Read Kaqchikel Isa 15 Bible Online

Isa 15 - Kaqchikel bible

Isa 15

¹Ri Dios xuq'alajirisaj chinuwech ri xtiberuk'uluwachij ri ruwach'ulew Moab. Y jare' ri rutzijol: Ri tinamit Ar kan xtik'is k'a chupan jun aq'a'. Keri' chuqa' ri tinamit Quir.

²Ri winaqi' aj-Dibón xkejote-el pa ruwi' ri juyu' richin xkebe'oq'. Konojel xkebe chupan ri rachoch ri ki-dios richin xkejiq'ijo'x, toq xkek'is ri tinamit Nebo y ri Medebá. Konojel rije' kan xtikisokaj k'a ri rusumal-kiwi' y ri rusumal-kichi' roma bis.

³Ri pa taq bey konojel ri winaqi' xkebiyaj rik'in tzieq qiriqoj richin bis; pa ruwi' ri taq kachoch xkesik'in roma q'axo'n. Ri pa taq nima'q ruwech bey, konojel ri winaqi' man xtik'oje' ta chik kuchuq'a' roma janila xke'oq'.

⁴Konojel ri winaqi' ri ek'o pa tinamit Hesbón y ri pan Elalé janila xkesik'in chi oq'ej, y re' xtak'axatej k'a pa tinamit Jahas. Roma ri' ri aj-labal aj-Moab xkebaybot roma xibinri'il.

⁵Toq'ex iwech rix aj-Moab, roma konojel xke'animej-el, y xkebe k'a pa tinamit Sóar y k'a pan Eglat-selisiya. Rije' chi'anin xke'animej-el, achi'el nikiben ri taq wákix ri k'o oxi' kijuna'. Ri winaqi' kan xke'oq' xkejote-el pa tinamit Luhit, y kan janila xkesik'in roma bis xkebe chupan ri bey richin ri tinamit Horonaim.

⁶Ri ch'uti'n raqen-ya' richin Nimrim kan bis-bis xtuben kan. Ronojel ruwech ichaj y ronojel ruwech che' xkechaqi'j. Y kan man xkeraxer ta chik pe.

⁷Roma ri' konojel winaqi' xtikik'uaj-el ri juba' kibeyomel chuwi' taq kitele'n, richin xtikiq'axaj-el ri ch'uti'n raqen-ya' Álamo. Y ri xtikik'uaj-el, kan e samajineq k'iy juna' richin kich'akon.

⁸Ri raqoj-chi'ij kichin ri winaqi' ri' xtapon k'a pa ruk'ulba't ri ruwach'ulew Moab. Ri koq'ej xtapon k'a pa tinamit Eglaim y pa Beer-elim.

⁹Y ri ya' ri nipe pa tinamit Dimón xa kan xkenoj chi kik'; jak'a ri Dios kan xtuteq-pe más nima'q taq ruk'ayewal pa kiwi' rije'. Roma kan xkeruteq-pe koj chikij, ri winaqi' ri k'a xkek'ase' kan chiri'.