Read Kaqchikel Cnt 4 Bible Online

Cnt 4 - Kaqchikel bible

Cnt 4

¹Kan janila at jebejoj ok wajowanel yin. Kan janila at jebejoj ok. Ri runaq' taq awech chukojol ri a-velo, janila e jebel ok, achi'el runaq' taq ruwech jun ti paloma. Toq yesilon ri rusumal taq awi', kan achi'el taq tzobaj tzuntzun ri yetzopiyaj yexule-pe chuwa taq juyu' richin Galaad.

²Ri awey kan e seq e seq, achi'el jun tzobaj karne'l ri k'a juba' tisokex-pe-kij, y k'ari' yebe'atin-pe. Chikijujunal ri awey kan taq e kua'ch, y man jun chike rije' ri ruyon ta k'o.

³Ri ti achi' kan keq-keq achi'el ri betz' keq. Y toq yach'on, kan jebel ok niq'alajin. Ri apalej kan keq yeq'alajin-pe chupan ri a-velo, kan achi'el nik'ajta'q taq granada.

⁴Ri aqul janila jebel ok achi'el ri torre richin tobel richin ri David. Y ri awichinaj kan yeyok'olin achi'el ri janila chi tobel ri yerepelun ri e tzeqeban chirij ri torre.

⁵Ri ruwa-ak'u'x kan e buyul, achi'el ri taq seq kij kua'ch masat, ri yeyuq'ux chukojol ri kotz'i'j lirio.

⁶Chuqa' e achi'el ka'i' taq juyu' ri ya'on jubulej taq aq'om y pom chikij. Y chiri' xkik'oje-wi kan k'a toq niseqer-q'anej, k'a toq ri aq'a' xtik'is-el.

⁷Rat kan janila at jebel ok wixjayil yin; nitiker-pe chi'awaqen, y napon k'a pan ajolon.

⁸Toq xtiseqer-q'anej, jari' toq xqojxule-qa pa Líbano, xqojbe-qa k'a pa ruwi' ri juyu' richin Amaná, ri Senir y ri Hermón, k'a akuchi k'o-wi kijul ri koj, y akuchi ek'o-wi ri balma.

⁹Xaxe rik'in jun ti atzubal, kan xaweleq'aj kan ri wánima rat, wajowanel yin. Kan xaweleq'aj ri wánima toq nich'ich'an ri awichinaj.

¹⁰Kan janila k'a jebel ri awajowabal rat, wajowanel yin. Kan más k'a ruki'il chuwech ri vino ri awajowabal. Y ri jubulej awaq'om kan janila jubul chuwech ronojel ri ek'o.

¹¹Ri pan achi' kan ki-ki', achi'el ri kab ri nikiya' taq chikopi'. Y chuxe' ri awaq' kan ki-ki' achi'el xa ta nibiyin kab y leche. Y ri ruxla' ri atziaq kan achi'el ri kuxla' ri jalajoj kiwech che' ri ek'o pa Líbano.

¹²Rat, wajowanel, kan janila at jebel ok, achi'el jun qejoj ri jebel k'ojon rij, ri kan xaxe wichin yin. Kan at achi'el jun alaxibel-ya' ri ch'aron xaxe wichin yin; chuqa' kan achi'el jun pozo ri kan xaxe wichin yin.

¹³Ri ka'i' aq'a' kan e jubul-jubul roma ri ruxla' ri awaq'om: Kan achi'el kuxla' ri granada, y ri ch'aqa' chik jalajoj kiwech kotz'i'j, achi'el ri alhena, ri nardo,

¹⁴ri azafrán, ri aji'j, ri canela, ri jalajoj kiwech pom, ri mirra, ri áloe, y ri jalajoj kiwech jubulej taq aq'om.

¹⁵Kan qitzij na wi, rat yinach'uch'urisaj, achi'el jun alaxibel-ya' ri k'o pa qejoj, ó jun alaxibel-ya' ri kan nibulbu'x ri nibe-qa k'a pa Líbano.

¹⁶K'ate' ta ri kaq'iq' nipe kere' pa xaman. K'ate' ta ri kaq'iq' nipe kere' pa xokon, richin nuxupuj ri nuqejoj y nutaluj wawe' ri jubulej waq'om. Katanpe k'a wajowanel yin, katanpe chupan ri aqejoj, richin natej ronojel.