Read Kaqchikel Isa 18 Bible Online

Isa 18 - Kaqchikel bible

Isa 18

¹Toq'ex ruwech ri ruwach'ulew Etiopía ri akuchi janila sak' ek'o.

²Chuqa' janila raqen taq ya' ri chiri'. Kan xketaq k'a el taqonela' chupan taq juku' ri e banon rik'in pop. Kan anineq k'a xkebe ri taqonela' ri' kik'in ri aj-Etiopía, akuchi kiyon e nima'q kipalen winaqi' ek'o, y kan taq e q'eq ri yetzu'un; jun tinamit janila kikiy.

³Rix ch'aqa' chik winaqi' ri ixk'o chuwech re ruwach'ulew, toq xtiya'ox retal pa ruwi' ri juyu' kan titzu' k'a jebel ri ruk'ayewal ri xtiqaqa pa kiwi', y toq xtixupux ri trompeta, chuqa' kan tiwak'axaj k'a.

⁴Roma ri Jehová nubij chi toq xtiqaqa ri ruk'ayewal ri', kan k'a chila' chikaj xtutzu-pe, achi'el nuben ri q'ij pa nik'aj-q'ij pa saq'ij, y chuqa' achi'el nitz'ujan ri sutz' toq niwachin ri tiko'n.

⁵Xtisijan-pe ri kitiko'n, jak'a man jani tichaq'aj-pe ri ruwech, Ri Dios xtujol-el ri ruxaq y xkeruchoy-el ri ruq'a'.

⁶Y ri kich'akul ri aj-Etiopía kan xkepunupuxin kan pa taq juyu'. Kan xke'ok richin kiway ri aj-xik' taq chikopi', y ri k'uxunela' taq chikopi' ri ek'o pa k'echelaj. Y re' xtik'atzin richin kiway ri aj-xik' taq chikopi' richin ri saq'ij. Y chuqa' xtik'atzin richin kiway ri k'uxunela' taq chikopi' richin nikik'owisaj ri ruq'ijul job.

⁷Chupan apo ri q'ij ri' ri aj-Etiopía xtikik'en-pe sipanik chuwech ri Jehová k'iytisanel richin ronojel, stape' rije' jun tinamit e nima'q kipalen winaqi', y stape' e q'eq yetzu'un, ri kan nak'en kikiy pa rutikeribel. Wakami rije' janila kuchuq'a' k'o, y kan yech'akon toq k'o oyowal. Y ek'o pa jun ruwach'ulew akuchi nibiyin raqen taq ya'. Jak'a chupan ri q'ij ri' kan xtiya'ox sipanik chire ri Jehová k'iytisanel richin ronojel, ri k'o pa juyu' Sión.