Read Kaqchikel Cnt 8 Bible Online

Cnt 8 - Kaqchikel bible

Cnt 8

¹K'ate' ta at nuxibal, richin keri' toq yatink'ul ta pa bey, yatintz'ubaj ta, y man jun ta xtitze'en chuwij.

²Y yatink'uaj ta el pa rachoch ri nte' richin rat nak'ut chinuwech ri ajowabel. Y yin ninya' ta vino chawe, y chuqa' ninya' ta chawe ruya'al granada.

³Ri awajxokon xtaya' ta chuxe' ri nujolon, y rik'in ri awijkiq'a' xkinaq'etej ta.

⁴Jak'a rix, xtani' ri ixk'o pa Jerusalem, tiya' itzij chi man tik'asoj chi'anin ri ajowabel, k'a ja toq xtapon na ri ruq'ijul.

⁵¿Achike kami ri jotol-pe pa tz'iran ruwach'ulew, y raq'en-pe roma ri rajowanel? Chuxe' jun che' richin manzana xink'asoj ri ajowabel chawe, akuchi ri ate' xyawej kan chawij, y k'ari' xaruya' chuwech re ruwach'ulew.

⁶Kan kinaya' k'a pan awánima. Kan tabana' chuwe achi'el jun awetal chirij ri aq'a', roma ri ajowabel más ruchuq'a' chuwech ri kamik, y chuwech ri jul richin muqbel. Ri ajowabel kan achi'el jun nimalej q'aq'.

⁷Stape' xkepe ronojel ri ya' richin ri palou, man xketikir ta xtikichup ri ajowabel. Ni ri raqen taq ya' chuqa' man xketikir ta xtikichup. Y wi k'o ta jun nusuj ronojel rubeyomel chuwe pa ruk'exel ri awajowabal, yin xa xkitze'en chirij.

⁸K'o jun ti qana' ri k'a ti ko'ol na, y k'a man jani tik'iy-q'anej. ¿Achike k'a xtiqaben rik'in wi xtik'utux?

⁹Roma rija' man achi'el ta jun tz'aq, richin ta niqato' rik'in tobel ri banon rik'in saqipueq. Y chuqa' man achi'el ta ri ruchi-jay, richin ta niqato' rik'in nima'q taq tz'alem ri e banon rik'in tiox-che'.

¹⁰Yin kan in achi'el jun tz'aq chire ri wajowanel, y ri ruwa taq nuk'u'x achi'el ri torre kichin ri chajinela'. Y kan xaxe yirutz'et, kan janila yiqa' chuwech.

¹¹Ri Salomón k'o rulew ri akuchi nutik-wi uva ri chiri' pa Baal-hamón. Y xuya' pa kiq'a' ri xeqajon ri ulew. Y toq niwachin ri tiko'n, chikijujunal nikijech chire, juwineq wo'o' libra saqipueq.

¹²Jak'a ri wulew yin kan ninsipaj chire rija'. Roma ri' rija' tik'oje' kan rik'in ri juwineq wo'o' libra saqipueq ri', y ri ch'aqa' chik chuqa' kek'oje' kan rik'in ri wo'o' libra saqipueq.

¹³Rat, wajowanel ri atk'o chupan ri qejoj, ri qachibil kan nikak'axaj ri ach'abel. Taya' k'a q'ij chuwe richin yin chuqa' ninwak'axaj ri ach'abel.

¹⁴Junanin ri' wajowanel yin. Katanin achi'el nanin jun masat, ri nropiyaj-pe pa ruwi' taq juyu' ri jebel yejubulin.