Read Kaqchikel Isa 32 Bible Online

Isa 32 - Kaqchikel bible

Isa 32

¹Xtapon k'a jun q'ij toq xtik'oje' k'a jun rey ri xtuberuq'ata-tzij pa ruchojmilal, y chuqa' konojel ri xkeq'aton-tzij kan pa ruchojmilal xtikiben.

²Chikijujunal rije' xke'ok achi'el tobel chuwech jun kaq'iq', y xke'ok achi'el jun jay, ri kan xtikito-ki' chupan chuwech jun q'eqel-job. Rije' kan xtikiben chike ri winaqi' richin xkech'uch'u', achi'el nuben jun ti raqen-ya' ri nibiyin chupan ri tz'iran ruwach'ulew, y achi'el rumujal jun nimalej abej chupan ri tz'iran ruwach'ulew.

³Chupan ri q'ij ri', konojel winaqi' kan xtikijeq k'a jebel ri runaq' taq kiwech richin xtikitz'et ri xtuben ri Dios, y kan xtikajo' xtikak'axaj jebel ronojel ri xtubij rija'.

⁴Ri winaqi' ri xa ch'obon man ch'obon nikiben wakami, chupan ri q'ij ri' xtikiben ronojel rik'in na'oj. Y ri mem kan jebel xkebech'on.

⁵Chuqa' man xtiya'ox ta kejqalen ri e nakaneq, ni man jebel ta xketz'et ri banon man banon nikiben.

⁶Ri wineq ri bilon man bilon yerubij, xa man jun najowan, y xa ruyon itzel yeruch'ob. Kan nukanoj k'a richin nuben itzel taq banobel, y chuqa' kan nutz'uk k'a tzij chirij ri Jehová. Jun wineq ri janila ninum nipe rik'in, jak'a rija' kan man jun nuya' chire, y kan man nuya' ta ruya' ri chaqi'j ruchi'.

⁷Ri banon man banon nuben, ri rubanik ri rusamaj kan man utz ta, roma kan nuben itzel chike ri winaqi' ri kan man jun k'o kik'in y kan nutz'uk-tzij chikij, stape' kan choj ri nikich'ojij rije'.

⁸Jak'a ri wineq ri utz, kan utz yeruch'obola', y rik'in utzilej rubanobal, kan xtinimirisex ri ruq'ij.

⁹Jak'a rix ixoqi' aj-Jerusalem ri kan man jun nimey, tiwak'axaj k'a ri xtinbij chiwe. Rix ri kan janila ikuquban ik'u'x kan tiwak'axaj ri nuch'abel.

¹⁰Re wakami janila ikuquban ik'u'x, jak'a más apo chire jun juna', rix kan xkixbaybot roma xibinri'il, roma kan xtik'is ri ruwech ri tiko'n uva, y ri che' man xkewachin ta chik.

¹¹Rix ri kan man jun nimey, kan kixbaybot, rix ri kan ikuquban ik'u'x, kan kixruyikikej xibinri'il. Kan tiwelesaj k'a ri itziaq ri ikusan, y kan tikusaj tzieq richin bis.

¹²Kan tik'utu' richin ixk'o pa bis, roma ri juyu' kan man xkewachin ta chik, y ri xtikik'uluwachij ri tiko'n richin uva.

¹³Chuqa' kixoq' pa ruwi' ri ulew, roma kan xkenoj k'ix chupan. Kixoq' pa kiwi' ri jay akuchi janila yekikot ri winaqi', y chijun ri tinamit ri yenimaq'ijun.

¹⁴Ri jay richin tobel kan xketole' kan, y ri tinamit ri janila chi winaqi' ri ek'o chupan, kan xtitole' kan. Ri rachoch ri chajinel ri k'o pa ruwi' ri tz'aq xa xkemalix kan jumul. Chiri' xkek'oje-wi ri taq bur y kan xkekikot, y ri awej kan chiri' k'a ri xkewa-wi.

¹⁵Jak'a toq ri ru-Espíritu ri Dios xtipe chila' chikaj pa kiwi' ri winaqi', jari' toq ri tz'iran ruwach'ulew kan xtok ulew richin tiko'n, y ri ulew richin tiko'n kan más k'a ri xtiwachin.

¹⁶Ri winaqi' kan xaxe k'a ri ruchojmilal ri xtikiben, Y man xkeq'olon ta chik chupan chijun ri ruwach'ulew.

¹⁷Ri ruchojmilal kan xtuya' uxlanen, kuqubabel-k'u'x y oyobenri'il richin jantape'.

¹⁸Y ri winaqi' ri e richin ri Dios kan xkek'oje' chupan jay akuchi k'o uxlanibel-k'u'x, ri kan man jun xtinaqo kichin, y xketikir xke'uxlan rik'in ch'uch'ujil.

¹⁹Y stape' xtiqaqa saqboch pa kiwi' ri k'echelaj, y pa kiwi' ri tinamit,

²⁰jak'a jebel ruwa-iq'ij rix roma kan chuchi' ri raqen-ya' xkixtikonej-wi, y chuqa' xke'iwisq'opej ri iwawej ri chiri' richin yewa'.