Read Kaqchikel Isa 10 Bible Online

Isa 10 - Kaqchikel bible

Isa 10

¹Kan toq'ex k'a iwech rix ri niya' pixa' ri man pa ruchojmilal ta; y niya' rutzijol chi ek'o k'ak'a' pixa' ri kan man e koch'el ta.

²Y ri pixa' ri' xa nubij chiwe chi man nitz'aqet ta ri k'o chi niya' chike ri man jun k'o kik'in. Nubij chuqa' chi man k'atzinel ta niya'ox ri ruchojmilal chike ri e poqonatajineq. Ri pixa' ri' nubij chiwe chi man niya' ta kejqalen ri malkani', y chi nuya' q'ij chi k'o niweleq'aj kik'in ri taq meba'i'.

³¿Achike k'a xtiben rix chupan ri q'ij richin ri rutojbalil, toq xkepe nej ri ruk'ayewal? ¿Achoq ik'in xtito-iwi'? ¿Achoq ik'in xke'iya' kan ri ibeyomel?

⁴Kan man jun xtik'oje' kan iwik'in, xaxe xtiqasaj-iwi' chikiwech ri xkixuk'uan-el pa ximonri'il, ó xa xkixkamisex kan. Y man rik'in ri' man ik'owineq ta qa ri royowal ri Jehová. Xa kan k'a ruya'on na q'ij richin yek'is konojel.

⁵Ri Jehová nubij: ¡Toq'ex ruwech ri rey richin ri ruwach'ulew Asiria! Roma rija' xtinqej richin xkeruk'is ri winaqi', toq yakatajineq janila woyowal, kan pa ruq'a' rija' ninya-wi ri woyowal.

⁶Kan xtinteq chirij jun tzobaj winaqi' ri man yinkitzeqelibej ta yin, chirij ri tzobaj winaqi' ri janila mak nikiben chinuwech. Xtinteq richin chi numej-el chuwi-kiq'a' ri k'o rejqalen, y richin chi yeruxeq' kan.

⁷Jak'a ri rey richin Asiria xa kan man nuch'ob ta keri', ni man jari' ta ri nrajo' nuben. Rija' xaxe nuch'ob richin yeruk'is ri tzobaj winaqi' richin ri ruwach'ulew.

⁸Roma rija' runimirisan-ri' y nubij: Chikijujunal ri e aj-raqen pa kiwi' ri aj-labal ri e wichin yin, chuqa' rije' kan e rey.

⁹Xeqach'ek yan ri tinamit Calnó y ri Carquemis. Ri tinamit Hamat y ri Arpad chuqa' kan xeqach'ek yan, y chuqa' xeqawulaj yan ri tinamit Samaria y ri Damasco.

¹⁰Kan xeqach'ek k'a e k'iy tzobaj winaqi' ri janila e k'iy ki-dios, Y ri kiwachibel kan más e jebel chikiwech ri ek'o pa tinamit Jerusalem y ri Samaria.

¹¹Achi'el xinben rik'in ri tinamit Samaria y rik'in ri ki-dios, kan keri' chuqa' xtinben rik'in ri tinamit Jerusalem y ri ruwachibel ri ki-dios, nicha' ri rey richin Asiria.

¹²Ri Dios nubij chik: Toq yin xinwulaj yan ri Sión y ri tinamit Jerusalem, jari' toq yin xtinya' rutojbalil-mak pa ruwi' ri rey richin Asiria roma kan janila xunimirisaj-ri', y kan yirutzu' rik'in nimirisanen.

¹³Roma ri rey kere' ri nubij: Rik'in ri nimalej wuchuq'a', rik'in ri nuna'oj y ri nunojibal xinben ronojel re', Ja yin ri xinelesan ri kik'ulba't ri tinamit ri xeqach'ek yan, y xqak'en-pe ronojel ri kibeyomel. Y kan achi'el ruchuq'a' jun juyubel achij wákix xenbech chi'aqen konojel rey.

¹⁴Y kan xinwelesaj k'a pe ri kibeyomel, achi'el nuben jun wineq toq nuju-qa ruq'a' pa jun ti sokaj, y nrelesaj-pe ri saqmolo'. Ri winaqi' man jun k'a xkiben chuwe achi'el nuben ri aj-xik' chikop kan man nusiloj ta ri ruxik'. Y achi'el ri chikop ri' man niq'ajan ta, ri wineq ri' kan man jun xuch'ojij, nicha' ri rey richin Asiria.

¹⁵Jak'a ri Jehová nubij: ¿Nitikir kami niyakatej-el ruyon ri ikej? ¿Nitikir kami ri qupibel-che' nunimirisaj-ri' roma xuqupij ri che'? ¿Nitikir kami jun ch'ame'y nuyek-q'anej ri ruq'a' ri uk'uayon richin?

¹⁶Roma ri' yin Jehová ri k'iytisanel richin ronojel, xa kan xtinteq-pe jun nima-yabil pa kiwi' ri aj-labal aj-Asiria. Y chuqa' ri yabil ri' xtibeqaqa pa ruwi' ri ki-rey, y rija' kan xtipe jun nimalej k'aten chirij, achi'el xa ta k'o racheq-q'aq' chupan ri rutziaq.

