Read Kaqchikel Isa 2 Bible Online

Isa 2 - Kaqchikel bible

Isa 2

¹Jare' k'a ri xq'alajirisex chinuwech yin Isaías, ri achike xtibekik'uluwachij ri tinamit Jerusalem y ri ruwach'ulew Judá.

²Chupan ri ruk'isibel taq q'ij, xtijikibex k'a ri juyu' Sión, ri akuchi k'o-wi ri rachoch ri Jehová. Y jak'a juyu' ri' ri más nej jotol chikaj, kan janila nim chikiwech ri ch'aqa' chik juyu' ri ek'o chunaqaj. Y konojel k'a ri winaqi' richin ri ruwach'ulew xtikinojisaj ri ruwech.

³Janila chi winaqi' xke'apon y xtikibij k'a chikiwech: Kixanpe, qojjote-el pa ruwi' la juyu' richin ri Jehová. Jo' chupan ri rachoch ri ki-Dios ri israelita. Chiri' ri Jehová xtiberuk'utu' ri rubey chiqawech, y roj kan xqojtikir xqojbiyin chupan. Roma chiri' pa Sión xtel-wi-pe ri rutijonik ri Jehová, y chiri' pa Jerusalem xtibeq'alajin-wi ri ruch'abel, xkecha'.

⁴Ri Jehová xtiq'aton-tzij chikikojol ri ch'aqa' chik winaqi'. Rije' man jun chik labal xtibekibana'. Roma ri' ri ki-espada xa xtikijel rubanik, y xtikiben arado chike. Chuqa' ri kikum xa xtikiben kijos chike. Man jun chik ruwach'ulew xtiyakatej chirij jun chik ruwach'ulew, ni man xketijox ta chik richin yebe pa taq labal.

⁵Y ri israelita xtikibij: ¡Wakami k'a roj ri oj aj pa rachoch kan ri Jacob, qojbiyin pa saqil ri ruya'on kan ri Jehová!, xkecha'.

⁶Kan qitzij na wi, rat Jehová xa xojawetzelaj kan roj ri oj atinamit, roj ri oj rijatzul kan ri Jacob. Roma ri qawinaq kan xkinimaj ri kibanobal ri winaqi' ri e peteneq pa relebel-q'ij, banobel ri man jun rejqalen. Nikik'utuj chike ri winaqi' ri ketaman ri peteneq chiqawech-apo, achi'el nikiben ri aj-Filistea. Chuqa' kan nikiya' k'a kitzij kik'in ri man e aj chiri' ta.

⁷Ri qaruwach'ulew xa kan nojineq rik'in q'anapueq y saqipueq. Ri qabeyomel xa man ajlatel ta. Chuqa' chupan ri qaruwach'ulew janila chi kiej ek'o, y ri carruaje kan man e ajlatel ta.

⁸Chuqa' pa qaruwach'ulew janila chi wachibel ek'o richin nikiya' kiq'ij. Kan nikiya' kiq'ij ri xa ja ri kiq'a' ri banayon.

⁹Rik'in k'a ronojel re' kan xtibeqasex kiq'ij, y kan xkek'ixbitej. Roma ri', rat Jehová, man takuy kimak.

¹⁰Roma ri' rix winaqi' tiwewaj-iwi' chikikojol nima'q taq abej, Tiwewaj-iwi' chuxe' taq jul. Tiwewaj k'a iwi' chuwech ri Jehová, roma rija' kan k'o rukiy y ri rusaqil ri ruk'ojlemal kan nunojisaj ri ruwach'ulew rik'in xibinri'il.

¹¹Y xtapon k'a jun q'ij toq ri kinimirisan-ki' k'o chi xtikiqasaj-ki'. Kan xtiqasex k'a kiq'ij roma ri kibanobal. Kan xaxe chik ri Jehová ri xtinimirisex ruq'ij chupan ri q'ij ri'.

¹²Roma ri q'ij richin ri Jehová ri k'iytisanel richin ronojel, xtoqaqa pa kiwi' konojel winaqi' ri kinimirisan-ki'; pa kiwi' konojel winaqi' ri kan janila nikina-ki', y kan xtiqasex k'a kiq'ij.

¹³Kan xtiqasex k'a kiq'ij konojel ri nima'q taq kipalen ri ek'o chuwech re ruwach'ulew: ri e nima'q taq tiox-che' ri ek'o pa Líbano, ri e nima'q taq paten-che' ri ek'o pa Basán,

¹⁴ri e nima'q taq juyu', y chuqa' ri ch'aqa' chik juyu',

¹⁵ri jay ri janila e nima'q kipalen, y ri e nima'q taq tz'aq,

¹⁶ri e nima'q taq che' ri e ya'on chupan ri barco ri ek'o pa Tarsis, y ri ch'aqa' chik jebelej taq barco.

¹⁷Y wi ronojel re' xtiqasex kiq'ij, k'atala' chik ri winaqi' ri kinimirisan-ki'. Xa kan xaxe chik k'a ri Jehová xtuk'ut ri ruk'ojlen chupan ri q'ij ri'.

¹⁸Y kan xkeruk'is k'a el ronojel kiwech taq wachibel ri yekiya' kiq'ij.

¹⁹Toq ri Jehová xtiyakatej richin nusiloj ri ruwach'ulew, ri winaqi' xtikewaj-ki' chuxe' nima'q taq abej, y chuxe' taq jul xtikewaj-ki' chuwech ri Jehová, roma rija' kan k'o rukiy y ri rusaqil ri ruk'ojlemal kan nunojisaj ri ruwach'ulew rik'in xibinri'il.

²⁰Chupan k'a ri q'ij ri', ri winaqi' xtikik'uaj-el ri wachibel ri e kibanalon rik'in q'anapueq y saqipueq, ri e kibanalon richin xekiya' kiq'ij, y xtikik'aqala-el k'a akuchi ek'o-wi ri ch'oy y ri sotz'.

²¹Xtibanatej ronojel re' toq ri Jehová xtiyakatej richin nusiloj ri ruwach'ulew, y ri winaqi' xtikewaj-ki' chuxe' nima'q taq abej, chuqa' chuxe' taq jul xtikewaj-ki' chuwech ri Jehová, roma rija' kan k'o rukiy y ri rusaqil ri ruk'ojlemal kan nunojisaj ri ruwach'ulew rik'in xibinri'il.

²²Roma ri', rix nuwinaq, man tikuquba' ik'u'x kik'in ch'aqa' chik winaqi', roma rije' kan juba' ok kejqalen y ri kik'aslen xa juba' ok k'o chuwech re ruwach'ulew.