Read Kaqchikel Isa 21 Bible Online

Isa 21 - Kaqchikel bible

Isa 21

¹Ri Dios xuq'alajirisaj ri xtibanatej pa ruwach'ulew Babilonia. Y jare' k'a ri rutzijol: Achi'el jun surkum ri peteneq pa xokon, kan keri' ri ruk'ayewal ri peteneq pa ruwi' ri ruwach'ulew Babilonia. Xkepe e etzelanel kichin ri kan janila yeya'on xibinri'il.

²Kan janila k'ayew ri q'ij ri xuk'ut ri Dios chinuwech chupan jun achi'el achik'. Y ri achik' ri' xaxe nuk'ut q'oloj y wululen. ¡Kixyakatej rix tinamit richin Elam, chuqa' rix aj-Media! Ri Dios xtutanaba' ri kijiloj ri winaqi' ri ya'on koma ri aj-Babilonia.

³Roma ri achik', kan ninxibij-wi'. Kan ninkototila-wi' roma q'axo'n, achi'el nuben jun ixoq toq nik'achoj chirij jun ak'ual. Roma ri nubis man ninwak'axaj ta chik. Chuqa' roma ri nuxibinri'il kan man yitzu'un ta chik.

⁴Kan sachineq nuk'u'x, y ri xibinri'il kan xuya' tew chuwij. Y ri chi'aq'a' ri kan janila woyoben richin yinuxlan, xa kan janila nink'en rukiy.

⁵Ri e tata'al aj-Babilonia xenimaq'ijun rik'in jebelej taq wiqobel. Rokik yewa-ye'uk'ya', jari' toq xapon ri rutzijol richin tikik'uaj ri kikamisabal richin yebe pan oyowal.

⁶Chupan ri achi'el achik' ri', ri Dios xubij chuwe chi kibe richin ninbenya' jun chajinel richin nubij chuwe achike ri xutz'et.

⁷Y toq ri chajinel yerutz'et k'a tzobaj taq achi'a' ri e ch'okol-pe chikij kiej, chikij ri taq bur, y chikij ri camello; jari' toq rija' k'o chi nuchojmirisaj-ri'.

⁸Y ri chajinel ri' xsik'in-apo wik'in y xubij: Q'ij-q'ij yin ink'o wawe'. Y ronojel ri chi'aq'a' ja yin ri in chajinel.

⁹Y re wakami jare' yentz'et chi e peteneq achi'a' ri yech'oke' chikij kiej, kaka' kibanon-pe. Y ri achi'a' ri' nikibij chi ri Babilonia xtzaq, y konojel ri wachibel ri e paban ri yekiya' kiq'ij kan kebolqo't xetzaq k'a pan ulew, y xepax, xcha' ri chajinel.

¹⁰Toq'ex iwech rix nuwinaq israelita, stape' kan xban chiwe achi'el toq nich'ay ri trigo, yin xinya' yan rutzijol chiwe, ri xink'ul rik'in ri Jehová k'iytisanel richin ronojel, ri qa-Dios richin Israel.

¹¹Ri Dios xuq'alajirisaj jun rutzijol chinuwech pa ruwi' ri ruwach'ulew Edom, y jare' k'a: K'o jun nisik'in-pe k'a pa tinamit Seir y xubij chuwe: Chajinel, ¿janipe' niseqer-pe? Chajinel, ¿janipe' niseqer-pe?, xcha'.

¹²Y yin xinbij chi niseqer yan pe, jak'a ri aq'a' xa peteneq chik chirij ri'. Y wi nrajo' nuk'utuj chik chuwe, tuk'utuj jun bey chik chuwe ri chua'q.

¹³Chirij re' xapon jun chik rutzijol kichin ri aj-Arabia, y jare' k'a: Rix winaqi' aj-Dedán, ri ixk'o pa k'echelaj chiri' pan Arabia, k'o k'a jun rutzijol chiwe.

¹⁴Kebe'ik'ulu' ri winaqi' ri chaqi'j-kichi', y tik'uaj-el kiya'. Rix winaqi' aj-Temá tik'uaj-el kikaxlan-way ri e animajineq-pe.

¹⁵Roma rije' e animajineq chuwech ri espada; chuwech ri espada ri janila rey e animajineq-wi. Chuqa' e animajineq chuwech ri rute-ch'ab ri kan nik'aq yan chikij; e animajineq chuwech ri kamik ri ruk'amon-pe ri oyowal ri'.

¹⁶Roma ri Jehová xubij chuwe chi re' xtibanatej ke taq wa' juna' apo, achi'el nrajlaj ruq'ij jun achin ri nisamej chi q'ij. Chupan ri q'ij ri' xtibek'is ri tinamit Quedar.

¹⁷Y kan e juba' ok ri aj-labal ri xkek'ase' kan. Kan ja ri Jehová ri qa-Dios richin Israel ri nibin.