Read Kaqchikel Cnt 5 Bible Online

Cnt 5 - Kaqchikel bible

Cnt 5

¹Wajowanel yin, xkinapon k'a awik'in, richin yinach'uch'urisaj rat, ri at achi'el nuqejoj; richin xtinseq ri mirra y ri jubulej taq awaq'om ri niwachin chiri'; richin xtintej ri kab, y richin xtinqum k'a ri vino y ri leche ri ek'o chiri'. ¡Rix qachibil, qojwa-qojuk'ya', qojqumun janipe' ri niqajo'!

²Yin xiwer-qa, jak'a ri wánima kan royoben. Chupan ri achik' ri', xinwak'axaj k'a chi ri wajowanel noyon-pe pa ruchi-jay. Y nubij: Tajaqa' ri ruchi-jay wajowanel yin, nu-paloma yin, ri kan at jebel ok, roma ri nujolon nojineq chik rik'in raxq'ab. Ri raxq'ab richin ri aq'a' kan nibiyin chirij ri rusumal-nuwi', ncha'.

³Jak'a yin xinbij chi xa welesan chik ri nutziaq, y k'o chi xtinkusaj chik qa jun bey. Xinch'ej yan ri waqen, y wi xkipa'e' chik pan ulew, xa xtintz'ilobisaj chik.

⁴Jari' toq ri wachijil xuju-pe ruq'a' pa ventana. Y roma ri' kan janila xkikot ri wánima.

⁵K'ari' yin xiyakatej-q'anej richin ninjeq ri ruchi-jay chuwech rija'. Chirij ri nuq'a' kan nibiyin ri ruya'al mirra. Chirij ri ruwi' taq nuq'a' kan nibiyin-qa ri jubulej aq'om. Roma ri' kan xbiyin chirij ri ch'ich' ri tz'apeyon ri ruchi-jay.

⁶Xinjeq k'a ri ruchi-jay chuwech ri wajowanel, jak'a xa maneq chik ri chiri'. Chupan ri achik' ri' xinel-el pa bey richin xinkanoj, jak'a man xinwil ta. Xinwoyoj, jak'a man jun xch'on-pe chuwe.

⁷Xinkil ri yechajin richin ri tinamit, jak'a xa xinkich'ey y xinkisok. K'ari' xkimej kan ri nutziaq ri nuq'un.

⁸Rix xtani' richin Jerusalem wi nitz'et ri wajowanel ke taq ri', tibana' utzil tibij chire chi yin ninwajo' chi k'o yan ta pe wik'in.

⁹Rat janila at jebejoj ok chikiwech ch'aqa' chik ixoqi', jak'a ¿achike k'a rejqalen k'o ri awachijil, chikiwech ch'aqa' chik achijlonela', chi rat nabij chiqe chi roj niqakanoj?

¹⁰Ri wajowanel yin kan janila jebel ok, kan jebel rubanik y kan tz'aqet. Kan man jun chik achi'el rija' chikikojol e 10,000 achi'a'.

¹¹Ri rujolon nich'ich'an achi'el ri q'anapueq; ri rusumal-ruwi' kan pich'u'y-pich'u'y, y kan xaq-xaq achi'el ri qo'ch.

¹²Ri runaq' taq ruwech kan nuk'ut chi k'o uxlanibel-k'u'x rik'in achi'el ri taq paloma ri e uxlawineq chunaqaj ri ch'uti'n raqen ya'. Chuqa' kan e seq e seq achi'el ri leche.

¹³Ri rupalej nojineq chi jubulej aq'om, y ri ruchi' achi'el ruxla' kotz'i'j lirio.

¹⁴Ri ruq'a' kan e achi'el ch'ich', y q'enq'oj yetzu'un roma e wiqon rik'in q'anapueq y jebelej taq abej. Ri ruch'akul kan seq-seq achi'el ri marfíl, ri e wiqon rik'in jalajoj ruwech abej.

¹⁵Ri raqen kan k'o janila kuchuq'a' achi'el ri pilar ri e banon rik'in mármol, ri ek'o pa ruwi' ri ch'okolibel ri e banon rik'in q'anapueq. Ri rupalen kan achi'el rujotolen ri juyu' Líbano, kan nim rupalen achi'el rujotolen jun tiox-che'.

¹⁶Ri pa ruchi' kan jebel ki'. Kan ronojel chire rija' kan janila utz. Queri' k'a ri wajowanel yin; kan keri' k'a ri nuk'aslen yin, y roma ri' nintzijoj chiwe rix, ixoqi' aj-Jerusalem.