Read Kaqchikel Isa 22 Bible Online

Isa 22 - Kaqchikel bible

Isa 22

¹Ri Dios nuq'alajirisaj ri nibanatej pa taq'aj richin Hinom:*f5* Konojel ri winaqi' aj-Jerusalem yejote-el pa ruwi' ri kachoch richin yenimaq'ijun.

²Rix aj-Jerusalem, ri Dios nuk'utuj chiwe achike roma kan janila yixwosq'o'l y janila pan ichi'. rix ix jun tinamit ri niqa' chiwech ri etz'anen, y kan janila yixkikot Roma ri achi'a' ri xekamisex, man rik'in ta espada xekamisex-wi. Ri xeken, xa man pa labal ta xeken-wi.

³Konojel ri e tata'al kan xke'animej, jak'a xa xkechapatej y man jun rute-ch'ab ri xtikik'eq. Stape' kan nej xke'animej-wi, kan xkekiq'i' y xkekichop.

⁴Roma ri' xinbij: Tijech'ej-el-iwi' wik'in, roma ninwajo' yinoq' rik'in janila bis. Man ninwajo' ta richin nikuqubala' nuk'u'x roma re jun ruk'ayewal ri xtuq'axaj ri nutinamit, xkicha'.

⁵Ri Jehová k'iytisanel richin ronojel nucha' jun q'ij richin xibinri'il, q'ij richin bis, q'ij richin sachibel-k'u'x. Y re' nibanatej chupan ri taq'aj richin Hinom. Ri chiri' xtiwulex ri tz'aq ri sutiyon-rij ri tinamit. Y ri winaqi' nikik'utuj to'onik chike ri juyu'.

⁶Ri aj-Elam kan xkinojisaj chik ri k'ojelibel richin kich'ab, y kan e ch'okol chik chikij ri kikiej, chuqa' e tz'uyul chik pa taq ki-carruaje. Ri aj-Quir xkelesaj yan ri kitobal richin xkebe pan oyowal.

⁷Ri jebelej taq taq'aj richin ri Judá xkenoj chi carruaje richin oyowal, y ronojel tinamit richin ri Judá xkesurix-kij koma ri aj-labal ri yech'oke' chirij kiej.

⁸Chupan ri q'ij ri' ri Judá man jun chik xtito'on richin. Rix aj-Jerusalem ja rix ri xkixelesan-el ri tobel ri ek'o chupan ri jay ri rubanon kan ri Salomón. Y kan xtikuquba' ik'u'x rik'in ri kamisabel ri'.

⁹Xkixel-pe richin xto'ik'ama' iya' chupan ri k'ojelibel ya' ri k'o pa xulan chire ri tinamit. Chuqa' xtitz'et chi ri tz'aq ri ek'o chirij ri tinamit kan man e utz ta chik.

¹⁰Roma ri' kan xke'iwajlaj ri jay. K'ari' xke'iwulaj jujun chike rije' richin xtik'ojoj ri jul ri ek'o chike ri tz'aq ri sutiyon-rij ri tinamit.

¹¹Chukojol ri ka'i' tz'aq ri sutiyon-rij ri tinamit, xtikinojisaj chi ya', ri xtikik'en-pe chupan ri ojer yakonabel. Jak'a rix xa man xtikanoj ta to'onik rik'in ri Dios ri xojbanon. Rix man xtiya' ta rejqalen ri Dios ri xch'obon chirij ronojel re'.

¹²Chupan ri q'ij ri' ri Jehová k'iytisanel richin ronojel xkixroyoj rix richin xkixoq', y richin xkixk'oje' pa bis. K'o chi xtik'uq-el ri rusumal-iwi', y xtikusaj-el tzieq richin bis.

¹³Jak'a rix xa yixnimaq'ijun, xe'ikamisaj wákix y karne'l richin jebel nitej. Jebel yixqumu vino y nibij: Qojwa-qojuk'ya' roma ri chua'q xa xqojken, yixcha'.

¹⁴Roma ri' ri Jehová k'iytisanel richin ronojel xubij kere' chuwe pan iwi' rix: Kan man xtinkuy ta k'a re mak re' re ibanon, k'a ja toq xkixken, nicha' ri Jehová k'iytisanel richin ronojel.

¹⁵Ri Jehová k'iytisanel richin ronojel xuteq-pe re jun rutzijol re' chuwe richin ninya' chire ri Sebná ri aj-raqen:

¹⁶¿Achike kami naben rat re wawe'? ¿Achike awetaman ruwech rat, richin xaben-qa jun amuqubal re wawe' pa kik'ojelibal ri rey?

¹⁷Jak'a ri Jehová xkaruchop. K'ari' xkaruteq-el nej pa ximonri'il.

¹⁸Kan xkarusururej-pe achi'el niban chire jun pelota, y kan xkaruk'eq-el k'a pa jun chik ruwach'ulew, y nej xkaken-wi kan. Chiri' xkebek'oje-wi kan ri a-carruaje ri xenimirisan awichin. Ronojel re' xtibanatej roma rat kan at jun k'ixbilal chire ri rey.

¹⁹Ri Dios xkarelesaj chupan ri asamaj, y chuqa' xtrelesaj ronojel ri ya'on pan aq'a'.

²⁰Ri Dios kere' nubij: Chupan ri q'ij ri', xtinwoyoj ri nusamajel Eliaquim ri ruk'ajol ri Hilquías.

²¹Xtinwiq rik'in ri atziaq rat, y xtinya' ri aximibal chire ri kan k'o rejqalen. Chuqa' xtinjech pa ruq'a' ri uchuq'a' ri ya'on pan aq'a', y kan xtok jun tata'aj pa kiwi' konojel aj-Jerusalem y ri aj-Judá.

²²Kan xtinjech pa ruq'a' ri llave kichin ri aj pa rachoch kan ri David. Toq rija' nujeq, kan man jun xtitikir xtitz'apen. Y toq rija' nutz'apej, man jun xtitikir xtijaqo.

²³Yin kan xtinjikiba' kan chupan ri rutz'uyubal richin q'atoj-tzij achi'el toq no'ibajij kan jun clavo. Y rija' kan xtik'oje' janila rejqalen kichin ri aj pa rachoch.

²⁴Rija' xtuya' kisamaj konojel ri aj pa rachoch kan ri rutata'. Chuqa' xtuya' ronojel ri nik'atzin chike, achi'el nuben jun nimalej clavo ri yetzeqe' sartén chire, jun bojo'y y ronojel ruwech xára.

²⁵Jak'a chupan ri q'ij ri', ri clavo ri jebel xbajitej kan, xa kan xtitzaq-el. Y ronojel ri tzeqeban chire, xa xketzaq-el chuqa'. Yin Jehová k'iytisanel richin ronojel ri yibin.