Read Kaqchikel Ecl 10 Bible Online

Ecl 10 - Kaqchikel bible

Ecl 10

¹Jun jubulej aq'om toq k'o amolo' yeqaqa chupan, nichuwir k'a ri aq'om ri', y kan keri' chuqa' nibanatej rik'in ri na'oj richin jun wineq aj-na'oj, toq nok jun tz'ukun-tzij chupan xa nuyoj ronojel ri na'oj y ri ruq'ij.

²Ri aj-na'oj kan ja ri utz ri yeruben jak'a ri man aj-na'oj ta xa ja ri etzelal ri yeruben.

³Ri maneq runa'oj rokik ruchapon ri rubey chuwech re ruwach'ulew, maneq ch'uch'ujil chupan ri ruk'aslen, y re' nuk'ut chikiwech ri ch'aqa' chik winaqi' chi rija' kan maneq-wi runa'oj.

⁴Wi ri runa'oj ri q'atoy-tzij man utz ta chik awik'in rat, man tisach ak'u'x, xa taqasaj-awi' y re' nuben chawe chi man naben ta ri man ruk'amon ta.

⁵K'o chuqa' jun chik itzel banobel nutz'eton chuwech re ruwach'ulew, y re' kan itzel-wi y peteneq kik'in ri e q'atoy taq tzij.

⁶Rije' xa ja ri winaqi' ri man yeno'on ta rik'in samaj, jari' e kiya'on-q'anej pa jotol. Y jak'a ri winaqi' ri yeno'on chubanik ri samaj, xa jari' ri e kiya'on kan pa xulan chuwech samaj ri man kan ta janila na'oj nrajo'.

⁷Yin kan nutz'eton k'a chi xa ja ri samajela' ri e yuqul pa samaj ri e ch'okol chirij kiej, y jak'a ri e tata'al xa chikaqen e beneq-wi, achi'el xa ta ja rije' ri samajela' ri e yuqul pa samaj.

⁸Ri nik'oto-qa jun jul, rik'in juba' ja rija' ri nabey ri nitzaq-qa chupan. Y ri niwulan jun tz'aq ri banon rik'in abej, rik'in juba' nipurix roma jun kumetz ri k'o chiri' kojol abej.

⁹Ri nisamej rik'in abej, rik'in juba' nusok-ri' rik'in, ri nich'aron si', rik'in juba' xa k'o nuk'uluwachij rik'in.

¹⁰Y wi ri ikej nik'is rey y kan man niban ta chik, xa nrajo' más uchuq'a' richin nukusex, roma t'est'ik pa rey. Roma ri' más k'a rejqalen toq rik'in na'oj yebanatej ronojel.

¹¹Wi ri kumetz xa xupurij yan jun wineq nabey, y k'ari' napon ri nitikir nibanon chire ri kumetz chi niniman y man jun nuben, xa man jun chik nik'atzin-wi chi napon ri wineq ri'.

¹²Ri tzij ri nubij jun wineq aj-na'oj, kan nuk'en-pe utzil, jak'a ri tzij ri nubij jun wineq ri man aj-na'oj ta xa wulunen nuk'en-pe chirij.

¹³Ri ruxe' ri rutzij ri wineq ri' xa ruyon ch'obon man ch'obon, y pa ruk'isibel chire ri rutzij ri nuben, xa man jun rubeyal y nuk'en-pe janila ruk'ayewal.

¹⁴Ri maneq runa'oj kan nik'o ruwi' ri rutzij ri nuben, y ri peteneq chiqawech-apo xa man jun etamayon. ¿Kan k'o ta kami jun ri nitikir nibin chire ri achike ri peteneq toq rija' xa maneq chik?

¹⁵Toq ri winaqi' ri maneq kina'oj yesamej, ri samaj ri' nuben chike chi janila yekos. Kan man jun ri nikajo' nikiben, y roma ri' kan man ketaman ta achike na ri bey ri nuk'uan kichin k'a ri pa tinamit.

¹⁶Kan tijoyowaj k'a kiwech ri winaqi', ri kan k'a ak'ual na ri niq'aton-tzij pa kiwi', y ri tata'al ri yesamej rik'in, xa kan ja yan ri nimaq'a' nikichapala' yenimaq'ijun.

¹⁷Kan jebel k'a ruwa-kiq'ij ri winaqi' richin jun ruwach'ulew ri k'o jun ru-rey ri kan kalk'ual nima'q taq winaqi'. Y ri e tata'al ri yesamej rik'in, kan yewa' toq napon ri ramaj, richin k'o kuchuq'a', y man richin ta chi yeq'aber.

¹⁸Toq ri ruwi' jun jay nisoboso-pe xa roma ri ruq'oral ri wineq, y roma man nrajo' ta nisamej xa nitz'ujan ri ruwi' ri rachoch.

¹⁹Jun nimaq'ij niban richin nuk'en-pe kikoten, ri vino niqum richin nik'ases ri kik'aslen ri k'a e k'es na, y ronojel re' kan ja ri méro ri nibanon.

²⁰Man jun bey k'a kach'on itzel chirij ri rey, kan man tapon ri' pan ach'obonik. Man itzel kach'on chirij ri beyom, stape' ta ayon atk'o pa jay ri akuchi yawer-wi, roma ri tzij ri nabij xa nel-el achi'el nubij ri tzij: Xa ek'o taq aj-xik' chikopi' ri ye'uk'uan-el ri yebix.