Read Kaqchikel Isa 17 Bible Online

Isa 17 - Kaqchikel bible

Isa 17

¹Ri Dios xuq'alajirisaj chinuwech ri xtibebanatej pa ruwi' ri ruwach'ulew Siria. Y jare' k'a ri rutzijol: Ri tinamit Damasco xa kan xtibek'is. Xa kan xtok achi'el wuluwik abej.

²Ri taq tinamit richin ri ruwach'ulew Aroer kan xkemalix kan, y xa kan xtok soq'olbel. Ri taq chikopi' kan jebel k'a ri xkewa' chiri' roma kan man jun xke'oqotan-el.

³Ri tinamit ri sutin-kij ri ek'o chiri' pan Israel kan xkewulatej, Y ri uchuq'a' ri k'o rik'in ri rey richin Damasco xa xtelesex-el. Y ri juba' ri xkekolotej kan chike ri aj-Siria xa kan xkek'ixbitej achi'el xkiben ri aj-Israel. Yin Jehová k'iytisanel richin ronojel ri yinbin.

⁴Chupan k'a ri q'ij ri' ri rajawaren ri Israel kan xtiqasex ruq'ij, y chuqa' kan xtik'is ronojel rubeyomel. Y ronojel xtuk'uex-el,

⁵achi'el nuben jun tikonel trigo toq niwachin ri rutiko'n chiri' pa taq'aj richin Refaim. Xa kan rik'in ri ruq'a' xtumol-wi ronojel ri trigo, y man jun xtuya' kan.

⁶Jak'a kan k'o k'a juba' ri xtik'oje' kan, achi'el yek'oje' kan jujun aceituna toq nisilox ri che'. Xa kan keri' xtiban kik'in ri winaqi' israelita. Yin Jehová ri k'o ronojel uchuq'a' pa nuq'a' ri yibin.

⁷Chupan k'a ri q'ij ri', rix k'ari' xkinikanoj yin ri xibanon iwichin. K'ari' xkinitz'et yin, ri Loq'olej i-Dios.

⁸Xa kan xtimulun ik'u'x chirij ri porobel ri xe'iben rix, y xa kan man xtitzu' ta chik ronojel ri wachibel ri xe'iben. Chuqa' man xtich'ob ta chik ri ruwachibel ri Asera, y ni ri porobel-pom ri xe'iben.

⁹Chupan k'a ri q'ij ri', ri itinamit ri jebel tz'apen-kij xa kan xkebetole' kan. Rix xe'iwelesaj-el ri winaqi' heveo y ri amorreo, jak'a re wakami keri' chuqa' xtinben iwik'in rix. Xaxe chik ri q'ayis ri xtik'oje' kan.

¹⁰Kan xinimestaj yin ri xikolon iwichin, y kan man xoqaqa ta chi'ik'u'x chi ja yin ri itobal. Jak'a pa ruk'exel, rix nitik k'a ruwech ri qejoj ri kan jebel niwachin, richin niya' kiq'ij ri ch'aqa' chik dios.

¹¹Chupan k'a ri q'ij toq rix niben-qa ri itiko'n, kan nichajij. Niben chire chi ri jun chik q'ij nik'iy-pe. Man rik'in ri' ri iqejoj ri' man jun xtuq'ajuj, roma xtipe itzel yabil chiwij, y kan man jun chik raq'omal. Ri winaqi' israelita nikibixaj:

¹²Janila chi winaqi' richin ri ch'aqa' chik ruwach'ulew ri yeq'ajan, achi'el kich'abel ri ya' toq yebolqo't pa ruwi' ri palou. Keri' ri raqoj-chi'ij richin ri ruwach'ulew kan janila kow nak'axatej, achi'el ri raqen-ya' toq niwajin.

¹³Jak'a ri Dios yeruch'olij ri winaqi' ri', y rije' xa kan ye'animej-el nej. Xke'uk'uex-el achi'el ri páxa ri uk'uan-el roma ri kaq'iq'. Xketalux-el achi'el nuben ri surkum rik'in ri poqolaj.

¹⁴Toq niqaq'ij-qa xa kan kikiy. Jak'a toq niseqer-pe xa e maneq chik ri e etzelanel qichin; xa nikitaluj-el-ki'. Keri' k'a xtiban chike ri k'o nikelesaj-el chiqe; jare' k'a ri xtikik'uluwachij ri yetz'ilo qichin, xkecha'.