Read Kaqchikel Pro 9 Bible Online

Pro 9 - Kaqchikel bible

Pro 9

¹Ri na'oj kan rupaban k'a q'anej jun rachoch, y ri wuqu' raqen ri rachoch, ri xeruben kan jebel ok rujosik xuben chike.

²Xukamisaj y xupoch' ri chikop richin ri rukil, xuxol y jebel k'a rubanik xuben chire ri vino, y xuben k'a rutzil ri mesa richin xunaba' richin ri wa'in.

³Y kan xeruteq k'a ri rusamajela' richin chi ri winaqi' ke'apon pa wa'in, y ri samajela' ri' kan yesik'in k'a ri pa taq jotol chire ri tinamit, richin ye'ak'axex.

⁴Y kere' k'a ri ch'abel ri rubin-el ri na'oj chike ri rusamajela', richin yeroyoj ri winaqi': Rix ri man kan ta k'iy na'oj k'o iwik'in, kixanpe wik'in, y ri man pa ruchojmilal ta yixnojin, kan kixanpe chuqa'.

⁵Kan utzilej ipeten chupan re wa'in re ninsuj chiwe yin, kan kixanpe k'a; kan kixwa-kixuk'ya' wik'in; kan tiqumu' k'a ri vino ri kan iwichin rix nubanon rutzil.

⁶Kan tiya' k'a kan ri ik'aslen ri akuchi xa maneq na'oj, y tiwila' ri k'aslen, y kan tichapa-el ri k'aslen ri akuchi kan k'o etamabel.

⁷Wi k'o ta jun wineq nuch'olij jun ri kan nim nuna-ri', xa yoq'onik ri xtiberuk'ulu-pe, y wi nrajo' nuto' jun wineq aj-mak, xa xtiqasex-pe ruq'ij.

⁸Roma ri' rix kan man jun bey k'a tich'olij jun ri nim nuna-ri', roma wi xa keri' xtiben kan xkixretzelaj k'a. Jak'a wi nicholij jun wineq aj-na'oj, rija' kan xtuya' k'a iq'ij roma ri'.

⁹Kan tiya' k'a más rutzil chuwech ri aj-na'oj y xtik'oje' más runa'oj. kan titijoj k'a ri wineq choj ruk'aslen y rija' xtinimer más retamabal.

¹⁰Ri wineq ri kan k'o rukiy ri Dios chuwech, chiri' k'a xtipe-wi ronojel ri runa'oj ri nik'atzin chire; Roma wi ri wineq nretamaj ruwech ri Dios kan jari' k'a ri qitzij etamabel.

¹¹Woma k'a yin ri na'oj, ri wineq kan xkerukochij k'iy ruq'ij chuwech re ruwach'ulew, y ri rujuna' kan pa ruk'iyal k'a xkeruben-q'anej.

¹²Wi ri ibanobal rix kan nuk'ut chi k'o ina'oj, kan k'o rajel ruk'exel xtik'ul. jak'a wi rix xa ruyon yojobenik k'o chupan ri ik'aslen, xa ja rix xkixtijo poqon roma ri'.

¹³Toq kan maneq na'oj iwik'in rix, xa junan ibanik rik'in jun ixoq ri nikamulun-tzij; ri ixoq ri' kan man tz'aqet ta ninojin, kan man jun k'ix chuwech yerubanala' ri nrajo'.

¹⁴Ri ixoq ri' kan man nik'ix ta k'a nibetz'uye-pe pa ruchi' rachoch, ri nitzu'un pa bey, nitz'uye-pe pa ch'aket, ri pa jotol richin ri tinamit.

¹⁵Yeroyola' k'a pe ri achi'a' ri yeq'ax keri', kan yeroyola' k'a pe ri achi'a' ri xa choj ok yeq'ax keri' q'ij-q'ij.

¹⁶Ri ixoq ri' kan nubij k'a chike ri k'a e ak'uala' na, kixanpe wik'in, y chike ri achi'a' ri man kan ta yenojin jebel, kan nubij k'a:

¹⁷Kixanpe y tiweleq'aj ri ya' ri k'o wik'in yin y tina' chi re ya' re' kan k'o ruki'il, kixanpe y pan ewel k'a titija' ri kaxlan-wey wik'in yin y tina' chi más jebel, nicha'.

¹⁸Y ri achi'a' ri man kan ta yenojin jebel, man ketaman ta chi xa choj pa kamik ye'apon-wi; kan man k'a ketaman ta chi toq ye'apon rik'in ri ixoq ri', xa pa q'aq' yebeqaqa-wi.