Read Kaqchikel Ecl 1 Bible Online

Ecl 1 - Kaqchikel bible

Ecl 1

¹Yin Salomón ri ninch'abalij ruch'abel ri Dios; in ruk'ajol kan ri David, in rey richin ri tinamit Jerusalem. Jare' k'a ri nuch'abel.

²Ronojel xa nik'is, ronojel xa q'axel, keri' nubij ri ch'abaliy ruch'abel ri Dios, ronojel xa nik'is, ronojel xa q'axel. Kan ronojel-wi q'axel.

³Roma, ¿achike ta k'a nuch'ek jun achin ri janila nisamej chuwech re ruwach'ulew chuxe' ri ruk'atanal ri q'ij?

⁴Qonojel roj winaqi' kan yojken k'a el, y ek'o k'a ri ye'alex, jak'a ri ruwach'ulew man jun bey xtijalatej.

⁵Nel-pe ri q'ij y niqaqa ri q'ij, y junanin nibe richin napon chik ri akuchi xel-wi-pe.

⁶Ri kaq'iq' nibe k'a pa xokon, nijumin k'a nibe richin napon chik pa xaman ri akuchi xel-wi-pe. Y keri' nuben jantape' richin nusutij-rij ri ruwach'ulew.

⁷Ronojel ri raqen taq ya', chupan ri palou ye'apon-wi, jak'a ri ya' ri' man jun bey ninoj. Xa kan akuchi k'a eleneq-pe ri ya' ri', xa kan chiri' chik xtapon-wi richin xkebebiyin jun bey chik.

⁸Ronojel ri k'o xa kan k'o kosik ri ruk'amon-pe y ronojel re' ri wineq man tikirel ta chuwech chi nutzijoj; ri wineq xa kan nurayij ruwech ronojel ri nutzu' ronojel ri nrak'axaj kan nurayij-qa.

⁹Ri banobel ri xeq'ax yan, xkebek'ulun chik pe Ri banobel ri xeban yan ojer, xkebanatej chik ri chiqawech-apo. Xa man jun ri k'ak'a' ta ri nibanatej chuwech re ruwach'ulew.

¹⁰Roj man yojtikir ta k'a niqabij, re' kan k'ak'a-wi; roma re' xa kan xk'oje' yan ri ojer, ri xq'ax yan.

¹¹Ronojel ri banobel ri xeq'ax yan xa man ye'oqaqa ta chik chiqak'u'x, y ronojel ri banobel kichin ri winaqi' ri xkepe chiqawech-apo xa man xtoqaqa ta chikik'u'x ri winaqi' ri xkek'oje' kan chikij rije'.

¹²Yin ri ch'abaliy ri ruch'abel ri Dios xinok k'a rey richin ri Israel ri chiri' pa Jerusalem.

¹³Yin kan rik'in k'a na'oj xinjech ri wánima chukanoxik y chunik'oxik ronojel ri nibanatej chuwech re ruwach'ulew. Y re samaj re' ri ruya'on kan ri Dios chiqe, kan janila k'ayew richin niqaben.

¹⁴Xintz'et k'a ronojel ri samaj ri niban chuwech re ruwach'ulew chi maneq rejqalen. Xa man yatikir ta nawil ri nawajo', xa kan achi'el ta nawajo' nachop ri kaq'iq'.

¹⁵Ri kotokik chik, man yatikir ta naben choj chire y ri xa man jani k'o awik'in man jani ruk'amon chi nabij chi k'o chik awik'in.

¹⁶Yin kan xinbij k'a pa wánima: Kan janila nuq'ij, kan xk'oje' nim nuna'oj chikiwech ri ch'aqa' chik rey ri xek'oje' yan el pa Jerusalem roma xk'oje' nuna'oj y wetamabal.

¹⁷Kan xinjech k'a wi' richin xinwetamaj rukojol ri na'oj y ri ch'ujerik. Xintz'et k'a chi ronojel q'axel y xa man yatikir ta nawil ri nawajo', xa kan achi'el ta nawajo' nachop ri kaq'iq'.

¹⁸Y keri' toq k'iy chik na'oj k'o awik'in, re' xa man nuben ta chawe chi nikuqer ak'u'x rik'in ri nach'ob. Y ri nuya' chik q'anej más etamabel pa ruwi' xa nuk'en-pe janila q'axo'n chire.