Read Kaqchikel Isa 25 Bible Online

Isa 25 - Kaqchikel bible

Isa 25

¹Ja rat Jehová, ja rat ri at qa-Dios, xtiqanimirisaj y xtiqabixaj ri abi'. Ri ojer kan rat xach'ob xe'aben meyel taq banobel, y wakami kan xaben ri xabij. Kan xaben ri xasuj.

²Kan xaben chike ri nima'q taq tinamit achi'el jun tzobaj abej; ri tinamit ri e tz'apen chi tz'aq kan xewuluwu', y kan man jun bey chik xkepabex-q'anej.

³Roma ri' ri winaqi' ri xk'oje' kuchuq'a', kan nikiya' aq'ij. Chuqa' ri winaqi' richin ri tinamit ri kan janila e itzel, xk'oje' akiy chikiwech.

⁴Roma rat at achi'el jun tobel chike ri man jun k'o kik'in. Ye'ato' ri k'o nik'atzin chike toq ek'o pa tijoj-poqonal. Rat at achi'el jun parabel chike toq nipe ri q'eqel-job. Rat yatok achi'el kimujal toq janila q'ij. Ri e itzel taq winaqi' toq nel-pe ri kuxla', xa kan e achi'el jun q'eqel job ri norupaxij-ri' chuwech jun jay.

⁵Ri e itzel taq winaqi' e achi'el ri k'aten pa jun ruwach'ulew chaqi'j. Rat naqasaj kiq'ij ri kinimirisan-ki' ri man e aj wawe' ta, achi'el toq niqaqa ri ruwi' ri k'aten toq nipe ri sutz'. Kan keri' naben chike ri e itzel richin yetane-qa.

⁶Ri Jehová k'iytisanel richin ronojel kan xtuberuchojmirisaj k'a jun nimaq'ij chiri' pa juyu' Sión, kichin konojel winaqi' ri ek'o chuwech re ruwach'ulew. Kan xtuya' jebelej taq vino ri kan e cha'on, y jebelej taq ti'ij.

⁷Pa ruwi' ri juyu' ri' ri Jehová xtrelesaj-el ri tzieq achoq ik'in yepis-wi ri kaminaqi'. Xtrelesaj k'a ri tzieq ri achoq chupan e pisil-wi konojel winaqi'.

⁸Chupan ri q'ij ri' xtuben chi man jun chik wineq ri xtiken. Kan xtusu' ri ruya'al-kiwech konojel winaqi', y xtrelesaj ri qak'ixbilal. Ronojel re' xtibanatej roma ja ri Jehová ri xbin.

⁹Y chupan ri q'ij ri' xtiqabij: Ja qa-Dios re' kan jare' ri qoyoben y kan xqojrukol. Ja Jehová re' ri janila qoyoben, y roma ri' kan qojkikot k'a rik'in ri kolotajik ri xuya' chiqe, xqojcha'.

¹⁰Roma ri Jehová kan xtrurtisaj re juyu' re', jak'a ri Moab xa xtipalibex chi'aqen, achi'el toq nipalibex ri páxa ri ya'on pa kiwi' ri nikipamaj ri chikopi'.

¹¹Y k'ari' ri winaqi' aj-Moab xtikituk rik'in ri kiq'a', achi'el toq nimuxan jun wineq pa ya' richin nukol-ri'. Keri' ri Jehová kan xtuqasaj k'a ri nimirisanen ri k'o kik'in ri winaqi' stape' janila e nowineq.

¹²Ri Jehová kan xkeruwulaj ri tz'aq ri sutiyon-kij ri kitinamit. Kan xkeruwulaj jumul, y xkeruqasaj pan ulew ronojel.