Read Kaqchikel Isa 16 Bible Online

Isa 16 - Kaqchikel bible

Isa 16

¹Rix aj-Moab, ke'itaqa' k'a el chikopi' richin sipanik. Ke'itaqa' alaji' taq karne'l chike ri aj-raqen aj-Judá. Ke'iya' re sipanik re' nitiker-pe pa tinamit Selá, niq'axaj pa tz'iran ruwach'ulew, y napon k'a pa Sión.

²Ri ixoqi' aj-Moab xa ye'animej; Kitalun-el-ki' chupan ri raqen-ya' Arnón, achi'el niban chike ri aj-xik' taq chikopi' toq ye'elesex-el pa kisokaj.

³Rije' xech'on kik'in ri qawinaq israelita. Nikik'utuj chi ke'ewex, y man kesujux ri e animajineq-el. Nikajo' chi yeqato' richin yojok jun muj chike rije', achi'el nuben jun muj pa nik'aj-q'ij.

⁴Nikajo' chi niqaya' k'a q'ij chike richin nikewaj kan ki' qik'in. Nikik'utuj chi yojok tobel kichin rije', k'a toq ri ruk'ayewal xtitane', y kan xk'is yan ri wululen, jari' toq man xketz'ilox ta chik ri winaqi' aj-Moab,

⁵toq xtipe jun rey ri k'o joyowanik rik'in. Rija' jun chike ri rijatzul kan ri David, y kan xtiberuq'ata-tzij rik'in chojmilal. Kan chi'anin xtuq'et-tzij pa ruchojmilal.

⁶Kan qak'axan k'a ri kinimirisanen ri winaqi' aj-Moab. Chuqa' kan maneq kik'ix, Rije' nikinimirisaj ri kibanobal, jak'a konojel man qitzij ta ri nikibij.

⁷Roma ri' konojel ri aj-Moab kejilon k'a. Ke'oq' k'a roma xek'is ri achi'a' aj-Quir-haréset.

⁸Ri ulew ri tiko'n uva chuwech richin Hesbón kan xk'is yan, roma ri etzelanel kichin kan xkixeq' kan. Keri' chuqa' xkiben rik'in ri tiko'n uva ri k'o pa Sibmá. Ronojel ri kiruwach'ulew xnoj chi tiko'n uva, y xapon k'a pa xaman chire ri tinamit Jazer. Chuqa' kan xapon k'a chuchi' ri tz'iran ruwach'ulew ri k'o pa relebel-q'ij, y xapon k'a chuchi' ri Tzayi-Choy ri k'o pa qajbel-q'ij.

⁹Roma ri' yojoq' achi'el ye'oq' ri winaqi' aj-Jazer, roma ri tiko'n uva ri ek'o pa Sibmá, ri Hesbón y ri Elalé. roma kan pa ruwi' ri tiko'n y ruwech ri tiko'n xban-wi ri labal. Kan maneq chik kikoten toq niwux ruwech ri uva, y kan man niban ta chik nimaq'ij roma toq niwachin ri uva.

¹⁰Kan xk'is k'a ri kikoten chupan ri juyu' richin tiko'n. Chupan ri ulew richin tiko'n kan man jun chik nibixan. Kan man jun chik nipitz'on uva richin k'o ta vino, y ri raqoj-chi'ij richin ri nisamej chiri' kan xk'is.

¹¹Roma ri' ri wánima kan janila niq'axon roma ri Moab, chuqa' janila q'axomarineq ri wánima roma ri tinamit Quir-haréset.

¹²Stape' ri aj-Moab yebe akuchi ek'o-wi ri wachibel ri nikiya' kiq'ij, y stape' kan janila yekos richin yejote-el chiri' richin yech'on kik'in ri ki-dios, stape' ronojel re' kan man jun xtuq'ajuj. Keri' xubij ri Jehová chuwe.

¹³Ja k'a ch'abel re' ri xuq'alajirisaj ojer kan ri Jehová chirij ri ruwach'ulew Moab.

¹⁴Jak'a re wakami, ri Jehová nubij chi chupan-apo oxi' juna', ri runimirinen ri Moab kan xtiqasex ruwi'. Y stape' janila chi winaqi' ri ek'o chiri', xa kan e juba' ok ri xkek'oje' kan. Y ri xkek'oje' kan xa kan xtik'is ri kuchuq'a'. Y ri q'ij richin xtibanatej re' kan ja yan re wakami xtajlex-el, achi'el nrajlaj ruq'ij jun achin ri nisamej chi q'ij.