Read Kaqchikel Pro 7 Bible Online

Pro 7 - Kaqchikel bible

Pro 7

¹Rix walk'ual alaboni', kan tibana' k'a ri ninbij chiwe yin y kan kek'oje' ri pa taq iwánima, ronojel ri nupixa'.

²Kan tibana' wi k'a ri ninbij yin y re' xtuben chiwe chi xtik'oje' ik'aslen, kan tiloq'oq'ej k'a ri tijonik ri nuya'on chiwe, achi'el niloq'oq'ej ri runaq' taq iwech.

³Ri nutijonik kan ke'iximila' ri chuwi' taq iq'a' y kan ke'itz'ibala' chuqa' ri pa taq iwánima.

⁴Kan tiya' q'ij chi ri na'oj nok ta achi'el iwana', chi ri utzilej ch'obonik nok ta achi'el jun chike ri iwach'alal.

⁵Y re', kan xtuben k'a chiwe chi yixrukol chuwech ri k'ulan ixoq ri yerukanola' achi'a', kan yixrukol chuqa' chuwech ri ixoq ri jebel ok taq ch'abel ri yerubij chiwe.

⁶K'o k'a jun q'ij toq yin yitz'u'un-pe chukojol ri kokoj tzubel richin ri nu-ventana.

⁷Xentz'et k'a pe ri k'a e k'ajola' na, y chikikojol rije' jun ri xa kan k'a man jani k'o ta runa'oj.

⁸Nutzuliben k'a chi ri ala' ri' niq'ax ri pa krusin-bey, chunaqaj ri akuchi k'o-wi ri rachoch jun k'ulan ixoq.

⁹Ri ramaj ri' xqaqa yan k'a ri q'ij, kan nimoymot chik; jari' nok yan pe ri aq'a' y niq'equmer-qa.

¹⁰Jari' toq ri ixoq ri' xbek'ulun-pe chuwech ri ala', ruwiqon-ri' achi'el jun ixoq itzel ruk'aslen, y kan nowineq chubanik.

¹¹Ri ixoq ri' kan niq'alajin k'a chi janila najowan y jebel rubanik richin nich'on. Kan man nukoch' ta nik'oje' pa jay, y xaxe ta pa bey nrajo' nik'oje-wi.

¹²Roma ri' toq man k'o ta pa bey, xa k'o chiri' akuchi nikimol-wi-ki' ri winaqi', kan yeroyobej k'a ri achi'a' ri pa taq krusin-bey.

¹³Y keri' ri ixoq ri' kan xaxe k'a xutz'et ri ala' ri', jari' xuchop y xutz'ubaj ruchi', y kan man juba' ruk'ix, xuchop k'a rubixik chire:

¹⁴Re wakami, yin kan k'o na k'a chi xinya' ri sipanik richin chi xjunamatej-nuwech rik'in ri Dios, kan xinben yan k'a ronojel ri nusujun chire chi ninben,

¹⁵roma ri' kan xinel k'a pe richin chi nonya' jun oyonik chawe, nurayiben chi yatintz'et, y matiox chi wakami xatinwil.

¹⁶Jari' nuchojmirisan chik kan ri warabel, y ri pa ruwi' nuripiban k'a kan jun k'ul ri banon rik'in tzieq ri nipe pan Egipto.

¹⁷Kan e nuyalon chik k'a kan jubulej taq aq'om chirij, jubulej taq aq'om ri e banon rik'in mirra, áloe y canela.

¹⁸Jo' k'a wik'in, kak'oje' kan wik'in re wakami, tiqak'owisaj k'a qak'u'x chi junaq'a', y kan tiqaq'etela' y tiqatz'ubala' qachi' richin yojkikot.

¹⁹Roma ri wachijil xa maneq pa jay re wakami, rija' nej beneq-wi y man jani nitzolej-pe.

²⁰Rija' kan jun costal saqipueq k'a ri ruk'uan-el y k'a ja toq xtinoj na ri ik', k'a jari' toq xtok'ulun chik pa jay, nicha' k'a ri ixoq.

²¹Y rik'in k'a ri ch'abel ri' xch'on rik'in ri ala' richin chi xuch'ek, rik'in k'a ri buyul taq ruch'abel ri yerubij ri ixoq ri' xuben chire chi xunimaj rutzij.

²²Y ri ala' kan xtzeqe' k'a el chirij, man retaman ta ri xtuk'uluwachij, xa achi'el k'a jun bóyix ri yuqen-el richin chi nuk'uex k'a pa kamik, o xa achi'el jun ri maneq runa'oj ri choj niberuq'ataba' kan ri'.

²³Y ri' nunabej k'a, toq ri rusase' xkuyu yan roma jun ch'ab; nuben k'a achi'el nuben jun tz'ikin ri choj niberuya-ri' pa pikbel, y man retaman ta chi chiri' niberujacha' kan ri ruk'aslen.

²⁴Wakami k'a, rix walk'ual alaboni' kan kiniwak'axaj k'a; kan tiya' k'a ixikin chire ronojel ri nubin-qa chiwe.

²⁵Kan man tiya' q'ij chire ri iwánima chi nitzeqelibej ri bey ri', kan man k'a tik'uaj jun bey keri' y jantape' ix sachineq,

²⁶roma ri ixoq ri' kan e k'iy k'a achi'a' ri e rusokon, ri xuben chike chi xetzaq, kan janila k'a e k'iy ri e rukamisan.

²⁷Ri bey k'a ri napon pa rachoch rija', xa bey ri nuk'uan pa q'aq', xa choj yixruxuluba-qa k'a akuchi k'o-wi ri jay richin ri kamik.