Read Kaqchikel Cnt 7 Bible Online

Cnt 7 - Kaqchikel bible

Cnt 7

¹¡Kan janila taq e jebel ok la awaqen nuben chupan la axajab. Ri ach'akul pa xulan kan janila jebel ok ri rubanik, kan achi'el jun wachibel ri banon rik'in q'anapueq; ri banon roma jun ri kan k'o retamabal chire ri'.

²Ri amuxu'x kan janila ti jebel ok, achi'el jun leq setesik akuchi ninqum-wi vino. Ri apan kan q'enq'oj nitzu'un achi'el trigo montonin kan, y sutin rij rik'in kotz'i'j lirio.

³Ri ruwa-ak'u'x kan e buyul, buyul achi'el ri taq kij ri taq kua'ch masat.

⁴Ri aqul kan liq'-liq' achi'el jun torre ri banon rik'in rey tix. Ri runaq' taq awech kan yech'ich'an achi'el rubanon ri ya' chupan ri yakbel-ya' ri k'o pan Hesbón, ri k'o pan okinen chire ri tinamit ri nibe pa Bat-rabim. Ri atza'n kan jebel ok achi'el ri juyu' Líbano, ri nitzu'un-qa pa Damasco.

⁵Ri ajolon kan jantape' ayakon chikaj, achi'el ri juyu' Carmelo. Ri rusumal-awi' kan jijoj achi'el ri betz' keq. Y roma kan jebel ok, yin xiq'ate' kan chiri'.

⁶Wajowanel yin, rat kan janila at qajineq chinuwech, Kan janila at jebel ok.

⁷Ri apalen achi'el rujotolen jun che' palma, y ri ruwa-ak'u'x achi'el ri tzeqaj ruwech.

⁸Roma ri' yin ninch'ob chi yijote' pa ruwi' ri palma richin ye'ok wichin ri tzeqaj ruwech. Ri ruwa taq ak'u'x e nima'q ta, kan ta achi'el ri tzeqaj ruwech uva. Ri rujubulil ri pan achi' kan ta achi'el ri rujubulil ri manzana,

⁹y ri achi' kan ki' ta achi'el ruki'il ri vino. Kan nibiyin ta ri vino k'a rik'in ri wajowanel.

¹⁰Yin kan irichin ri wajowanel. Y kan xaxe wik'in yin nikikot-wi.

¹¹Katanpe k'a wajowanel yin, jo' pa taq juyu', xtibeqaq'axaj ri aq'a' pa jun ko'ol tinamit.

¹²Y nimaq'a' yan xqojbe richin nibeqatz'eta' ri qatiko'n richin uva. Nibeqatzeta' wi yesijan chik, y wi yesijan chik ri granada. Y chiri' k'a xtinya-wi chawe ronojel ri wajowabal.

¹³Ri rusi'j ri mandrágora*f3* kan janila nijubulin. Y pan okibel chire ri qachoch e nuyakon jalajoj kiwech kab chawe rat. K'o ri kan k'o yan chik q'ij ri ek'o chiri', y k'o ri k'a juba' kenwux, y jari' ri e nuch'aron kan chawe rat, wajowanel yin.