Read Kaqchikel Isa 11 Bible Online

Isa 11 - Kaqchikel bible

Isa 11

¹Ri rijatzul kan ri Isaí achi'el jun che' toq choyon chik el. Achi'el ri k'ak'a' taq ruq'a' ri nibejotayin chik pe chire jun kuta'm, keri' chuqa' xtibek'ulun chik pe jun rey chikikojol ri e rijatzul kan ri David.

²Y ri Espíritu richin ri Jehová kan jantape' k'a xtik'oje' rik'in, richin niberuya' na'oj y nojibel, richin niberuya' uchuq'a' y etamabel, richin xtok pixabanel. Y xtik'oje' rukiy ri Jehová chuwech.

³Rija' kan xtiqa' chuwech xtunimaj rutzij ri Jehová. Rija' man xtuq'et ta tzij pa ruwi' xaxe rik'in ri nutz'et, ni xaxe rik'in ri nrak'axaj.

⁴Xtuq'et k'a tzij pa ruchojmilal pa kiwi' ri man jun k'o kik'in, chuqa' kan pa ruchojmilal xtuq'et-tzij pa kiwi' ri man kinimirisan ta ki'. Ronojel ri xtubij, jari' ri xtibanatej chupan chijun ruwach'ulew, Y rija' kan xkerukamisaj k'a konojel ri e banoy taq etzelal.

⁵Roma ronojel xtuben pa ruchojmilal, man jun bey xtitzaq pa jun pajk'ibel; y roma kan jantape' xtuben ri nubij, xtitikir xtuk'achojirisaj ri rusamaj.

⁶Roma rija' xtik'oje' uxlanibel-k'u'x: Jun utiw kan junan k'a xtibiyaj rik'in jun karne'l, jun balma y jun tzuntzun kan junan k'a xke'uxlan, y kan man xtikixibij ta ki'. Jun ti alaj wákix y jun koj kan junan k'a xkek'iy-el. Rije' kan xtikinimaj k'a tzij, stape' jun ti ala' ri xtibeyuq'un kichin.

⁷Jun wákix xtiwa' k'a junan rik'in jun oso, y ri taq kal kan junan k'a xke'uxlan. Chuqa' ri koj xaxe chik q'os xtikitej, achi'el nikitej ri bóyix.

⁸Jun ti ne'y kan xtik'oje' chunaqaj jun jul richin jun kumetz, chuqa' jun ti ak'ual xtitikir xtuju-qa ruq'a' pa rusok jun kumetz, y man jun xtuk'uluwachij.

⁹Kan man jun k'a itzel ri xtik'uluwachitej chiri' pa juyu' Sión, roma chijun ri ruwach'ulew kan xtinoj rik'in etamabel richin ri Jehová, achi'el ri ya' nunojisaj ri palou.

¹⁰Toq ri rijatzul kan ri Isaí xtipe, re' jare' jun retal kichin ri tinamit richin xtitzolin-pe kik'u'x rik'in. Y ri akuchi xtik'oje-wi, kan janila nim ruq'ij-ruk'ojlen.

¹¹Chupan k'a ri q'ij ri', ri Jehová kan xtuk'ut chik jun bey ri nimalej ruchuq'a' richin yerumol konojel ri qawinaq ri man jani ketzolin-pe. Xtuben k'a chi xketzolin konojel ri ek'o chiri' pan Asiria, pan Egipto, pan Etiopía, pan Elam, pa Babilonia, pan Hamat, y ri ruwach'ulew ri ek'o chuchi' ri palou.

¹²Ri Dios xtuya' k'a jun retal kichin ri winaqi' richin ri ruwach'ulew chi xkerumol k'a konojel qawinaq ri e uk'uan-el juk'an chik ruwach'ulew. Xkerumol chik k'a konojel qawinaq ri e talutajineq chuwech ri ruwach'ulew. Xkeruk'en-pe ri ek'o pa relebel-q'ij, pa xokon, pa xaman y pa qajbel-q'ij chire ri ruwach'ulew.

¹³Ri ch'upun-k'u'x ri k'o kik'in ri qawinaq ri ek'o pa xaman chire ri ruwach'ulew Israel kan xtik'is. Y man itzel ta chik xtikina' chiqe roj ri ojk'o wawe' pa ruwach'ulew Judá. Chuqa' ri ch'upun-k'u'x ri k'o kik'in ri qawinaq ri ek'o wawe' pa Judá kan xtik'is. Y man itzel ta chik xtikina' chike ri ek'o chiri' pa xaman.

¹⁴Chi e ka'i' tinamit xkeyakatej-el chikij ri aj-Filistea ri ek'o pa qajbel-q'ij. Chuqa' xtiqelesaj ri kibeyomel ri tzobaj winaqi' ri ek'o pa relebel-q'ij. Xqojyakatej chikij ri edomita y ri moabita. Y ri amonita kan xkek'oje' chuxe' ri qatzij roj.

¹⁵Ri Jehová kan xtuchaqirisaj ri Kaqa-Palou richin xtujeq kibey ri xketzolin-pe. Kan rik'in jun k'aten kaq'iq' xtichaqer ri raqen-ya' Éufrates, richin xkek'oje' xaxe wuqu' taq ruq'a' ri raqen-ya' ri', richin ri xketzolin-pe xketikir xkeq'ax chikaqen chupan.

¹⁶Chuqa' xtibek'oje' jun nimalej bey richin xkeq'ax-pe chupan ri xketzolin-pe pan Asiria. Y ri bey ri' kan janila nim, achi'el ri bey ri xk'oje' chupan ri Kaqa-Palou, toq ri qati't-qamama' xe'el-pe pa ruwach'ulew Egipto.