Read Kaqchikel Ecl 5 Bible Online

Ecl 5 - Kaqchikel bible

Ecl 5

¹Toq yabe pa rachoch ri Dios kan taya' k'a rejqalen ri akuchi atk'o-wi; kan kajel k'a apo richin más nawak'axaj ri tijonik richin ri ruch'abel ri Dios, roma jari' ri más rejqalen ke chuwech ri nikiben ri nakaneq taq winaqi' ri yekisujula' kamelabel y man ketaman ta chi xa itzel ri yetajin chubanik.

²Man k'a tabij ch'abel bin man bin. Man jun tasuj chi'anin chire ri Dios, roma rija' kan chila' chikaj k'o-wi y nrak'axaj, y rat xa at jun ri xa chuwach'ulew atk'o-wi.

³Roma wi kan janila yach'obon, xa kan nuben chawe chi janila yatachik' ri chaq'a'. Wi chaq janila yach'on, xa kan man jun chik rejqalen ri ye'abila'.

⁴Toq rat k'o nasuj chire ri Dios richin naben, man k'a kayoke' richin naben, roma rija' kan man niqa' ta chuwech ri k'o nikisuj y xa man nikiben ta. Man k'a taben achi'el nikiben ri nakaneq taq winaqi'.

⁵Más ruk'amon ri man jun nasuj, ke chuwech ri k'o nasuj y xa man yatikir ta naben ri xasuj.

⁶Man taya' q'ij chi roma ri ach'abel yatzaq pa mak, y k'ari' xtabij chire ri rusamajel ri Dios chi ri xaben xa roma man awetaman ta. ¿Achike roma naben chire ri Dios chi nipe royowal roma ri ach'abel, y roma ri' xtuyoj ronojel ri samaj ri abanon?

⁷Y roma ri' ri achoq ik'in k'o ri nojibel chi niberubana' ri jun ri' y niberubana' ri jun chik ri', xa ruyon k'a nimirisanen taq ch'abel ri yepe rik'in y chuqa' nunimirisaj-ri' rija'. Jak'a rat kan tik'oje' rukiy ri Dios chawech.

⁸Man tamey toq yetz'ilox ri winaqi' man jun k'o kik'in y xa man pa ruchojmilal ta ri niban chike. Roma ri jun aj-raqen k'o jun chik ri k'o más ruq'ij ri k'o pa ruwi' y ri k'o más kejqalen ja chik ri' ri ek'o pa kiwi' ri e ka'i' rije'.

⁹Chuqa' ronojel ri nel-pe chuwech ri ruwach'ulew kan jare' ri nik'atzin chike ri winaqi' y keri' ri rey kan k'o chuqa' chuk'u'x ronojel ri samaj richin ri tiko'n.

¹⁰Ri kan beneq ránima rik'in ri méro jantape' nrajo' más, ri najowan richin ri beyomel xa man jun nuk'en-pe chire. Chuqa' ronojel re' xa kan q'axel chuwech re ruwach'ulew.

¹¹Toq más k'iy ri abeyomel nuben-q'anej, chuqa' yek'iyer-q'anej ri asamajela' ri koyoben-apo kiway awik'in. ¿Kan k'o kami nuk'en-pe ri beyomel chire ri rajaw? Man jun, xaxe nutzu' ri niq'ax-el pa ruq'a'.

¹²Jun choj samajel kan ki-ki' ri ruwaran, stape' jebel xwa-qa o xa juba' ok ri xutej-qa; jak'a ri beyom ja ronojel ri k'o rik'in ri man niya'on ta q'ij chire chi niwer jebel.

¹³Y k'o k'a jun ri nutz'eton chuwech re ruwach'ulew ri kan nuya' q'axo'n, y ri' ja ri beyomel ri nikimol-q'anej ri winaqi', y nikikusaj richin itzel nuben chire ri kik'aslen.

¹⁴Roma re beyoma' re' xaxe chupan itzel taq banobel nikik'is-wi ronojel ri kibeyomel, jak'a chike ri xekalk'ualaj xa kan man jun chik xtikiya' kan.

¹⁵Y k'o chuqa' jun chik ri nutz'eton; chi ri wineq toq nalex, kan ch'anel peteneq. Kan keri' chuqa' ch'anel ri xtitzolin, y man jun k'a chire ri xuch'ek chire ri kow laj taq rusamaj ri xerubanala' ri xtuk'uaj ta el toq xtiken.

¹⁶Y re' xa kan janila k'ayew, roma xa kan achi'el toq xpe chuwech re ruwach'ulew, xa kan keri' chik xtitzolin. Xa choj k'a keri' xsamej, y xa man jun xuk'en-pe chire.

¹⁷Y man xaxe ta ri', roma ronojel ri xril richin chi xutej-el, xa chupan jun q'equmatajineq k'aslen xuk'owisaj-wi-el; rik'in ruk'ayewal, yabil y ch'obonik.

¹⁸Ri nutz'eton-pe ri nibanatej chi ri más jebel chire ri wineq ja ri nutej, nuqum y kan nikikot ránima rik'in ri xuch'ek. Y kan keri' nuben ri janipe' q'ij ruk'aslen ri nuya' ri Dios chire; roma kan jare' ri richin rija'.

¹⁹Keri' chuqa' chike konojel winaqi', ri Dios kan ruya'on méro, xoral y ulew, y nuya' chuqa' q'ij chike richin chi chiri' nipe-wi ri nikitej. Jari' ri kan kichin rije' y kekikot rik'in ri kisamaj roma kan rik'in ri Dios e peteneq-wi.

²⁰Y roma ri Dios ruya'on kikoten pa taq kánima, roma ri' man nikina' ta ruk'ayewal chupan ri janipe' q'ij chire ri kik'aslen.