Read Kaqchikel Isa 29 Bible Online

Isa 29 - Kaqchikel bible

Isa 29

¹Ri Dios xubij: Toq'ex kiwech ri ek'o pa tinamit Jerusalem,*f6* ri akuchi xk'oje-wi ri David. Kan tiya' k'a ruwi' ka'i-oxi' juna' más richin yixnimaq'ijun.

²Jak'a chirij ri', yin kan xkixinya' pa latz', y kan xkixok k'a jun tinamit richin q'axo'n y raqoj-chi'ij; y ri tinamit xtok achi'el jun porobel akuchi yeporox-wi ronojel.

³Kan xkenteq k'a aj-labal richin chi xtikisutij ri tinamit. Rije' xtikiya' k'a jun chajinel pa ruwi' ri tz'aq richin ye'ok-apo, y chuqa' xtikijok-q'anej ulew pa cholaj richin nikewaj-ki'.

⁴Rix aj-Jerusalem kan xtiqasex k'a iq'ij. Kan xkixk'oje' jumul k'a pan ulew, y roma ri' ri ich'abel xa kan xtijiq' chupan ri poqolaj. Y roma ri' ri ich'abel ri xke'el-pe pan ichi' xa kan achi'el ruch'abel jun xibinel, ri ti juba' ok nak'axatej.

⁵Jak'a chirij re' chaq k'ate' xke'uk'uex-el ri e etzelanel iwichin, achi'el nuben ri kaq'iq' toq nuk'uaj-el ri poqolaj kok'. Rije' e achi'el ri solot ri ek'o chupan ri ixin toq man jani tijosq'ix.

⁶Yin Jehová k'iytisanel richin ronojel kan xkipe rik'in koqolajay, silonel, nimalej kaq'iq', q'eqel-job y q'aq' richin xkenk'is ri e etzelanel iwichin.

⁷Jari' k'a toq ri ch'aqa' chik winaqi' ri xkiben oyowal iwik'in xa xkek'is, y ronojel re' xa achi'el jun achik'. Jari' k'a toq ri winaqi' ri xewulan richin ri tinamit y ri xixkiya' pa latz' xa xkek'is, y ronojel re' xa achi'el jun achik'.

⁸Ronojel re' xa achi'el k'a toq jun wineq ri kan janila ninum y nrachik'aj chi niwa'. Jak'a toq nuna' ruwech, ri rupan xa man jun k'o chupan. Chuqa' achi'el toq jun wineq ri kan janila chaqi'j ruchi' y nrachik'aj chi nuqum ruya'. Jak'a toq nuna' ruwech, janila chaqi'j ruchi' y xa maneq ruchuq'a'. Kere' k'a xtibek'uluwachitej kik'in konojel winaqi' ri nikiben oyowal iwik'in rix aj-Sión.

⁹Jak'a rix kan jantape' k'a tibana' chi ix nakaneq; kan jantape' k'a tibana' chi ix moy, y man jun nitz'et; xa chaq tibana' ix achi'el q'abarela' yixbe-kela' yixbe-kela' niben, stape' man iqumun ta ya' ri kan yeq'abarisan.

¹⁰Roma yin kan xtinbenya-pe pan iwi' jun nimalej waran. Kan xtinben chike ri e q'alajirisanela' chi man jun chik xtinq'alajirisaj chikiwech. Y pa kiwi' ri yetz'eton ri peteneq-apo chiwech, xtinben chi xtitz'apetej kiwech.

¹¹Iwik'in rix re jun achi'el achik' re', achi'el jun wuj boton ri ek'o ch'abel chupan. Y ri wuj ri' kan tz'apel rik'in jun retal. Wi niya'ox chire jun ri kan retaman ruwawuj, y nibix chire chi tusik'ij, rija' xtubij chi man nitikir ta roma xa kan tz'apel rik'in jun retal.

¹²Y wi ta niya' chire jun wineq ri man retaman ta ruwawuj, y nibij chire chi tusik'ij, rija' xtubij chiwe chi man retaman ta ruwawuj.

¹³Rix xaxe rik'in ri ich'abel niya' nuq'ij; jak'a ri iwánima xa kan k'o janila nej chuwe yin. Y toq niya' nuq'ij, xaxe nikamuluj pixa' ri e banon koma winaqi'.

¹⁴Roma ri' yin xtinsech chik ik'u'x jun bey, rix aj-Jerusalem. Xkenben meyel taq banobel ri man jun bey itz'eton. Y ronojel ri na'oj ri k'o kik'in ri aj-na'oj kan xtik'is, y ri etamabel ri k'o kik'in rije' chuqa' xtik'is.

¹⁵Toq'ex iwech rix ri niwewaj-iwi' chinuwech yin richin niwewaj ri ich'obonik chinuwech. Toq'ex iwech rix ri k'o niben pa taq q'equ'm y nibij chi man yixintz'et ta.

¹⁶Achi'el toq rix yixtikir nijel ri utz, rik'in ri itzel, achi'el xa ta ri xeq-ulew nitikir nujel rubanik ri nisamajin richin. Man jun bojo'y nubij ta chire ri xsamajin richin, chi ri bojo'y ri' man ja ta ri achin ri xbanon richin. Ni ta jun xára xtubij ta chire ri xbanon richin chi ri achin ri xbanon, man jun retaman.

¹⁷Juba' chik apo ri juyu' richin Líbano xa kan xtok ulew richin tiko'n, y ri ulew richin tiko'n xa kan xtok jun k'echelaj.

¹⁸Chupan ri q'ij ri' ri winaqi' e tokon kan xke'ak'ex toq k'o jun ri nisik'in ri wuj chikiwech. Chuqa' ri e moyi' xketikir xketzu'un, y maneq chik q'equ'm chike rije'.

¹⁹Ri winaqi' ri janila qasan kiq'ij, xa xkekikot wik'in yin Jehová. Chuqa' ri kan man jun k'o kik'in, kan xkekikot wik'in yin ri in Loq'olej.

²⁰Roma kan xkek'is konojel winaqi' ri janila kinimirisan-ki', y chuqa' ri yetze'en chikij. Chuqa' kan xkek'is konojel winaqi' ri man yewer ta chubanik ri itzel taq banobel.

²¹Xkek'is chuqa' ri winaqi' e tz'ukuy taq tzij richin nikiq'abaj chikij ch'aqa' chik winaqi'. Xkeken ri winaqi' ri nikiya' pikbel pa rubey ri nichojmirisan richin ri yebanatej. Xkek'is chuqa' ri winaqi' ri nikiq'ol ri to'onel ri niq'aton-tzij, richin man yeban ta pa ruchojmilal chike ri maneq kimak.

²²Roma ri' yin Jehová ri i-Dios ninbij chiwe: Yin xikolon richin ri Abraham, y ninbij chiwe rix aj pa rachoch kan ri Jacob chi kan ja re wakami y ri chiwech-apo, kan man xkixk'ixbitej ta chik, ni man xtukajmaj ta chik ri ipalej.

²³Roma toq xtitz'et ronojel samaj ri nubanon yin richin ninimirisaj ri iwajawaren, kan xtiya' nuq'ij nuk'ojlen. Rix xtiwetamaj chi ja yin ri in Loq'olej i-Dios, y kan xtik'en nukiy yin ri in Dios richin ri iruwach'ulew Israel.

²⁴Konojel ri kijech'en kan kibey, kan xtiketamaj xtik'oje' kina'oj, y konojel winaqi' ri xexebeloj chuwij, kan rik'in ronojel kik'u'x xtiketamaj ri tijonik, xcha' ri Jehová.