Read Kaqchikel Isa 31 Bible Online

Isa 31 - Kaqchikel bible

Isa 31

¹Toq'ex iwech rix ri yixbe pan Egipto richin nibeto-iwi' chiri', ri nikuquba' ik'u'x kik'in ri kikiej, ri nikuquba' ik'u'x kik'in ri janila chi carruaje, y chi kan janila kuchuq'a' ri yech'oke' chirij kiej. Jak'a xa man niya' ta itzubal rik'in ri Loq'olej qa-Dios, y man nikanoj ta ri Jehová.

²Jak'a rija' kan aj-na'oj-wi, y kan xtuya' ri ruk'ayewal pan iwi'. Ri nubij, kan nuben y man xtutzolij ta ri' chirij. Rija' kan xtuya' rutojbalil pa kiwi' ri winaqi' ri e banoy etzelal, y chuqa' xtuya' rutojbalil pa kiwi' ri yeto'on kichin.

³Ri aj-Egipto xa e winaqi', y man e dios ta. Ri kikiej xa e ti'ij, y man e espíritu ta ri k'o kuchuq'a'. Toq ri Jehová kan xtutzeqej ri ruq'a' pa kiwi' richin nuya' rutojbalil chike, kan xketzaq ri aj-Egipto y chuqa' xketzaq ri nikik'ul to'onik chuwi-kiq'a' rije'. Kan junan k'a xkek'is.

⁴Ri Jehová k'iytisanel richin ronojel xubij chuwe chi kan xtipe pa ruwi' ri juyu' Sión richin xtorubana' oyowal richin xtuto' ri rutinamit, achi'el nuben jun koj toq rukamisan chik jun karne'l, y kan niq'ajan-pe chirij ri napon-apo rik'in. Y stape' xtikimol-ki' e k'iy yuq'unela' chirij rija', man xtuxibij ta ri', ni man jun chire rija' ri kiraqoj-chi'ij ri yuq'unela'.

⁵Ri Jehová k'iytisanel richin ronojel kan nibiyaj pa ruwi' ri rutinamit, achi'el nuben jun aj-xik' chikop ri nixik'an pa ruwi' ri rusokaj. Keri' k'a xtuchajij ri Jehová ri Jerusalem. Kan xkeruchajij, xkeruto' y xkerukol ri aj-Jerusalem.

⁶Roma ri', rix nuwinaq titzolej-pe ik'u'x rik'in ri qa-Dios, stape' ix yakatajineq chirij rija'.

⁷Roma chupan ri q'ij ri', rix chi'iwonojel man xke'iya' ta chik kiq'ij ri wachibel ri e banon rik'in saqipueq y q'anapueq ri kan rix ix banayon ri xa ix aj-maki'.

⁸Chupan ri q'ij ri' kan xketzaq k'a ri aj-Asiria chi espada, jak'a man roma ta ri uchuq'a' richin re ruwach'ulew. Ri labal xtuben chi xke'animej ri kiwinaq, y ri alaboni' kan xkekiya' pa kow taq samaj.

⁹Roma ri xibinri'il, ri chajinela' xtikimalij kan ri kisamaj, y ri aj-raqen xtikik'en rukiy toq xtikitz'et ri retal ri kik'amon-pe ri e etzelanel kichin. Ri Jehová nuq'alajirisaj chi ronojel re' kan xtibanatej. Y rija' kan runaban chik ri q'aq' ri chiri' pa tinamit Sión, richin xtuya' rutojbalil pa kiwi' ri e etzelanel kichin.