Read Kaqchikel Pro 8 Bible Online

Pro 8 - Kaqchikel bible

Pro 8

¹Ri na'oj kan nisik'in-wi k'a richin nusuj ri'; ri jebel ch'obonik kan rik'in k'a uchuq'a' ri noyon.

²Rija' kan nipa'e-wi k'a ri pa taq jotol richin nuq'alajirisaj-ri', kan nipa'e-wi k'a ri pa taq cruzin-bey richin nuk'ut-ri'.

³Y chuqa' kan nik'oje' ri chikinaqaj ri okibel, ri chiri' pa taq okibel kichin ri tinamit, ri akuchi ye'el-ye'ok-wi ri winaqi'; ja ri chiri' k'a nuq'alajirisaj-ri' ri na'oj.

⁴Rija' kan kere' k'a ruq'alajirisaxik nuben: Yin kan yixinwoyoj k'a chi'iwonojel rix winaqi', ri nuch'abel yin kan yixroyoj rix ri ix rijatzul achin.

⁵Rix ri man k'iy ta iwetaman, kan tiwetamaj chi pa rubeyal niben rik'in ronojel, rix ri man k'iy ta etamabel k'o iwik'in, kan tiwetamaj k'a yixnojin jebel.

⁶Kan kiniwak'axaj k'a, roma ri xkenbij chiwe kan k'o-wi kejqalen, tiwak'axaj ri ch'abel ri xkerubij ri nuchi', roma kan ruyon pa ruchojmilal.

⁷Ri rusamaj ri nuchi' xaxe richin xkerubij ri qitzij; yin kan man niqa' ta chinuwech yenbij tz'ukun taq tzij.

⁸Ronojel k'a ri ch'abel ri ninbij yin kan pa rubeyal k'a, man yenbila' ta k'ixbel taq ch'abel, ni q'olonel taq ch'abel.

⁹Ronojel re' kan jebel-wi e q'alaj chikiwech ri winaqi' ri kan yech'obon, y chuqa' kan e choj chikiwech ri kan k'o ketamabal.

¹⁰Kan más utz chi ja ri nutijonik yin ri nik'ul, y man ja ta ri saqipueq; más utz chi ja ri wetamabal yin ri nicha' kan y man ja ta ri q'anapueq.

¹¹Ri na'oj kan más rejqalen chikiwech ri wiqobel ri e banon rik'in q'anapueq y saqipueq, y ronojel ri rayixel man tikirel ta chuqa' chi nijunamex rik'in ri na'oj.

¹²Yin, ri na'oj, kan junan k'a nuwech rik'in ri etamabel, y kan yitikir ninbij chi yin in rachibil ri ch'obonik ri kan pa rubeyal.

¹³Toq kan k'o rukiy ri Dios chuwech ri wineq, kan nrixowaj ri man utz ta; achi'el yin kan ninwixowaj ri nim nuna-ri', ri ruyon nuya-qa ruq'ij, ri ruyon itzel taq banobel ri yerubanala', y ri ruyon tz'ukun taq tzij ri yeruben.

¹⁴Kan pa nuq'a' k'a yin, ri na'oj, k'o-wi ri ch'obonik y ri ruchojmilal, kan pa nuq'a' k'a yin ri etamabel k'o-wi ri uchuq'a'.

¹⁵Kan woma k'a yin ri na'oj toq ri rey yetikir yekik'uaj ri kiwinaq, y woma chuqa' yin toq ri q'atoy taq tzij yetikir yekibanala' utzilej taq pixa'.

¹⁶Y kan woma chuqa' yin toq ri e tata'al pa taq ruwach'ulew yetikir yeq'aton-tzij, woma k'a yin, toq ri winaqi' k'o kik'ojlen, yeq'aton-tzij chuwech re ruwach'ulew.

¹⁷Yin yenwajo' ri ye'ajowan wichin; y ri kan nikicha' kik'u'x richin yinkikanoj, kan chi'anin yinbekila-pe.

¹⁸Wik'in yin, rije' kan nikil k'a beyomel y kiq'ij-kik'ojlen, wik'in yin kan utz wi k'a yek'oje' y nikil chuqa' ch'akonik.

