Read Kaqchikel Isa 26 Bible Online

Isa 26 - Kaqchikel bible

Isa 26

¹Chupan ri q'ij ri' xtibixex re bix re' chupan ri ruwach'ulew Judá: Ri qatinamit k'o k'a jun rutobal. Ja ri Jehová ri achi'el tobel ri rubanon chiri'.

²Tiqajaqa' k'a ri okibel richin ri tinamit, richin ye'ok-ok ri winaqi' ri choj kik'aslen, roj ri niqak'axaj ri ruch'abel ri Jehová.

³Roma ri Jehová nichajin kichin konojel ri k'o uxlanibel-k'u'x kik'in.

⁴Kan tiqakuquba' qak'u'x rik'in ri Jehová tibe-q'ij tibe-seq, roma rik'in ri Jehová ri qajaw k'o-wi ri uchuq'a' richin q'asen.

⁵Roma rija' kan xeruk'is konojel ri e etzelanel qichin, y kan xuqasaj kiq'ij ri tinamit ri e nima'q nikina-ki'. Ja ri Dios ri xwulan ri tinamit ri', y xuqasaj jumul k'a pan ulew;

⁶richin keri' ri man jun k'o kik'in xtikixeq' chi'aqen, y ri winaqi' ri janila yetz'ilox kan xkepa'e' pa ruwi'.

⁷Ri rubey ri wineq ri choj ruk'aslen kan choj-wi, y rat ri qa-Dios, kan ja rat ri más at choj. Y kan nachojmirisaj ri rubey ri wineq ri choj ruk'aslen.

⁸Chuqa' roj kan qakuquban qak'u'x awik'in, rik'in ri choj bey ri aya'on chiqe. Y ri rurayibel ri qánima chi kan xaxe rat ri yatqach'ob.

⁹Rik'in ronojel qánima niqarayibej yojch'on awik'in ri chi'aq'a'; chuqa' ri nimaq'a' yan niqajo' chi nijunamatej-qawech awik'in. Toq rat xkaq'aton-tzij pa ruwi' ri ruwach'ulew, k'a jari' toq roj xtiqetamaj chi rat kan pa ruchojmilal-wi ri yaq'aton-tzij.

¹⁰Stape' rat nak'ut ri ajowabel chikiwech ri winaqi' ri itzel kik'aslen, rije' kan man xtiketamaj ta xkebiyin pa ruchojmilal. Stape' kan pa ruchojmilal xtiban kik'in, rije' xa kan nikiben etzelal, y xa kan pa rubanik nikiben chi man nikitz'et ta chi rat Jehová kan k'o-wi aq'ij.

¹¹Rat Jehová kan atzeqen k'a ri aq'a' pa kiwi' richin naya' rutojbalil-mak chike, jak'a rije' xa man nikajo' ta k'a nikak'axaj. Tabana' utzil tak'utu' ri awajowabal pa kiwi' rije' richin xkek'ixbitej. Taya' q'ij chi ri q'aq' kan xkeruk'is ta rije', achi'el xkek'is ri e etzelanel awichin rat.

¹²Jehová rat kan naya' ri uxlanibel-k'u'x qik'in, y roma ronojel ri oj tikirineq qabanon, ja rat ri at banayon chiqe.

¹³Ja rat ri Jehová ri at qa-Dios, y kan xaxe rat ri niqaya' aq'ij, stape' ek'o chik ch'aqa' ri yeq'aton-tzij pa qawi'.

¹⁴Jak'a re wakami, xa xeken yan el rije', y man xkek'astej ta chik pe. Rat kan xaya' tijoj-poqonal pa kiwi', y kan jumul xe'ak'is chuwech re ruwach'ulew, y kan man jun chik natabel kichin ri xk'oje' kan.

¹⁵Rat Jehová kan xojanimirisaj roj ri oj atinamit, y chuqa' kan xanimirisaj ri ruk'ulba't ri qaruwach'ulew. Y rik'in ronojel re' xanimirisaj ri abi',

¹⁶Toq xe'aya' ri qawinaq pa tijoj-poqonal, xatkikanoj k'a, y xech'on k'a awik'in

¹⁷Ri xaben qik'in chupan ri tijoj-poqonal kan xqana' rukiy achi'el nuna' rukiy jun ixoq toq royoben jun ak'ual, y toq napon ri q'ij richin nalan.

¹⁸Jak'a roj pa ruk'exel xk'oje' qal, ri qaq'axo'n xa man jun xuq'ajuj-wi. Xa kan man jun k'a qakolon chupan ri ximonri'il, y maneq k'a qijatzul richin ta xtikich'ek ri ruwach'ulew.

¹⁹Jak'a ri qakaminaq kan xkebek'ase' chik pe jun bey. Tabana' utzil chi xkebeyakatej ta chik pe jun bey. Ke'ak'asoj chik pe richin xkebixan rik'in kikoten. Ri raxq'ab ri naya-pe, nuya' ruk'aslen ri ulew, y keri' chuqa' xtaben kik'in ri kaminaqi' xtaya' k'ak'a' kik'aslen.

²⁰Rix nuwinaq kixbiyin k'a pa taq iwachoch, y kan titz'apej jebel ri ruchi' toq xkixok-apo. Tiwewaj juba' iwi' rokik nik'o-qa juba' royowal ri Dios.

²¹Roma ri Jehová kan xtel-pe chiri' ri akuchi k'o-wi, richin chi nuya' ri ruk'ayewal pa kiwi' ri winaqi', roma ri kimak ri xkiben chuwech rija'. Y ri ruwach'ulew kan man xtrewaj ta chik jun kamik, jak'a xa kan xtuk'ut ronojel kamik ri e banon chuwech rija'.