Read Kaqchikel Ecl 3 Bible Online

Ecl 3 - Kaqchikel bible

Ecl 3

¹Ronojel kan k'o ruq'ijul y ronojel ri niqaben chuwech re ruwach'ulew kan pa ruq'ijul nibanatej-wi.

²Napon k'a ruq'ijul ri alaxik, y chuqa' napon ruq'ijul ri kamik. Napon k'a ruq'ijul richin niban-qa ri tiko'n, chuqa' napon ruq'ijul richin nik'ol ri tikon-qa.

³Napon k'a ruq'ijul richin kamisanik, y chuqa' napon ruq'ijul richin nawaq'omaj richin nakol chuwech ri kamik. Napon k'a ruq'ijul richin wulanik, y chuqa' napon ruq'ijul richin rupabaxik.

⁴Napon k'a ruq'ijul richin oq'ej, y chuqa' napon k'a ruq'ijul richin kikoten. Napon k'a ruq'ijul richin jiloj, y chuqa' napon ruq'ijul richin yaropin roma kikoten.

⁵Napon k'a ruq'ijul richin nawelesaj-el ri abej, y chuqa' napon ruq'ijul richin namol-pe ruchi' ri abej. Napon k'a ruq'ijul richin yaq'eten, y chuqa' napon ruq'ijul richin naya' kan richin yaq'eten.

⁶Napon k'a ruq'ijul richin nakanoj y nawil, y chuqa' napon k'a ruq'ijul richin nakanoj y man nawil ta. Napon k'a ruq'ijul richin nayek, y chuqa' napon ruq'ijul richin nawelesaj-el.

⁷Napon k'a ruq'ijul richin naretz, y chuqa' napon ruq'ijul richin natz'is. Napon k'a ruq'ijul richin man jun ch'abel nabij, y chuqa' napon ruq'ijul richin k'o ch'abel nabij.

⁸Napon k'a ruq'ijul richin yatajowan, y chuqa' napon ruq'ijul richin yatixowan. Napon k'a ruq'ijul richin labal, y chuqa' napon ruq'ijul richin ri uxlanibel.

⁹¿Achike ta k'a nuch'ek ri achin ri janila nutej poqon chubanik ri rusamaj?

¹⁰Kan nintz'et-wi ri samaj ri ruya'on kan ri Dios pa kiwi' ri winaqi' richin chi kan jari' nikiben chijun ri kik'aslen.

¹¹Ronojel ri xuben ri Dios kan jebel rubanik y pa ruq'ijul yebanatej-wi y xuben k'a chire ri wineq richin nitikir nich'obon. Man rik'in ri' man nuq'i' ta ruch'obik ronojel ri rubanon ri Dios, ri pa rutikeribel-pe k'a pa ruk'isibel.

¹²Yin kan xq'ax k'a chinuwech chi ri más jebel chire ri wineq ja ri nikikot chubanik ri utz chupan ri ruk'aslen;

¹³y chuqa' xq'ax chinuwech chi ri rurayibel ri Dios chire ri wineq ja ri niwa-nuk'ya' y kan tikikot chutijik ri nuk'en-pe ri rusamaj ri rubanon.

¹⁴Y chuqa' wetaman chi ronojel ri rubanon ri Dios kan man richin ta jun ka'i-oxi' q'ij. Roma ri' kan man jun k'a nitikir niya'on ruwi' ni man jun chuqa' nelesan ta juba' chire ri rubanik, y kere' xuben chire richin chi ri achin tik'oje' rukiy ri Dios chuwech.

¹⁵Ri niqatz'et wakami xa xbanatej yan y ri xtiqatz'et-apo chiqawech xa xbanatej yan chuqa' y ri Dios xtuben k'a chi ri xbanatej yan xa xtibanatej chik.

¹⁶Chuqa' xintz'et chuwech re ruwach'ulew chi pa ruk'exel ri utzilej q'atbel-tzij, xa ja ri itzel banobel k'o; y pa ruk'exel ri chojmilal, xa ja ri etzelal ri k'o.

¹⁷Y roma ri' yin xinch'ob pa wánima, ri choj kik'aslen y ri man choj ta kik'aslen ja ri Dios xtibeq'aton-tzij pa kiwi' roma kan xtapon k'a ruq'ijul richin nibanatej ronojel ri'.

¹⁸Chuqa' xinbij-qa pa wánima: Xa kan ke na wi re' rubanik re', y xa qamak roj winaqi', richin chi ri Dios nuk'ut chiqawech chi tiqetamaj chi roj xa jubama oj chikopi'.

¹⁹Y xa kan qitzij na wi chi ri wineq y ri chikop xa nibetane' ri kik'aslen: Ri wineq niken y chuqa' ri chikop niken. Chi e ka'i' nikijiq'aj kaq'iq'; ri wineq man kan ta janila rukojol rik'in ri chikop. Xa kan ronojel k'a q'axel.

²⁰Konojel xa yetzolin chik ri akuchi e peteneq-wi: Kan pan ulew k'a e peteneq-wi y chiri' chik yetzolin-wi, kan ye'ok chik k'a ulew.

²¹¿Kan k'o kami jun wineq ri kan retaman y rutz'eton chik chi konojel winaqi' kan k'o kik'aslen ri nibekila' chila' chikaj y kan retaman ta chuqa' chi ri chikop xa choj pan ulew nik'oje-wi kan?

²²Keri', ri más jebel chire ri wineq ja ri tikikot rik'in ri nuk'ul rik'in ri rusamaj, roma jare' ri rutojbalil ri nuk'ul. Roma ¿Kan k'o ta kami jun wineq ri nitikir nuk'ut chinuwech ri peteneq chiqawech-apo?