Read Kaqchikel Ecl 12 Bible Online

Ecl 12 - Kaqchikel bible

Ecl 12

¹Kan tik'oje' chi'ak'u'x chupan chijun ri ak'aslen y man tamestaj ri k'iytisanel awichin. Rokik k'a at k'ajol na y man jani katapon chupan ri ajuna' toq xtabij: Ronojel ri k'o xa man jun chik kikoten nuk'en-pe chuwe.

²Rokik chupan ri ak'aslen kan k'a kikoten na atk'o, roma kan napon ri q'ij chupan ri ak'aslen achi'el xa yechup chawech ri saqil richin ri q'ij, ri ik' y ri ch'umila'. Y ri sutz' achi'el xa kan yebe jumul y man yetzolin ta chik pe.

³Toq ri aq'a' ri e chajinel richin ri jay xa yek'ark'ot chik y ri awaqen ri janila kuchuq'a' xa yesotoso'. Keri' chuqa' ri aka' ri ek'o pan achi' xa man yetikir ta chik nikikok'ij ri away, roma xa jujun chik ri ek'o kan, y ri runaq' taq awech ye'ok pa q'equ'm y man yetzu'un ta chik pe pa ventana.

⁴Kan xtapon k'a ri q'ij toq kan man xkatak'ex ta chik, achi'el xa ta kan nitz'apex ri ruchi-jay. Y xa man nawak'axaj ta chik toq niq'ajan ri ka'. Man xtawak'axaj ta chik ri kibixanik ri aj-xik' taq chikopi' y ronojel ri bix, xa kan man xtawak'axaj ta chik chuqa'.

⁵Toq xkak'oje' pa jotol xa xtuya' k'a k'ulu'n chawe, y toq xkabe pa bey xa chaq xtaxibila-awi'. Ri rusumal-awi' xa kan achi'el rusi'j almendro xtuben, roma xtisaqir. Ronojel k'a ri awuchuq'a' xtik'is, y xtaben achi'el jun sak' ri'j chik. Y ri arayibel xa xtik'is chuqa'. K'ari' napon k'a ri q'ij toq k'o chi yatzolin k'a pan awachoch ri richin q'asen, y ri pa taq bey kan xtak'axex k'a oq'ej.

⁶Kan man k'a tamestaj ri k'iytisanel awichin, rokik kan k'a man jani tiraq'ach'itej ri saqilej k'an ri chapayon awichin, chuqa' rokik k'a man jani nipax ri k'ojelibel richin ri k'aslen, y chuqa' kan rokik k'a man paxineq ta ri ruk'ojelibal-ya', elesabel-ya' y ri jik'bel-ya' man jani tisolkopitej-el.

⁷Kan man k'a tamestaj ri k'iytisanel awichin rokik man jani nok chik ulew ri ach'akul y rokik chuqa' man jani nitzolin rik'in ri Dios ri awánima ri kan richin wi k'aslen ri ya'on-pe chawe roma rija'.

⁸Ronojel xa nik'is, ronojel xa q'axel, keri' nubij ri q'alajirisey ruch'abel ri Dios, ronojel xa q'axel k'a.

⁹Y ri ch'abaliy ruch'abel ri Dios, kan q'ij-q'ij k'a xk'oje-el más runa'oj, y roma ri' kan más k'a jebel kitijoxik xuben chike ri winaqi'. Kan xukanoj y xrak'axaj ri nikibij ri winaqi' y k'iy ri etamabel-tzij ri xeruben kan rija'.

¹⁰Y rija' kan xutej ruq'ij richin xerukusaj ri ch'abel ri kan jebel nuben chire ri kixikin ri winaqi' y ri xerutz'ibaj, kan e etamabel ri e choj y kan e qitzij wi.

¹¹Ri kitijonik k'a ri winaqi' e aj-na'oj, kan nuben k'a jun samaj achi'el nuben jun che' chuq'bel; ri etamabel-tzij ri nikikusaj ri etamanela' kan nich'ike' k'a pa taq kánima ri winaqi'; re' kan e ya'on k'a kan roma ri Dios, ri qayuq'unel.

¹²Wakami k'a, rat ri kan achi'el kape jun walk'ual yin, kak'oje' k'a kan rik'in re etamabel re' y man takanoj ch'aqa' chik. Kan k'o k'a chi nawetamaj chi wi yeban ch'aqa' chik wuj, xa yebek'atzin-pe más. Y ri retamaxik más etamabel xa nuk'en-pe kosik chire ri ach'akul.

¹³Wakami kan tawak'axaj y tawetamaj k'a ri achike nuk'atzinej-wi re jun wuj re': Kan tawetamaj k'a nik'oje' rukiy ri Dios chawech y tabana' ri nubij ri rupixa', roma kan jare' ri achike roma toq ri wineq k'o chuwech re ruwach'ulew.

¹⁴Ri Dios kan k'o k'a jun q'ij toq xtuq'et-tzij pa ruwi' ronojel banobel, chi tz'etel y man tz'etel ta, chi utz y man utz ta.