Read Kaqchikel Isa 3 Bible Online

Isa 3 - Kaqchikel bible

Isa 3

¹Titz'eta' k'a wakami chi ri Jehová k'iytisanel richin ronojel xtiberuya' wayjal pa kiwi' ri tinamit Jerusalem y ri Judá; ronojel ri yetij y ri yequm xtrelesaj-el.

²Chuqa' xkerelesaj-el ri achi'a' ri maneq xibinri'il chikiwech, ri e aj-labal, ri to'onela', ri e q'alajirisey ruch'abel ri Dios, ri nubananej chi retaman ri peteneq chiqawech-apo, ri e rijita'q taq achi'a' ri k'o kiq'ij,

³ri aj-raqen pa kiwi' ri aj-labal, ri achi'a' ri kan k'o kiq'ij, ri yepixaban, ri e banoy taq bojo'y y ri aj-itza'.

⁴Yin Jehová, kan ja ri k'ajol taq alaboni' ri xkenya' richin xke'ok aj-raqen pan iwi'. Xkenya' ri taq ak'uala' richin xkeq'aton-tzij pan iwi'.

⁵Ri winaqi' xtikiben chi xtikitej poqon chikijujunal ri kirachk'ul-jay. Ri alaboni' kan xkeyakatej k'a chikij ri rijita'q taq winaqi', y ri winaqi' ri maneq kiq'ij xkeyakatej chikij ri k'o kiq'ij.

⁶Y jun xtubij chire ri rach'alal richin nok tata'al pa kiwi', richin tuq'ata-tzij pa ruwi' ri tinamit ri' ri xa wulatejineq chik, xaxe roma rukusan nim raqen rutziaq.

⁷Jak'a rija' xtisik'in roma xibinri'il, y xtubij chi rija' man nitikir ta nuq'et-tzij, roma chupan ri rachoch maneq chik chuqa' rukaxlan-way, ni maneq kitziaq richin kijalbal. Y roma ri' xtuk'utuj utzil chike chi man tikiben chire richin nok tata'al.

⁸Ri tinamit Jerusalem k'o pa wululen; chuqa' ronojel ri ruwach'ulew Judá xa xch'akatej. Ri kich'abel y ri kibanobal kan nuq'alajirisaj chi e yakatajineq chirij ri Jehová.

⁹Chuqa' ri kipalej nuk'ut chi man utz ta kibanobal. Achi'el ri winaqi' aj-Sodoma kan xkiq'alajirisaj ri kimak, keri' chuqa' xkiben ri aj-Jerusalem. ¡Toq'ex kiwech ri nuwinaq israelita, roma kiyon rije' xkikanoj ri itzel pa kiwi'!

¹⁰Tibij k'a chike ri choj kik'aslen chi kan utz xkebe, roma kan xtikitej ruwech ri kitiko'n.

¹¹Jak'a toq'ex kiwech ri winaqi' ri maneq Dios chikiwech, roma ronojel man utz ta xtel chikiwech; roma achi'el ri kibanobal, keri' ri rutojbalil ri xtikik'ul.

¹²Re wakami ja ri k'ajol taq alaboni' ri yetz'ilo kichin ri winaqi'. Y ja ri ixoqi' ri yeq'aton-tzij pa kiwi'. Rix nuwinaq, ri e uk'uayon iwichin xa xixkiq'ol. y xa ix kik'uan pa jun bey ri man choj ta.

¹³Ri Jehová kan xok yan chupan ri jay richin niberuq'ata-tzij. Chuqa' kan xunaba' yan ri' richin niberuq'ata-tzij pa ruwi' ri qatinamit.

¹⁴Ri Jehová nuq'et k'a tzij pa kiwi' ri tata'al y ri aj-raqen pa kiwi' ri qawinaq. Y rija' nubij chi roj oj achi'el tiko'n uva, y chi rije' xa xek'is yan chuwech ri ulew ri'. Chuqa' kan xkinojisaj yan ri kachoch rik'in ri xkimej kan chuwi-kiq'a' ri meba'i'.

¹⁵Y nuk'utuj chuqa' chike ri achike roma nikiben chi nikitej poqon ri rutinamit, y achike roma toq nikikich kipalej pa poqolaj ri man jun k'o kik'in. Keri' nuk'utuj ri Jehová ri k'iytisanel richin ronojel.

¹⁶Chuqa' ri Jehová nubij chikij ri ixoqi' aj-Sión; chi janila kinimirisan-ki', kan nikiyek-el ri kijolon chikaj, y kan rik'in ri runaq' taq kiwech yekoyoj ri achi'a'. Toq yebiyin, kan kokoj taq kixak ri nikiya', y nikiben xaxe richin nak'axatej ri kiwiqobel ri k'o chikaqen.

¹⁷Roma ri' ri Jehová kan k'o jun yabil ri xtuya' pa kiwi' ri ixoqi' ri'. Kan xtuben chike chi xtel-pe sal pa kijolon, richin chi xtik'is-el ronojel ri rusumal-kiwi'.

¹⁸Ri Jehová nubij: Toq xtapon ri q'ij yin xtinwelesaj-el chike ri ixoqi' ri': Ri wiqobel richin kaqen, ri wiqobel ri nikiya' pa kijolon, ri kichinaj, ri ruwi-kixikin, ri wiqobel ri nikiya' chirij ri kiq'a', ri jebelej tzieq ri nikitz'apej kipalej rik'in, ri jebelej tzieq ri nikipach'uj ri rusumal-kiwi' rik'in, ri wiqobel ri nikiya' chirij ri kaqen, ri ruximibal kipan, ri jubulej taq aq'om, ri jun wiqobel ri nikikusaj richin man jun nikik'uluwachij, ri lipq'a', ri wiqobel richin kitza'n, ri jebelej taq tzieq richin nimaq'ij, ri ko'ol raqen tzieq, ri nim raqen tzieq, ri espejo, ri tzieq ri banon rik'in lino, ri gasa y ri ki-perraje.

²⁴Roma ri' keri' k'a xtibanatej pa tinamit Sión: Pa ruk'exel ri jubulej taq aq'om, ri ixoqi' xa xkechuwir-pe. Pa ruk'exel jun jebelej ximibel-kipan, xa xtik'oje' jun kolo' richin xkexim-el toq xkebe pa ximonri'il. Pa ruk'exel jebelej taq jikoj rusumal-wi'aj, xa maneq chik rusumal-kiwi'. Pa ruk'exel ri jebelej taq tzieq, xa xtikikusaj qiriqoj taq tzieq richin bis. Y pa ruk'exel jebejoj ok yetzu'un, xa xtiya'ox ketal chi kipalej rik'in q'aq'.

²⁵Ri achi'a' kan xkekamisex chi espada, y ri maneq xibinri'il chikiwech, xa xkeken pa labal.

²⁶Y ri tinamit xa xtitole-xtitole' kan. Kan xtik'oje' pa bis, y ri winaqi' kan xketz'uye' pa poqolaj roma bis.