Read Kaqchikel Isa 20 Bible Online

Isa 20 - Kaqchikel bible

Isa 20

¹Xbanatej k'a chi ri Sargón, rey richin ri Asiria, xuteq-pe ri aj-raqen pa kiwi' ri aj-labal aj-Asiria richin xorubana' oyowal rik'in ri tinamit Asdod, y kan xok k'a richin rija'.

²Y jari' chuqa' toq ri Jehová xch'on chik rik'in ri Isaías richin trelesaj-el ri rutziaq richin bis, y chuqa' ri ruxajab. Y ri Isaías kan keri' k'a ri xuben, xbiyajilan chikikojol ri winaqi'.

³Rija' kan keri' k'a xuben ri oxi' juna'. Y chirij re' ri Jehová xubij chi achi'el k'a xuben ri Isaías chi maneq rutziaq y maneq ruxajab xukusaj, re' xaxe richin xuk'ut y xuya' rutzijol chike ri ruwach'ulew Egipto y ri Etiopía.

⁴Keri' chuqa' xtuben ri rey richin Asiria chike ri aj-Egipto y chike ri aj-Etiopía. Ri alaboni' y ri rijita'q taq achi'a' kan xkech'ane' k'a, y maneq kixajab xtibekikusaj toq xke'uk'uex-el pa ximonri'il. Y kan xtiq'alajin k'a ri kacheq richin jun k'ixbilal ri chiri' pan Egipto.

⁵Roma ri' ri winaqi' ri kikuquban kik'u'x kik'in ri aj-Etiopía y ri aj-Egipto kan xtikixibij-ki' y xkek'ixbitej.

⁶Y chupan ri q'ij ri', ri winaqi' ri ek'o chuchi' ri palou xtikibij chi rije' chuqa' kan kikuquban kik'u'x kik'in ri aj-Egipto y ri aj-Etiopía richin nikito-ki' chuwech ri rey richin Asiria y wakami k'a xa man jun ri nito'on kichin.