Read Kaqchikel Ecl 11 Bible Online

Ecl 11 - Kaqchikel bible

Ecl 11

¹Kan utz k'a ana'oj tabana' kik'in konojel, roma kan xtapon k'a jun q'ij kan k'o rajel ruk'exel xtak'ul.

²Ri k'o awik'in kan junan k'a takusaj kik'in konojel ri winaqi', stape' kan man awetaman ta ri achike ri nuk'en-pe chawe ri chua'q ri kabij.

³Y ri sutz' wi kan richin job, kan nuya' k'a pe job pa ruwi' re ruwach'ulew. Y toq nitorix jun che' wi pa xaman niqaqa-wi o pa xokon niqaqa-wi, xabakuchi k'a nibe-wi, kan chiri' k'a xtipune-wi kan.

⁴Ri wineq ri xa nupoqonaj nel-el chuwa kaq'iq', man nuben ta qa ri rutiko'n wi xa nupoqonaj nel-el chuwa job, man xtitikir ta xtuk'ol ri rutiko'n.

⁵Achi'el k'a ri man awetaman ta akuchi nipe-wi ri kaq'iq', y ri akuchi nibe-wi y man awetaman ta chuqa' chirij ri ruk'iyinen ri ak'ual chupan ri te'ej, kan keri' chuqa', kan man jun awetaman chirij ronojel rusamaj ri Dios, roma kan ja rija' ri banayon ronojel.

⁶Kan pa ruq'ijul yan k'a tabana-qa ri atiko'n, y chuqa' kan tabana' toq eleneq chik ri nabey tikoj. Kan man kakos chubanik ri asamaj; rat kan man awetaman ta k'a achike ri utz nel chawech, wi ja ri xatik-qa pa nabey ó ja ri xatik-qa pa ruka'n, ó xa chi ka'i' utz nel chawech.

⁷Ri saqil kan nuk'en-pe kikoten, y chuqa' kan utz nuna' ri runaq'-qawech toq nutzu' ri rusaqil ri q'ij.

⁸Stape' janila k'iy juna' ri nik'ase' jun wineq y kan nikikot rik'in ronojel ri rujuna' ri', jak'a toq nrajlaj ri juna' ri richin ri ruk'ayewal ri ruq'axan, xa kan k'iy chuqa'; y ronojel k'a re' xa kan q'axel.

⁹Rat ri k'a at k'ajol ala' na, kan kakikot k'a chupan ri ak'ajolil. Rokik ri k'a at k'ajol na, k'iy k'a ri nawajo' naben chupan ri ak'aslen. Y kan jari' ri tabana', xaxe k'a man tamestaj chi ja ri Dios k'o pa ruwi' ronojel, y k'o jun q'ij kan xtuq'et chuqa' tzij pa ruwi' ronojel banobel.

¹⁰Kan tawelesaj k'a el awik'in ronojel ri nibanon chawe chi natej poqon y yaququt janila, roma kan tawetamaj k'a chi ri ak'ajolil xa q'axel.