Read Kaqchikel Isa 34 Bible Online

Isa 34 - Kaqchikel bible

Isa 34

¹Rix winaqi' richin chijun ruwach'ulew, kan kixjel-pe richin niwak'axaj. Rix tzobaj winaqi' kan jebel tiya' ixikin. Tiwak'axaj k'a rix ri ixk'o pa taq ronojel ruwach'ulew.

²Roma ri Jehová kan janila yakatajineq royowal pan iwi'. Ri royowal kan k'o pa kiwi' konojel aj-labal iwichin rix. Rija' kan xkeruk'is konojel, y kan xkerujech pa kamik.

³Ri kaminaqi' kan xkepunupuxin kan xabakuchi, y kan xkechuwir k'a pe. Ri kikik'el kan xtuch'eqeba' chijun k'echelaj.

⁴Ronojel k'a ri ek'o chuwech ri kaj xa xkechup-qa, y ri kaj kan xtubot-ri' achi'el nubot-ri' jun wuj. Keri' konojel ri ch'umila' man xkech'ich'an ta chik. Kan xketzaq k'a achi'el yetzaq-el ri ruxaq ri juwi-uva, ó ri ruxaq ri wíkix.

⁵Chirij ronojel re' ri ru-espada ri Jehová kan xtiqaqa pa ruwi' ri ruwach'ulew Edom, y ri tinamit ri' kan xtik'is jumul.

⁶Jari' toq ri ru-espada ri Jehová kan xtinoj rik'in kik' y q'en kichin ri winaqi', achi'el toq yekamisex ri karne'l y tzuntzun pa taq kamelabel. Roma ri Jehová kan xtuben jun kamelabel ri chiri' pa Bosrá, chuqa' xtiberubana' jun nimalej kamik pa ch'aqa' chik tinamit richin ri Edom.

⁷Ri winaqi' ri' kan xketzaq k'a achi'el yetzaq ri juyubel wákix, y chuqa' achi'el nikiben ri achija' taq wákix toq yekamisex. Keri' k'a ri kiruwach'ulew kan xtinoj chi kik', y ri poqolaj kan xtinoj rik'in q'en.

⁸Ja q'ij ri' toq ri Jehová xtuya' rutojbalil pa kiwi'; ja q'ij ri' toq xkeruto' ri winaqi' aj-Sión.

⁹Chiri' pan Edom, pa ruk'exel ri raqen taq ya', kan xtik'oje' pa ruk'iyal ri brea. Y pa ruk'exel ri poqolaj kan xtik'oje' ri chuwilej-abej. Chijun k'a ri ruwach'ulew kan xtuchop q'aq'.

¹⁰Kan man xtichup ta chik chi paq'ij chi chaq'a', y jantape' k'a xtibuqulin ri rusibil. Tibe-q'ij tibe-seq xtimalix kan, y kan man jun bey chik ri k'o ta xtiq'ax keri'.

¹¹Chiri' k'a xkek'oje-wi-qa ri jalajoj kiwech túkur, y chuqa' kan chiri' xtikiben-wi-qa kisok ri qo'ch. Ri Jehová kan xtuben tz'iran chire ri ruwach'ulew ri', y kan xtitole' kan.

¹²Re tinamit re' kan man jun bey chik xkek'oje' winaqi' chupan richin jun ta rey niq'aton-tzij pa kiwi', y chuqa' konojel ri e tata'al xkek'is-el.

¹³Chupan ri rachoch kan ri rey xkebek'iy-pe jalajoj ruwech k'ix, chuqa' chikij ri tz'aq richin tobel kan xkebek'iy-pe ri ley. Chiri' xkek'oje-wi ri utiwa', y chiri' chuqa' xkek'oje-wi ri túkur.

¹⁴Ri juyubel sian kan junan xkekanon kik'in ri utiwa'. Ri tzuntzun kan xtikoyola-ki', y ri chikopi' ri yebiyaj chi'aq'a' kan xtikil akuchi yek'oje-wi. Chuqa' chiri' xtik'oje-wi ri xibinel, ri nixibin chi'aq'a'.

¹⁵Ri túkur kan xtikiben-qa kisok, y chiri' xtikiya-wi kisaqmolo'. Xkejupe' pa kiwi' k'a toq xkebos, y xkekimol chikixe' ri kixik' ri taq kal. Chiri' chuqa' xtikimol-wi-ki' ri aj-ch'ak, chi achij chi ixoq.

¹⁶Kan titzu' chupan ri wuj richin ri Jehová y tisik'ij. Kan man jun k'a chike re chikopi' re' ri man ta xtik'oje' chiri', y man jun chike rije' ri ruyon ta xtik'oje' chiri'. Xa kan chikijujunal k'o k'a kachibil, roma kan keri' xubij ri Jehová y rik'in k'a ri ru-Espíritu xkerumol-wi.

¹⁷Chike chikijujunal ri chikopi' ri' xubij ri akuchi xkek'oje-wi, y kan rik'in ri ruq'a' xtuk'ut chikiwech ri achike ruwach'ulew xkek'oje-wi. Y chiri' xkek'oje-wi tibe-q'ij tibe-seq.