Read Kaqchikel Isa 28 Bible Online

Isa 28 - Kaqchikel bible

Isa 28

¹Kan toq'ex k'a ruwech ri tinamit Samaria, roma ri winaqi' kan janila yeq'aber ri chiri' pan Efraín. Ri tinamit ri' k'o pa ruwi' ri juyu' ri k'o chunaqaj ri taq'aj. Ri tinamit ri ojer kan, kan janila nik'ases. Jak'a re wakami kan achi'el jun kotz'i'j ri xmayamo' yan qa. Y konojel ri ruwinaq xaxe q'abarik nikiben.

²Ri Jehová xa rucha'on chik jun ruwach'ulew ri kan k'o janila ruchuq'a' richin nuwulaj ri Samaria. Rije' xkepe anineq achi'el nipe jun nimalej kaq'iq'. Xkekisok ri aj-Samaria achi'el nuben ri saqboch. Y ri winaqi' xke'uk'uex-el achi'el jun q'eqel-job nuk'uaj ronojel.

³Konojel ri q'abarela' aj-Samaria janila kinimirisan-ki' roma ri kitinamit, jak'a ri tinamit ri' xtipitz' kan.

⁴Stape' ri tinamit ri' k'o chunaqaj ri taq'aj, y kan achi'el kotz'i'j ri xmayamo' yan qa, jak'a kan chi'anin xtichapatej achi'el yechap ri nabey ruwech ri wíkix richin yetij.

⁵Chupan k'a ri q'ij ri' ri Jehová k'iytisanel richin ronojel xkeruto' ri aj-Samaria ri xkek'oje' kan. Y roma ri' rije' kan xtikiben achi'el jun wiqobel ri banon rik'in kotz'i'j ri kan janila jebel ok yetzu'un.

⁶Ri Dios xtuben chire ri q'atoy-tzij chi kan xtuq'et-tzij pa ruchojmilal. Chuqa' xtuya' uchuq'a' chike ri achi'a' ri yechajin ri okibel richin ri tinamit.

⁷Chuqa' ek'o chik ch'aqa' ri yebe-kela' yebe-kela' nikiben, roma xeq'aber-qa rik'in vino y rik'in ya' ri niq'abarisan. Y rije' e sacerdote y e q'alajirisey ruch'abel ri Dios. Man yetikir ta yech'obon roma k'iy vino kiqumun. Chaq nikipajk'ij kaqen roma janila k'iy vino kiqumun, toq k'o ri nik'utumej chikiwech. Y e q'abarela' toq nikiq'et-tzij pa kiwi' ri winaqi'.

⁸Ronojel k'a ri mesa e nojineq rik'in ri kixa'oj, y kan man jun chik akuchi ch'ajch'oj ta juba'.

⁹¿Achoq chuwech k'a xtikik'ut ronojel etamabel? ¿Kan chikiwech kami ri ak'uala' ri k'a juba' telesex kitz'um? ¿Kan chikiwech kami ri taq ak'uala' ri k'a juba' ke'alex?

¹⁰Roma ri kiq'abarik, ri ch'abel ri nikibij xa kan man jebel ta rubixik, xa kan achi'el taq ak'uala' ri man jani yetikir yech'on.

¹¹Roma ri' ri Jehová kan xtich'on iwik'in pa jun chik ch'abel, y xtich'on iwik'in rik'in ruq'abal achi'el chire jun mem.

¹²Chiwe rix kan xubij yan chi k'o uxlanen rik'in. Kan xusuj uxlanen chike ri janila e kosinaqi'. Jak'a rix xa man xiwajo' ta xiwak'axaj

¹³Roma ri' ri Jehová xtich'on k'a iwik'in achi'el xa ta nich'on kik'in taq ak'uala' ri man jani yetikir yech'on. Y keri' k'a toq yixbiyin, kan xkixjaq'ajo' kan chiwij y xkixtzaq; xtisok-iwi', xkixqaqa pa pikbel y xkixchap k'a.

¹⁴Roma ri' kan tiwak'axaj k'a ri ruch'abel ri Jehová, rix aj-raqen pa ruwi' ri tinamit, ri kan inimirisan-iwi'.

