Read Kaqchikel Isa 30 Bible Online

Isa 30 - Kaqchikel bible

Isa 30

¹Jare' ri rutzijol ri xuya' ri Jehová chike ri israelita ri man yeniman ta tzij: Toq'ex iwech rix roma niben achi'el alk'ualaxela' ri man yeniman ta tzij, y xa nich'ob ri man nuch'obon ta yin. Niya' itzij kik'in ch'aqa' chik, jak'a man yinik'ulubej ta yin. Y re' xa nimol más imak chiwij.

²Kan chi'anin k'a xixbe pan Egipto, richin xik'utuj to'onik. Yin man xinik'ulubej ta, jak'a xa rik'in ri ki-rey xik'utuj to'onik.

³Jak'a pa ruk'exel ri ruto'onik, rija' xa xkixruk'ixbisaj. Roma kan nito-iwi' rik'in ri ruwach'ulew Egipto, xa kan xtuqasaj iq'ij.

⁴Stape' itaqon chik el aj-raqen ri chiri' pa tinamit Soan ri k'o pa xaman, y ye'apon k'a pa tinamit Hanés ri k'o pa xokon,

⁵man xketikir ta xkixkito'. Pa ruk'exel, kan konojel xkixk'ixbitej, roma rije' xa man jun utz ri xtikiya' chiwe. Xa man jun yetikir xkixkitobej, y xaxe k'ixbilal ri xtuk'en-pe chiwe.

⁶Pa ruwi' ronojel re' k'o chik jun rutzijol ri ninya' pa kiwi' ri chikopi' ri ek'o pa tz'iran ruwach'ulew ri k'o pa xokon. Ri itaqonela' nikik'uaj ri ibeyomel chikij ri taq bur y ri camello richin xebe pan Egipto. Nikiq'axaj ri jun ruwach'ulew re akuchi xaxe janila ruk'ayewal y k'ayew ri k'o. Nikiq'axaj jun ruwach'ulew akuchi ruyon koj, kumatzi' y nima'q taq kumatzi' ri yexik'an pa kaq'iq'. Jak'a ri aj-Egipto kan man jun to'onik ri xtikiya' chiwe.

⁷Kan qitzij na wi chi ri aj-Egipto kan xtikiya' to'onik, jak'a man jun rejqalen. Roma ri', yin ninbij chi ri Egipto xtubini'aj Rahab*f7* ri xa man jun nik'atzin-wi.

⁸Wakami k'a, rat Isaías, kabiyin y tatz'ibaj re' chuwech jun tz'alem richin chi ri awinaq nikisik'ij. Chuqa' kan tatz'ibaj chupan jun wuj, richin niyake' kan, richin jun natabel richin tibe-q'ij tibe-seq.

⁹Roma ri awinaq kan janila man e nimey ta tzij, achi'el e alk'ualaxela' ri janila e tz'ukuy taq tzij, y achi'el e alk'ualaxela' ri man nikajo' ta nikak'axaj ri nupixa'.

¹⁰Y kan nikibij chike ri yetz'eton ri peteneq-apo chiwech chi man chik tikitz'et ri achi'el achik'. Chuqa' nikibij chike ri e q'alajirisey nuch'abel chi man chik tiq'alajirisaj chikiwech ri qitzij. Rije' xaxe nikajo' nikak'axaj ch'abel ri kan janila e jebel ok, y ch'abel richin q'oloj.

¹¹Rije' man nikajo' nikak'axaj chik ri ninbij yin chike. Kan man nikajo' ta chi yin ri Loq'olej Dios yench'olij rije'.

¹²Roma ri' yin ri Loq'olej Dios ri ink'o pan iwi' ninya' re jun rutzijol chiwe: Xmulun ik'u'x chirij ri nupixa'. Kan nikuquba' ik'u'x richin ye'iben kamisanik. Y xa kan niwewaj-iwi' chirij jun q'oloj.

¹³Rix kan nich'ob chi janila iwuchuq'a' achi'el jun nimalej tz'aq. Jak'a pa ruk'exel ri', xa ix achi'el jun tz'aq ri xa ch'aratajineq chik, ri chaq k'ate' nitzaq-qa.

¹⁴Xa kan xkixk'is achi'el nik'is jun xára ri kan nimulumu' jumul, y man nik'atzin ta chik richin niya' juba' racheq-q'aq' chupan, o richin niwelesaj juba' iya' chupan jun pozo, xcha' ri Dios.

¹⁵Ri Jehová k'iytisanel richin ronojel ja ri Loq'olej qa-Dios, y rija' nubij chi kixanpe rik'in, y titzolin-pe ik'u'x richin nik'oje' uxlanen iwik'in y kan xkixkolotej. Rija' xtuya' iwuchuq'a' rix wi nikuquba' ik'u'x rik'in. Jak'a rix xa man niwajo' ta.

¹⁶Jak'a rix xa xibij chi más ta utz yixanimej-el chirij kiej, y xa más xikuquba' ik'u'x kik'in ri ikiej. Roma ri' kan qitzij chi rix xkixanimej-el. Niwajo' chi anineq yixbe chikij ri kiej, jak'a ri xketzeqeliben iwichin kan más e anineq chiwech rix.

