Read Kaqchikel Isa 33 Bible Online

Isa 33 - Kaqchikel bible

Isa 33

¹Toq'ex iwech rix aj-Asiria ri ye'ik'is konojel winaqi', jak'a chiwe rix man jun bey kibanon keri'. Chuqa' kan ye'iq'ol, jak'a rix man jun bey ix q'olon. Jak'a toq rix xkixtane' richin ye'ik'is, chuqa' rix kan xkixk'is. Y toq xkixtane' richin ye'iq'ol rije', chuqa' rix xkixq'ol.

²Jehová, kan tajoyowaj k'a qawech roj, ri kan qakuquban qak'u'x awik'in. Katok k'a quchuq'a' ronojel nimaq'a', y kan qojakolo' chupan ri q'ij richin tijoj-poqonal.

³Konojel ri tinamit kan ye'animej toq nikak'axaj ri ach'abel rat Jehová. Y toq nayek-el ri aq'a' chikaj richin naben oyowal, ri tzobaj winaqi' richin re ruwach'ulew xa kan nikitaluj-el-ki'.

⁴Y ri janila chi qawinaq xke'el-el chusik'ik ri kibeyomel achi'el nikimol-ki' ri sak' chirij ri tiko'n. Y xtikik'uaj-el ronojel ri kan kichin rije'.

⁵Ri Jehová kan ja rija' ri k'o pa ruwi' ronojel, y rija' k'o chiri' pa Jerusalem ri k'o-el pa ruwi' juyu'. Rija' xtuk'en-pe ri ruchojmilal y ri qitzij ri chiri'.

⁶Y kan jantape' xtuya' oyobenri'il kik'in ri aj chiri'. Rija' xtuk'en-pe ri kolotajik, ri na'oj y ri etamabel, kan achi'el jun nimalej beyomel. Y richin xtik'ul re jun beyomel re', kan k'o chi xtik'oje' rukiy ri Jehová chiwech.

⁷Tiwak'axaj k'a ri raqoj-chi'ij ri nikiben ri maneq xibinri'il chikiwech ri chiri' pa bey. Y ri taqonela' richin yebech'on pa ruwi' ri uxlanibel-k'u'x, xetzolin-pe y kan janila ye'oq'.

⁸Ri qabey kan tz'iran, y kan man jun chik k'a wineq ri niq'ax chiri'. Ri winaqi' kan nikiyoj k'a qa ri jikibel-tzij ri kibanalon chikiwech rije', y ri nikajo' nikitzeqelibej ri jikibel-tzij ri', xa xkeyojobex. Y kan man nikiya' ta kejqalen ri kachpochel.

⁹Ronojel ri ruwach'ulew kan xchaqi'j y xmayamo' yan qa, achi'el jun wineq ri janila nibison y kan niken yan qa. Ri ruwach'ulew Líbano kan janila xchaqi'j y kan xmayamo' yan qa. Ri taq'aj richin Sarón xa kan tz'iran chik, achi'el ri Arabá. Chupan chijun taq'aj richin Basán y ri juyu' Carmelo kan ronojel k'a ri che' xechaqi'j yan qa.

¹⁰Ri Jehová nubij chi wakami kan xtibeyakatej-pe richin niberuk'utu' ronojel ruchuq'a' y ri ruk'ojlen.

¹¹Rija' nubij chi ri ich'obonik rix y ri ibanobal maneq rejqalen, achi'el ri páxa y ri q'ayis. Y ri ruxla' rija' xa kan xkixruk'is rix, achi'el ri páxa y ri q'ayis toq yebox pa q'aq'.

¹²Y rix xa kan xkixok chaj, achi'el k'a ri k'ix ri e choyon chik kan, ri xkek'at pa q'aq'.

¹³Rix ri ixk'o nej, kan tiwak'axaj k'a ronojel ri meyel taq rubanobal ri Dios. Rix ri ixk'o naqaj kan titz'eta' k'a ri nimalej ruchuq'a'.

¹⁴Ri pa tinamit Sión konojel winaqi' ri e aj-maki' kan janila xtikixibij-ki'. Konojel ri winaqi' ri maneq Dios chikiwech kan yebaybot roma xibinri'il. Rije' nikibij ri achike xtitikir xtikoch'on ri q'aq' ri', ri kan yaruk'is y man jun bey nichup.

¹⁵¿Achike kami wineq ri nibiyin pa ruchojmilal? Ri nibin ri qitzij; ri man nibeyomer ta rik'in ri man ruch'akon ta; ri man nuya' ta q'ij chi nipuaqix; ri man nrajo' ta nrak'axaj toq niban ch'owen chirij jun kamik; y ri man nuch'ob ta nuben ri itzel taq banobel.

¹⁶Ja wineq re' ri xtik'ase' pa ruwi' taq juyu'. Xtrewaj-ri' chikikojol nima'q taq abej, y kan jantape' xtik'oje' ruway y ruya'.

¹⁷Rix k'a nuwinaq kan xtitz'et k'a ri ruwech ri qa-rey ri k'o ruq'ij. Chuqa' xtitz'et chi ri rajawaren kan xtapon k'a janila nej.

¹⁸Jari' toq xtoqaqa k'a chi'ik'u'x ri xibinri'il ri xiq'axaj toq xixk'oje' chuxe' kitzij ri e etzelanel iwichin. Man xke'itz'et ta chik ri aj-raqen pa kiwi' ri aj-labal ri e kichin rije'. Man xke'itz'et ta chik ri yek'utun ri k'o chi nitoj chire ri ki-rey. Y chuqa' man xke'itz'et ta chik ri chajinela' ri ek'o pa ruwi' ri tz'aq.

¹⁹Man jun bey chik xke'itz'et ri winaqi' ri', ri janila kinimirisan-ki', y ri kan suq'usik yech'on y kan man jun achoq chuwech niq'ax ta.

²⁰Kan titz'eta' k'a jebel ri tinamit Sión, akuchi yojnimaq'ijun-wi. Kan tiya' ri itzubal pa ruwi' ri Jerusalem, jun tinamit ri kan jikil, roma kan achi'el jun jay ri banon rik'in tzieq ri kan man jun bey xtiyoj-el. Kan man jun bey k'a xtik'uq-el ri che' ri e chapayon richin, ni man jun bey xtiraq'ach'ix-el ri kolo' ri ek'o chire.

²¹Ri chiri' ri Jehová kan xtuben nima'q taq banobel qik'in roj. Chuqa' ri chiri' kan xtik'oje' k'a jun raqen-ya' ri nimalej ruwech. Jak'a ri e etzelanel qichin kan man xketikir ta xkeq'ax pa ruwi' ri ya' ri', ni ta ri kijuku', ni ta ri nimalej taq ki-barco.

²²Ri kolo' richin ri barco ri' xa xyokoyo', y man nitikir ta nuchop ri che' ri chapayon richin ri kolo'. Chuqa' man nitikir ta nurik' ri tzieq richin nroyoj kaq'iq'. K'ari' xtiqelesaj k'iy beyomel chike ri e etzelanel qichin, y kan pa ruk'iyal ri xtik'oje', jajun ri e jetz' ri xke'ilon chuqa' junan qik'in. Roma ri Jehová kan ja rija' ri nichojmirisan richin ri yebanatej; ja ri Jehová ri qaq'atoy-tzij, Jehová ri qa-rey, y kan ja rija' ri xtikolon qichin.

²⁴Chupan ri q'ij ri', man jun chike ri qawinaq ri xtiyawej ta. Y ri Dios kan xtukuy kimak ri winaqi' ri ek'o pa tinamit Sión.