¹⁵Rix rik'in ri inimirisanen nibij chi kan xijikiba-itzij rik'in ri kamik, y xiya' yan itzij rik'in ri jul richin muqbel, richin chi toq xtipe ri nimalej ruk'ayewal, kan man jun ri xtuben kan chiwe. Ich'obon chi rik'in ri tz'ukun-tzij, rix xixkolotej yan, y rik'in ri q'oloj ri' rix xiwil jun itobal.

¹⁶Roma ri' ri Jehová nubij: Kan xtinya' chiri' pa Sión jun abej ri cha'on y janila rejqalen. Ja abej ri' ri xtok k'atzinel chire ri ruxe' ri jay. y xtitike' kan jebel. Y xabachike k'a ri rukuquban ruk'u'x rik'in, kan man jun xtiberuk'uluwachij.

¹⁷Ri ibanobal rix kan xtibe'etex rik'in ri pixa', achi'el niban rik'in jun etabel k'an. Ri ibanobal xtitz'et wi choj achi'el niban rik'in ri plomo. Ri itobal ri ikanon rix rik'in ri tz'ukun taq tzij kan xtuwulaj ri saqboch, y ri ya' xtunojisaj ri akuchi iwewan-iwi'.

¹⁸Y kan xtinyoj k'a ri jikibel-tzij ri ibanon rik'in ri kamik; kan xtiyojtej ri itzij ri xiya' rik'in ri jul richin muqbel. Y toq xtipe ri nimalej ruk'ayewal, rix kan xkixruk'is, achi'el ri q'eqel-job nuqirirej-el ronojel.

¹⁹Ronojel mul toq xtipe, kan xkixruqirirej-el. Kan xtipe ronojel nimaq'a', y kan xkixruqirirej chi paq'ij chi chaq'a', xcha' ri Jehová. Y kan xkixbaybot k'a toq xtiwak'axaj ri rutzijol ri'.

²⁰Re jikibel-tzij ri xiben, kan achi'el toq jun wineq niwer-qa chupan jun ti ch'at ri man nitikir ta nupiskolij-ri' chupan, y ri k'ul kan janila ti ko'ol ok richin nuq'uj.

²¹Ri Jehová kan xtiyakatej achi'el xuben chiri' pa juyu' Perasim; kan xtuben achi'el toq xyakatej royowal pa taq'aj richin Gabaón. Xtuben jun samaj ri kan man jun bey tz'eton.

²²Roma ri' man chik kixtze'en, roma rik'in juba', kan más yixrujitz'aj ri achoq ik'in iximon-iwi'. Roma ri Jehová k'iytisanel richin ronojel xubij chuwe chi kan xuya' jun pixa' richin chi niberuk'isa' chijun ri ruwach'ulew.

²³Kan tiya' k'a jebel ixikin; tiwak'axaj jebel ri xtinbij. Kan tiwak'axaj k'a jebel ri nuch'abel, richin niq'ax chiwech ri xtinbij chiwe.

²⁴Toq jun tikonel nuben-qa ri rutiko'n, man chaq niq'ax ta q'ij pa ruwi' richin nusamajij ri rulew. Man chaq xaxe ta rik'in ri ru-azadón nisamej-wi.

²⁵Toq rusamajin chik jebel ri ulew, nutaluj k'a ri rija'tz ri eneldo o ri rija'tz ri comino. Pa nabey chire ri ulew nutik-qa ri trigo, k'ari' nutik-qa ri cebada pa jun chik ulew, y ri avena nutik-qa pa jun chik ulew.

²⁶Ja ri Dios nik'utu chuwech ri tikonel, y nubij chire ri achike ruk'amon richin nuben.

²⁷Ri eneldo man nich'ay ta rik'in jun che' nim rupan, ni ta ri comino man nike'ex ta rik'in jun carreta. Pa ruk'exel ri', ri eneldo xa rik'in jun che' nibuj-wi, y ri comino nibuj rik'in jun xik'a'y.

²⁸Ri trigo nich'ay rik'in jun carreta, jak'a man nich'ay ta richin nike'ex. Stape' niq'ax ri carreta pa ruwi', man nukach'uj ta kan jumul.

²⁹Ronojel etamabel re' nipe rik'in ri Jehová k'iytisanel richin ronojel. Rija' kan nuch'ob chi niberubana', y kan xtuben rik'in na'oj.