Read Kaqchikel Isa 19 Bible Online

Isa 19 - Kaqchikel bible

Isa 19

¹Ri Dios xuteq-pe rutzijol ri xtibebanatej pa ruwi' ri ruwach'ulew Egipto, y jare' k'a: Titz'eta' chi ri Jehová peteneq pa jun sutz', ri anineq peteneq pa ruwach'ulew Egipto. Y konojel k'a ri kiwachibel ri ch'aqa' chik dios kan xkebaybot chuwech. Chuqa' ri winaqi' ri ek'o chiri' kan xtimayamo-qa ri kánima.

²Ri Dios xtuben chike konojel ri aj-Egipto chi xkeyakatej chikij ri kiwinaq. Xa kan xkeyakatej k'a chikij ri kach'alal, y chikij ri kachpochel. Xa kan xkeyakatej tinamit chikij ch'aqa' chik tinamit, y xa kan xkeyakatej k'a aj-raqen chirij jun chik aj-raqen.

³Konojel k'a ri winaqi' aj-Egipto xa xtisach kik'u'x, roma ri Dios kan xtuben chike richin man jun chik xketikir xtikiben. K'ari' xkekik'ulubej kiwachibel ri ki-dios; xkebe kik'in aj-itza'; xkekik'ulubej itzel taq espíritu y kik'in ri nikibananej chi ketaman ri peteneq chikiwech.

⁴Jak'a ri Dios kan xkerujech pa ruq'a' jun rey ri man aj chiri' ta, ri kan janila itzel. Jun q'atoy-tzij ri man jun joyowanik k'o kik'in kan xtuq'et-tzij pa kiwi'. Ri Jehová k'iytisanel richin ronojel keri' nubij.

⁵Ri raqen-ya' Nilo kan xtik'is; kan xtik'is y kan xtichaqi'j.

⁶Ri rubey ya' kan xtichuwir k'a pe. Ri akuchi niq'ax-wi-pe ri ya' xa xtitzaj ruwech y xtichaqi'j. Y ri aj y ri pop xa kan xkechaqi'j-qa.

⁷Ronojel ri q'ayis ri ek'o chuchi' ri raqen-ya' kan xkek'is-el jumul, chuqa' ronojel ri tiko'n ri e banon-qa chiri' kan xkechaqi'j-wi.

⁸Ri yekarun kan janila xkebison; kan xkek'oje' k'a pa bis konojel ri yekarun ri chiri' pa raqen-ya'.

⁹Chuqa' ri winaqi' ri yejosq'in ri pop richin niban ri lino, kan janila xkebison. Ri yesamajin ri lino kan xtisach k'a kik'u'x.

¹⁰Ri aj-kem kan janila xkek'oje' pa k'ayew, y ri e aj-chiq'ij kan xtiq'axon kánima.

¹¹Chupan ri q'ij ri' ri e tata'al richin ri tinamit Soan kan xke'ok e nakaneq, roma man xketikir ta chik xtikiya' pixabanik. Konojel ri e rupixabanela' ri rey richin Egipto xa kan man xtik'oje' ta chik kina'oj. Y man xketikir ta chik xtikibij chire ri rey chi rije' e alk'ualaxela' kichin achi'a' aj-na'oj, o e tzeqelibey kichin e ojer taq rey.

¹²Chuqa' e maneq chik achi'a' aj-na'oj e richin ri rey, richin nikibij chire ri achike ruch'obon ri Dios pa ruwi' ri kiruwach'ulew.

¹³Ri e tata'al ri ek'o pa Soan kan maneq chik kina'oj; ri e tata'al ri ek'o pa tinamit Menfis xa xkeq'olotej. Xa kan xkisech kik'u'x ri winaqi' aj-Egipto.

¹⁴Ri Jehová kan xtuben chike chi xkemayamo-qa. Y roma ri ruk'ayewal, rije' xtikiben achi'el nuben jun q'abarel, toq nixa'a' y nitzaq-qa chupan ri'.

¹⁵Y kan man jun chik wineq xtitikir ta xtiberuchojmirisaj chik jun bey ri ruwach'ulew Egipto stape' aj-na'oj o man aj-na'oj ta.

¹⁶Chupan ri q'ij ri' konojel achi'a' aj-Egipto xa kan xtikiben achi'el nikiben ri ixoqi'; roma kan xtikixibij-ki' y kan xtikik'en rukiy ri Jehová k'iytisanel richin ronojel, toq xtutzeqej ri nimalej ruq'a' pa kiwi' rije'.

¹⁷Toq xtikich'ob pa ruwi' ri ruwach'ulew Judá, ri aj-Egipto kan janila xtikik'en rukiy. Y pa ruwi' ri', toq xtinatex ri Judá, xa kan nikik'en janila rukiy, roma ri Jehová k'iytisanel richin ronojel kan k'o ruch'obon pa kiwi'.

¹⁸Chupan k'a ri q'ij ri' ri wo'o' tinamit ri kan k'o janila kejqalen ri chiri' pan Egipto, xkech'on pa ch'abel hebreo. Chuqa' kan xtikiya' kitzij pa rubi' ri Jehová k'iytisanel richin ronojel. Y jun chike re tinamit re' ja ri Herez.

¹⁹Chupan ri q'ij ri' xtik'oje' porobel richin ri Jehová pa runik'ajal ri Egipto. Chuqa' pa ruk'ulba't ri ruwach'ulew xtiban-el jun tz'aq richin niya'ox ruq'ij ri Jehová.

²⁰Y re' kan xtik'atzin chike ri winaqi' richin jun retal richin chi noqaqa chikik'u'x ri Jehová chiri' pan Egipto. Toq xkech'on rik'in ri Jehová richin nikik'utuj to'onik koma ri yetz'ilo kichin, rija' kan xtuteq k'a pe jun kolonel kichin richin chi yeruto'.

²¹Ri Jehová kan xtuk'ut nima'q taq rubanobal chikiwech ri aj-Egipto, y rije' kan xtiketamaj ruwech ri Jehová chupan ri q'ij ri'. Xtikiya' ruq'ij y xtikisuj k'a kamelabel y sipanik chuwech, y kan nikiben ri nikibij.

²²Y kan keri' k'a ri Jehová kan xkerukol toq xuya' yan ri ruk'ayewal pa kiwi'. Rije' kan xtitzolin-pe kik'u'x rik'in, y rija' kan xtujoyowaj kiwech y kan xkeruto'.

²³Y chupan k'a ri q'ij ri' kan xtik'oje' k'a jun bey chiri' pan Egipto richin nibe pan Asiria. Ri aj-Asiria xke'apon pa ruwach'ulew Egipto, y ri aj-Egipto xke'apon pa ruwach'ulew Asiria, y keri' rije' kan junan k'a xtikiya' ruq'ij ri Jehová.

²⁴Chuqa' chupan k'a ri q'ij ri' ri ruwach'ulew Israel kan xtik'oje' k'a apo chunaqaj ri Egipto y ri Asiria. Xke'ok urtisanik chikikojol ri ruwach'ulew.

²⁵Jari' toq ri Jehová k'iytisanel richin ronojel xtuya' ri urtisanik pa kiwi' ri Egipto y ri Asiria, y xtubij chi rije' e richin rija' achi'el ri aj-Israel.