij.

⁴Jak'a ri akuchi yaruk'uaj-wi ri ki' taq ruch'abel ri ixoq ri', xa k'ey-k'ey achi'el xaqixaq, y ri buyul taq ruch'abel, xa xkesokon achi'el nisokon ri espada ri ka'i' rey k'o.

⁵Roma ri raqen rija' xa choj beneq pa xulan k'a pa kamik y ri ruxaka'l xa choj ruk'uan, richin chi napon k'a pa jul richin kamineq.

⁶Ri bey ri ruk'uan ri ixoq ri' xa man nakuquba' ta ak'u'x rik'in, y rija' xa man retaman ta chuqa', ni man nuchop ta juba ri bey richin k'aslen.

⁷Wakami k'a, rix walk'ual alaboni', kan ja yin k'a ri kiniwak'axaj, kan man k'a tijech'ej-el-iwi' chire ri ch'abel ri ninbij yin.

⁸Roma ri' ninbij k'a chiwe chi man jun bey kixk'oje-apo naqaj chire ri ixoq ri', y chuqa' man jun bey kixk'oje-apo naqaj chire ri ruchi' rachoch ri ixoq ri'.

⁹Man xa rik'in jun ixoq keri' tibek'isa' kan ri iwuchuq'a' man xa tibeya' kan ri utzilej taq ijuna' pa ruq'a' jun itzel ixoq.

¹⁰Man xa pa kiq'a' ch'aqa' chik winaqi' tibek'oje-wi kan ri ibeyomel; man xa pa rachoch jun chik wineq tibek'oje-wi kan ronojel ri ich'akon roma ri isamaj.

¹¹Richin chi pa ruk'isibel chire ri ik'aslen man tipe bis chiwe roma ri niq'axaj, toq ri ich'akul y ri iti'ojil xa xk'is-xk'is yan qa.

¹²Richin man xkepe ta ri ch'obonik iwik'in y xtibij ta: ¿Achike roma toq xa xqetzelaj ri ch'olinik ri xban chiqe? ¿Achike roma toq xqach'ob pa taq qánima chi xqixowaj ri tijonik ri xya'ox chiqe?

¹³¿Achike roma toq man xeqak'axaj ta ri qatijonela'? ¿Achike roma toq man xqaya' ta qaxikin chike ri xetijon qichin?

¹⁴Xa roma ri' jubama xojbek'is pa ruk'ayewal ri chiri' chikiwech y chikikojol ri winaqi', man xkixcha' ta.

¹⁵Rix achi'a' kan kik'in k'a ri iwixjayilal kixk'oje-wi, man tirayij ruwech jun chik ixoq, roma wi kan kik'in ri iwixjayilal yixk'oje-wi, kan junan k'a rik'in ri niqum ta iya' chupan ri alaxibel-ya' iwichin rix.

¹⁶Rix achi'a' man k'a tiya' q'ij chi ri alaxibel-ya' ri k'o iwik'in choj nibiyin-el pa bey, man tichoxij-el choj keri' pa taq bey.

¹⁷Kan tichajij k'a jebel ri alaxibel-ya' ri' y man tiya' q'ij chi ch'aqa' chik ixoqi' ye'ilon chire ri ya' ri'.

¹⁸Kan kixkikot k'a kik'in ri iwixjayilal, kan kixkikot k'a kik'in rije', ri kan k'a e xtani' na toq xixk'ule' kik'in.

¹⁹Ri iwixjayilal rix, xa kan e junan k'a kik'in ri taq masati', e jebejoj ok y janila ye'ajowan, xaxe ta ri ruwa taq kik'u'x rije' ri noqaqa chi'ik'u'x y ri nirayij y kan ta ix qajineq pa ruq'a' ri ajowabel kichin rije'.

²⁰Rat walk'ual xa maneq achike roma chi yaqaqa pa ruq'a' jun k'ulan ixoq ri yerukanola' achi'a', maneq achike roma chi xa xerupan rixjayil jun chik achin ri naq'etej.

²¹Ri rubey ruk'aslen ri achin kan pa ruwech k'a ri Jehová k'o-wi, rija' kan nitikir-wi nunik'oj chikijujunal ri ruxaka'l ri yeruya' ri achin pa ruk'aslen.

²²Ri achin aj-mak, xa ja ri itzel rubanobal ri nibanon chire chi man nitikir ta nel-pe chupan ri mak ri', xa ruyon k'a rija' nusuq' kan ri' chupan.

²³Rija' xa xtapon pa kamik roma xa man xuq'et ta ri', xa ja ri itzel bey ri xuk'uaj roma xa ch'obon man ch'obon ri xeruben.