Read Kaqchikel Ecl 8 Bible Online

Ecl 8 - Kaqchikel bible

Ecl 8

¹¿K'o kami jun wineq ri kan nujunamaj ri' rik'in jun wineq aj-na'oj? ¿K'o ta kami jun wineq ri nitikir nubij achike roma k'o ronojel, kan achi'el nuben jun aj-na'oj? Ri na'oj kan nuben k'a chire jun wineq chi nujel ri nitzu'un, nuben chire chi nikikot ruwech.

²Kan tabana' k'a ronojel ri nubij ri rey chi k'o chi niban, roma kan aya'on chik atzij chuwech ri Dios.

³Man jun bey tach'ob chi kan chi'anin najech'ej-el-awi' chire ri rey, ni man chaq tajula-awi' kik'in winaqi' ri k'o itzel nikich'obola', roma ri rey kan nitikir nuben chawe ri achike nrajo' rija'.

⁴Roma ri ruch'abel ri rey kan ruch'abel-wi jun ri k'o q'atbel-tzij pa ruq'a' pa ruwi' ronojel, y man jun ri xtitikir ta xtik'utun chire, ¿achike roma kere' naben?

⁵Ri kan nitaqen k'a ri nubij ri rutzij ri rey, kan man jun k'a ri xtipe ta chirij. Ri wineq aj-na'oj kan retaman k'a ri ruq'ijul y retaman achike ri xtuben.

⁶Roma ronojel kan k'o k'a jun rubanik, y k'o ruq'ijul. Jak'a ri ruk'ayewal xtiqaqa pa ruwi'.

⁷Kan man jun retal chi retaman ta juba' chi k'o ta ruk'ayewal ri k'o pe ketaq ri'; roma ri peteneq ri chuwech-apo kan man jun niq'alajirisan chire.

⁸Kan man pa ruq'a' ta k'a ri wineq k'o-wi ri kamik. Rija' xtiken achi'el niken jun achin pan oyowal, ni ri wineq itzel rubanobal man xtukol ta ri' chuwech re'.

⁹Ronojel re' xinwil yin y kan xinjech ri wánima richin xinwetamaj ri niban chuwech re ruwach'ulew; yin kan xinwil k'a chi k'o ramaj toq ri achin nik'oje' ruchuq'a' richin nuben itzel chire ri ruwinaq.

¹⁰Chuqa' xintz'et chi k'o winaqi' ri janila e itzel, ri xa man jun bey xkiben ri utz, jak'a toq xeken kan jebel kimuqik xban. Jak'a ri kan choj kik'aslen xek'ase', xa chi'anin xemestex y man ninatex ta chik ri utzilej kibanobal. Re' xa man niq'ax ta chiqawech.

¹¹Roma janila niyaloj richin chi niq'at-tzij pa ruwi' ri banoy etzelal, roma ri' ek'o ch'aqa' chik winaqi' ri xa nipe pa kich'obonik chi nikichop rubanik etzelal.

¹²Ri aj-mak kan pa wok'al k'a ch'a'oj ri yerubanala' y kan k'a nik'ase' na chubanik más. Man rik'in ri' yin kan yitikir ninbij chi ri k'o rukiy ri Dios chikiwech, kan kikoten xkek'ase-el, y xa kan k'o yan ri nikik'ul-el re wawe' roma kan k'o rukiy ri Dios chikiwech.

¹³Ri aj-maki', ri maneq Dios chikiwech xa maneq ruki'il ri kik'aslen y xa man niyaloj ta. Xa kan achi'el ok jun muj ri xa niq'ax chi'anin.

¹⁴Kan k'o chuqa' jun chik ri man utz ta ri xinwil chuwech re ruwach'ulew, ek'o k'a winaqi' ri kan choj ri kik'aslen y xa kan nikitej poqon achi'el xa ta kan janila e itzel taq winaqi'. Y ri e itzel taq winaqi' xa kan utz ri kibanon y utz yeq'ax achi'el xa ta choj ri kik'aslen, y roma ri' man niq'ax ta chiqawech.

¹⁵Roma ri' chinuwech yin kan janila rejqalen ri kikoten. Y ri niya'on ri kikoten chire ri wineq ja ri k'o nutej y k'o nuqum, y re kikoten re' jare' ri nuch'ek roma ri rusamaj richin ronojel q'ij chire ri ruk'aslen, rokik ri Dios ruya'on ruk'aslen chuwech ri ruwach'ulew.

¹⁶Y toq yin kan xinjech-wi' richin ninwil ri na'oj y richin ninwetamaj ronojel ri yeban chuwech re ruwach'ulew, xinwil k'a chi ek'o winaqi' kan man yewer ta ni ri paq'ij ni ri chaq'a' roma ri kisamaj.

¹⁷Yin kan xinwil k'a ronojel ri rusamaj ri rubanon ri Dios, stape' yin kan man xq'ax ta chinuwech ronojel ri banobel ri yekibanala' re winaqi'; y stape' ta kan k'o ta jun wineq ri kan nutej ruq'ij y kan nikos chukanoxik xa kan man xtril ta, stape' ta chi kan ta jun wineq aj-na'oj nunojij chi kan nretamaj ronojel xa man xtiberila' ta pe.