¹⁷Xaxe k'a jun xkixoqotan-el ix 1,000 y iwonojel rix xkixanimej-el chikiwech e wo'o'. Xa kan juba' ri xkixk'oje' kan, achi'el toq nuyonij kan jun che' pa ruwi' jun juyu', o achi'el jun retal ri ya'on pa ruwi' jun juyu', xcha' ri Dios.

¹⁸Jak'a ri Jehová kan nrajo' nujoyowaj iwech; rija' kan janila nrajo' nuk'ut ri rajowabal chiwech, roma rija' kan jun Dios richin chojmilal. Jebel ruwa-kiq'ij ri kikuquban kik'u'x rik'in ri Jehová.

¹⁹Chirij re' rix aj-Sión, man chik xkixbe'oq' ta. Ri Jehová kan xtujoyowaj iwech toq xkixsik'in richin nik'utuj to'onik, y rija' kan chi'anin xkixruto'.

²⁰Stape' ri Jehová jantape' ruya'on ruk'ayewal y q'axo'n pan iwi', rija' kan man jun bey chik xkixrumalij kan, jak'a rija' xtuk'ut ronojel chiwech, y man jun achike roma xtikanoj.

²¹Y wi xtichop xtich'er kan iwi' rik'in, jari' toq xtiwak'axaj chi xtuk'ut ri rubey chiwech.

²²Kan xke'iwetzelaj k'a konojel wachibel ri e banon rik'in saqipueq y q'anapueq. Ronojel re' kan xke'ik'eq kan achi'el jun tz'il laj tzieq ri man ch'ajch'oj ta.

²³Chupan ri q'ij ri', ri Jehová kan xtuya-pe job pa ruwi' ri qasanbel-ulew, y ri ulew ri' kan xtuya' pa ruk'iyal ronojel. Chuqa' ri iwawej kan k'o jebel akuchi xkeyuq'ux-wi.

²⁴Ri bóyix y ri taq bur ri yesamajin richin ri ulew kan xtik'oje' pa ruk'iyal ri kiway y ri kiq'os.

²⁵Y xtibanatej k'a chupan ri q'ij ri', toq xkeken ri e etzelanel iwichin, y toq xketzaq ri kitobal, jari' toq xkebejaqatej-pe raqen taq ya' y nima'q rubey taq ya' chiri' pa ruwi' ronojel taq juyu' richin urtisanik pan iwi' rix.

²⁶Y ri rusaqil ri ik' kan achi'el rusaqil ri q'ij, y ri rusaqil ri q'ij kan wuqu' mul más seq chuwech ri kan rubanon-pe. Ja q'ij ri' ri Jehová kan xtraq'omaj y xtupis ri isokotajik rix.

²⁷Tiwak'axaj k'a rix ri aj-Asiria: Ri Jehová kan xtipe nej rik'in oyowal. Y xtuk'en-pe jun nimalej q'eqel-sib. Rik'in ri ruch'abel xtak'axatej chi rija' janila royowal, y kan xtel q'aq' pa ruchi', q'aq' richin kan xkixruk'is.

²⁸Toq xtrelesaj ri ruxla', xtel-pe jun raqen-ya' pa ruchi' ri janila nimirineq, y xtapon chire ri wineq k'a pa ruqul-q'anej. Rija' xkixruchayuj, y kan xtuya' jun ch'ich' q'atbel iwichin richin pan ichi'.

²⁹Jak'a chiwe rix nuwinaq israelita kan xtibebixex bix, achi'el toq niban nimaq'ij pa tinamit Sión. Kan xtikikot janila ri iwánima, achi'el nikikot kánima ri nikixupuj xul toq yejote-el pa Jerusalem richin nikiya' ruq'ij ri Jehová ri k'o janila ruchuq'a'.

³⁰Chupan ri q'ij ri', ri Jehová kan xtuben richin nak'axatej ri ruch'abel chi kan k'o runimirinen. Kan xtitz'etetej chi xtuyek ri ruq'a' chikaj richin nuya-pe ri ruk'ayewal. Ri nimalej royowal kan achi'el jun q'aq' ri kan yaruk'is. Chuqa' xtuya-pe koqolajay, nimalej kaq'iq', job y saqboch.

³¹Toq ri aj-Asiria xtikak'axaj ri ruch'abel ri Jehová, jari' toq xtikik'ul ri rutojbalil. Y rik'in ri ruch'ame'y ri banon rik'in q'eqapueq, xkeruch'ey-wi ri aj-Asiria.

³²Y rik'in ri ruch'abel ri ch'ame'y, xtiq'alajin achi'el jun bix. Y rix nuwinaq xtiq'ojomaj ri iq'ojom, rokik ri Jehová xtuben labal kik'in ri aj-Asiria.

³³Kan k'o yan chik pe q'ij naban-pe pa ruwi' ri rey richin Asiria, ri akuchi xtik'at-wi. Ri akuchi niya'ox-wi ri q'aq' janila nim ruwech y kan janila nim rupan; y kan janila k'iy si' ukusan chire. Y kan ja ri Jehová ri xtiya'on ruq'aq'al achi'el nibiyin ri chuwilej-abej.