¹⁷Ri Dios kan nusaqirisaj ri kibey ri winaqi' israelita. Jak'a chike ri aj-Asiria xa kan xtok jun achi'el ruxaq-q'aq'. Kan pa jun q'ij k'a xkeruporoj konojel, achi'el nuben ri q'aq' toq nuk'et ri k'ix y ri ruxulu-kiej.

¹⁸Chuqa' kan xtink'is ri jebelej taq ruk'echelaj, y ri qasanbel-ulew kan xkechaqer, achi'el nuben jun yawa' toq eqal-eqal nik'is-qa.

¹⁹Y ri che' ri xekanej kan chupan ri k'echelaj, kan janila e juba' chik ok, y jun ak'ual nitikir nrajlaj, nicha' ri Dios.

²⁰Chupan k'a ri q'ij ri' xkekolotej jujun chike ri qawinaq. Y rije' kan man xtikikuquba' ta chik kik'u'x kik'in ch'aqa' chik winaqi', roma xa xkekimalij kan y xtibe'ok etzelanel kichin. Jak'a kan xtikikuquba' kik'u'x rik'in ri Jehová, ri Loq'olej qa-Dios qichin roj ri oj aj-Israel.

²¹Ri winaqi' ri xkek'oje' kan, kan xketzolej-pe pan Israel. Chuqa' kan xtitzolej-pe kik'u'x rik'in ri Dios ri k'o janila uchuq'a' rik'in.

²²Stape' ri qawinaq israelita janila e k'iy, achi'el ri rajlabal ri sanayi' ri k'o chuchi' ri palou, xa kan xaxe chik juba' chike rije' ri xketzolin. Roma ri Dios kan rubin chi rije' kan xkek'is, richin kan xtiq'alajin ri ruchojmilal ri nuben rija'.

²³Ri Jehová ri k'iytisanel richin ronojel kan rubin k'a chi yeruk'is chijun ri ruwach'ulew Israel; y ri rubin kan xtuben.

²⁴Roma ri' ri Jehová k'iytisanel richin ronojel kere' nubij: Nutinamit yin, ri ixk'o pa tinamit Sión, man tik'en kikiy ri aj-Asiria, roma xa xkixkich'ey rik'in ri kich'ame'y achi'el xkiben ri aj-Egipto kik'in ri iwati't-imama'.

²⁵Roma chiwech-apo xa kan xtik'is ri woyowal chiwij rix, y ri woyowal kan xtiq'ax kan pa kiwi' ri aj-Asiria, nicha'.

²⁶Ri Jehová ri k'iytisanel richin ronojel kan xtuya' ruk'ayewal pa kiwi' rik'in jun kow ch'ayibel, achi'el xuben chike ri aj-Madián chiri' akuchi k'o-wi ri nimalej abej Oreb. Y rija' kan xkerukamisaj ri e aj-Asiria, achi'el toq xutzeqej ri ruch'ame'y pa ruwi' ri ya', y kan xerukamisaj ri aj-Egipto.

²⁷Y chupan k'a ri q'ij ri', rije' kan man xkixkineq ta chik, achi'el toq nelesex jun ejqa'n chiwij, achi'el nelesex ri che' ri ya'on chikiqul ri bóyix.

²⁸Ri aj-Asiria yepe kere' pa tinamit Aiat; yeq'ax-pe pa tinamit Migrón, chiri' pa tinamit Micmás nikiya-wi kan ronojel ri kik'uan.

²⁹Nikiq'axaj-el ri ti raqen-ya', chiri' pa tinamit Gueba yek'oje-wi-qa. Ri winaqi' aj-Ramá yebaybot roma xibinri'il, y ri aj-Guibeá, akuchi xk'oje-wi ri Saúl, xa ye'animej-el.

³⁰Yesik'in ri aj-Bat-galim, ri aj-Laisa nikak'axaj. Toq'ex kiwech ri aj-Anatot.

³¹Ri winaqi' aj-Madmená xa ye'animej-el, y ri aj-Guebim xa nikewaj-ki'.

³²Ri aj-Asiria ek'o chik pa tinamit Nob. Nikiya' retal richin nibekichapa' chi oyowal ri juyu' Sión, taq'aj kojol juyu' richin Jerusalem.

³³Jak'a ri Jehová k'iytisanel richin ronojel. Rija' kan yerelesaj-el rik'in uchuq'a', achi'el nichoy-el jun ruq'a-che'. Rije' yek'is, achi'el toq yechoy ri nima'q taq che'.

³⁴Stape' rije' janila e k'iy, achi'el kajlabal ri che' ri ek'o pa k'echelaj, kan yeruk'is-el konojel. Stape' janila e nima'q, achi'el ri tiox-che' ri ek'o pa Líbano, xketzaq pa ruq'a' ri Jehová k'iytisanel richin ronojel.