Read Kaqchikel Isa 27 Bible Online

Isa 27 - Kaqchikel bible

Isa 27

¹Chupan ri q'ij ri' ri Jehová kan xtuya' ruk'ayewal rik'in ri ru-espada, pa ruwi' ri nimalej chikop ri k'o pa palou. Xtukamisaj ri dragón ri k'o chupan ri palou, rik'in jun espada ri janila rey.

²Chupan ri q'ij ri' ri Jehová xtubij: Kixbixan chirij ri tiko'n richin uva, ri xuya' vino pa ruk'iyal.

³Y yin Jehová ninchajij; Kan jantape' ninya'aj, y kan ninchajij k'a chi paq'ij chi chaq'a' richin chi man jun xtinaqo richin.

⁴Man woyowal ta chik chire ri nutiko'n. Stape' ek'o k'ix ri kan janila kik'ixal, yin xa kan xkenya' pa q'aq'.

⁵Jak'a wi ri israelita nikajo' chi yento', kan tikijunamaj k'a kiwech wik'in; ja', kan tikijunamaj k'a kiwech wik'in, xticha' ri Dios.

⁶Chiqawech-apo ri qawinaq israelita xkejike' chik qa jun bey, achi'el jun che' ri yeruya-qa jebel ri ruxe' pan ulew. Ri qawinaq achi'el xkebejotayin-pe y xkek'oje' kisi'j, y kan xtikinojisaj ruwech ri ruwach'ulew, y kan xtikiya' kiwech.

⁷Ri Dios kan man xuya' ta rutojbalil-mak pa kiwi' ri qawinaq achi'el ri rutojbalil ri xuya' pa kiwi' ri ch'aqa' chik winaqi', ni man xerukamisaj ta ri qawinaq achi'el xerukamisaj ri xekamisan qichin.

⁸Jak'a ri Dios xuya' ri rutojbalil pa kiwi' ri qawinaq achi'el ri k'atzinel. Y xuteq k'a pe jun nimalej kaq'iq' pa tz'iran ruwach'ulew richin xerutaluj-el, achi'el nuben ri kaq'iq' ri peteneq pa relebel-q'ij.

⁹Xaxe k'a k'o jun rubanik richin xtukuy ri kimak ri qawinaq israelita; wi xtikiben k'a ronojel re', kan xtikuyutej ronojel ri man utz ta kibanon: Kan xkeruyoj k'a ronojel porobel ri xa e kichin ch'aqa' chik dios, y kan xkeke'ex achi'el niban rik'in ri chum. Chuqa' xke'elesex ronojel paban-che' ri nikiya' ruq'ij ri Asera, y ronojel porobel richin pom.

¹⁰Ri tinamit ri jebel e tz'apen-kij chi tz'aq xa xketole' kan, achi'el toq nimalix kan jun jay, y nuben achi'el jun tz'iran ruwach'ulew ri e maneq winaqi' chupan. Ri chiri' xtok k'a ri akuchi xkeyuq'ux-wi ri awej ri akuchi nelesex-el ronojel kixaq ri che'.

¹¹Y toq ri ruq'a' ri che' ri' xtiq'aj-el roma nichaqi'j-qa, k'ari' xkepe ri ixoqi' richin nikisik'-el, y nikibox kiq'aq' rik'in. Xtibanatej ronojel re' roma ri qawinaq maneq kinojibal. Roma ri' ri Dios ri xbanon qichin man xtujoyowaj ta kiwech, ni man jun utzil xtuben chike.

¹²Chupan k'a ri q'ij ri' ri Jehová kan k'o k'a ri xtiberubana'. Nitiker-pe chupan ri raqen-ya' Éufrates y napon k'a pa raqen-ya' Egipto, kan xkeruk'is k'a konojel. Xtiban chike achi'el toq nich'ay ri trigo. Jak'a rix aj-Israel xa kan xkixmol chi'ijujunal.

¹³Chupan ri q'ij ri' kan xtixupux k'a ri trompeta; ri ek'o chiri' pan Asiria y ri e beneq pan Egipto xkepe richin xtokiya' ruq'ij ri Jehová chupan ri juyu' ri chiri' pa Jerusalem.