¹⁹Más k'iy utzil ri nink'en-pe yin ke chuwech ni nuk'en-pe ri q'anapueq y ri abej topacio ri ch'akoj wik'in yin más k'iy ke chuwech ri nuya' ri saqipueq.

²⁰Ri bey ri nuk'uan yin kan jun bey richin ruchojmilal, chuqa' ri nubey yin kan pa rubeyal k'a.

²¹Yin kan ninsipaj-wi beyomel chike ri ye'ajowan wichin yin kan ninya' k'a más beyomel chikichin.

²²Yin ri na'oj kan ink'o chik k'a rik'in ri Dios ri pa rutikeribel, kan ink'o k'a pe rik'in toq k'a man jajun samaj tuchop rubanik.

²³Yin kan ink'o-wi-pe rik'in ri Dios, toq k'a man jajun k'o, yin kan pa rutikeribel ink'o-pe; kan ink'o chik toq kan k'a man jani k'o ta re ruwach'ulew.

²⁴Yin kan yisamej chik k'a toq man jani ek'o ta ri siwan chupan ri nimalej taq palou, toq kan k'a man jani ek'o ta ri kalaxbal ri nimalej taq raqen-ya'.

²⁵Yin kan yisamej chik k'a toq k'a man jani ek'o pa kik'ojelibal ri nima'q taq juyu', kan ink'o chik k'a nabey chikiwech ri kokoj taq juyu'.

²⁶Chupan ri q'ij ri' ri Dios kan man jani k'a tuben re ruwach'ulew, ni ri tikonbel-ulew, toq kan k'a man jani tuben ni jun ti k'olaj ulew richin re ruwach'ulew.

²⁷Yin kan ink'o chik k'a chiri' toq ri Dios najin chubanik ri kaj, toq rija' kan najin k'a chubanik ri rukojol ri kaj y ri ruwach'ulew.

²⁸Kan ink'o chik k'a toq ri Dios yeruyala', yeruchojmirisala' ri sutz' ri chikaj, toq rija' kan nuyala' k'a kan kuchuq'a' ri alaxibel taq ya' ri ek'o pa xulan.

²⁹Yin kan ink'o chik k'a toq ri Dios nuya' kan rubeyal pa ruwi' ri palou, y ri ya' ri' kan man tikirel ta k'a chi nuq'ej ri rupixa' ri Dios; kan ink'o-wi k'a toq ri Dios xutik kan ri ruxe' re ruwach'ulew.

³⁰Kan ink'o-wi k'a rik'in ri Dios yisamej achi'el ri nibanon-q'anej jun nimalej samaj, y kan xuk'en k'a pe kikoten chire rija', ri samaj ri xebanatej, y yin kan yikikot k'a ink'o-apo ri akuchi k'o-wi rija'.

³¹Yin kan yikikot-wi k'a rik'in ri rubanik xuben kan ri ruwach'ulew, ri akuchi ri winaqi' kan nikiya' kikoten chuwe rik'in ri yekibanala'.

³²Wakami k'a, kan kiniwak'axaj rix walk'ual alaboni', kan jebel wi k'a ruwa-kiq'ij ri kik'uan ri nubey yin.

³³Kan tiwetamaj k'a ronojel ri ix nutijon-wi, y xkixok aj-na'oj. man timalij kan ronojel ri tijonik ri nuya'on chiwe.

³⁴Jebel ruwa-ruq'ij ri wineq ri kan yirak'axaj; ri kan q'ij-q'ij k'o-apo chuchi' ri wachoch, ri kan royoben chi nril-el kikoten.

³⁵Ri wineq ri kan yiril yin ri na'oj, kan nril-wi k'aslen, roma kan nril-wi ri utzil ri nuya' ri Dios.

³⁶Jak'a ri wineq ri xa man yirukanoj ta y xa yirujech'ej kan, nroyoj k'a ruk'ayewal pa ruwi', roma ri wineq ri man najowan ta wichin, xa kan nrajo' wi ri kamik, keri' k'a ri ch'abel ri nubij ri na'oj.